Read Mousgoum Lokwita n’ag'aŋ sulu na wiiɗi paakai 17 Bible Online

Lokwita n’ag'aŋ sulu na wiiɗi paakai 17 - Mousgoum bible

Lokwita n’ag'aŋ sulu na wiiɗi paakai 17

¹War buza n’ag'aŋ doogo pi sulu na Akaz pai na Yuda aŋ warɗi pai, Oziyas n’ahini Ela a suma pai warɗi Izrayel a Samariya, a buza warɗi pai buza ɵeeŋe.

²A paya payai na meefeŋ wuzani arni EPIƊ-ƊAI, amma a kiɗa gaini na wiiɗi paakai n’e simi wuzani par ɗa kai.

³Salma nasar pai na Siriya a hala a hitima gaini, a rɗa amai midini. Oziyas a sini tar buza buza paŋ.

⁴Amma pai n’a siriya ɗa, a sɗa ɓa Oziyas a rga seŋ na meefeŋ aŋ warni sini, buri ɓa a ɵina ɗai sini Co pai n’Egipte, pra a sini tar na war buza maini n’avut par ɵa kaalai. Nɵa Pai n’a Asiriya a yimaŋ, a nag'aŋ gaini ɵaɓ, a ɵaŋ warɗi daŋgai.

⁵Asakal par pai na Asiriya a hala a hitima afti na Izrayel ɗa paŋ, a hitimiti Samariya, a tikiti lai, a ŋa midiɗi haa buza hu.

⁶War buza n’ag'aŋ ɵeeŋe na Oziyas aŋ warɗi pai, pai na Asiriya ɗa a tikiti Samariya, a kiɗi ɗai na Izrayel aŋ bagakai warɗi Asiriya. A siɗi hlai zi simni a Hala, ɵimani ra Habor midini afti na Gozaŋ gaini fuŋ n’abakai na Mede lai.

⁷Hanɗa a za buri ɓa aliɗi Izrayel e zi tuwur sini Epiɗ-ɗai Alaw na wiiɗi, Ni n’a miliɗisi edi midini afti n’Egipte par, a piliɗisi edi tini Faraw pai n’Egipte par lai, buri e hûrgi azumai wuzaɗi alawai na zamai,

⁸e zi pini gadai zi ɗiyi na wiiɗi pinziba n’EPIƊ-ƊAI a birgiɗi edi wuzaɗi gaini gadai zi ɗiyi na paakai na Izrayel e ɗiyiŋ ɗa lai.

⁹Aliɗi Izrayel ɗa e tiki piɗi e zi wazagai n’a zuva kai sini Epiɗ-ɗai Alaw na wiiɗi: E zinini hlai zi ɓaka warni fuŋɗi n’abakai paŋ, amai midini hlai zi gɗam lai, aha war fuŋ n’abakai zi ɵaga lai.

¹⁰E ɗiyi ali-fuŋ z'alaw amai zaw zaw, e pi luwuŋ z'alaw amai merfeŋni boŋorai na mogokai tiɓ tiɓ, azumai pini luwuŋ n’a guuɗa tiɓ tiɓ lai.

¹¹War hlai zi ɓaka hanɗa, e yi wazagai zi ɗûgûdi zi lûgûzi kal kal maiɗi pinziba n’EPIƊ-ƊAI a birgiɗi edi wuzaɗi ɗa nɵa. E zi wazagai na maafanai wuzani arni EPIƊ-ƊAI haa e ɓilkini hiinini gaini.

¹²E hûrgi azumai wuzani alawai na zamai paŋ ktai EPIƊ-ƊAI a miɗiɗi ya ɓa: e zi hanɗa kai.

¹³EPIƊ-ƊAI a miɗiɗi ka wiiɗi ɗai na Izrayel gaiɗi na Yuda war miɗi ɗai na mini Alaw na kiiɗi kiiɗi ya, a miɗiɗi maini nɵa: bindisi edi siɗi futiki na mafuni par, zi pini gadaiŋa, pini gadaiŋa zi ɗiyi maini na war Ɗû na mu siŋɗi wiiɗi tamaiki, na mu ɵiniŋkiɗi wiiki tiki tiɗi ɗaiŋa, ɗai na mini Alaw.

¹⁴Amma e yimi seŋ hanɗa kai, e tiki ɵimani tek tek maiɗi tamaiɗi n’e ɗiyi yimiɗi midini Epiɗ-ɗai Alaw na wiiɗi kai ɗa ɵa.

¹⁵E bili gadai zi ɗû na wiini Alaw ɗa edi gaini bonu n’a zaŋ gaiɗi tiyakaiɗi, e diri e ɵini gadai n’a siŋɗi kai, e rivi pini wazagai n’a nava kai, nagai lai e bindi aŋ ɗai n’e nivi kaalai. E tikiti futi piɗi ɗai n’e ɗa ɵimani ɗa, paŋ ktai EPIƊ-ƊAI a miɗiɗi ya ɓa ki zi maiɗi nagai nɵa kai.

¹⁶E hini Epiɗ-ɗai Alaw na wiiɗi ɗa edi, e zizini ali ɵaakai z'alaw sulu, e pi luwuŋ z'alaw amai tiɓ, e hûrgi azumai wuzani wazagai zi rgi n’arbani hlai n’amai, wuzani Baal ɗa lai.

¹⁷E yiɗi aliɗi na maɵagai gaiɗi na falakai edi aŋ ɓaka gaini afu. E zilbi evek, e siɗi wuti. E niyi siɗi war sdakai na maafanai wuzani arni EPIƊ-ƊAI haa e ɓilkini hiinini gaini hanɗa.

¹⁸EPIƊ-ƊAI a za hiy siɗi ɗai na Izrayel abai gara, a birgiɗi edi wuzani arni par gaigai, a hina ɗa a pinziba na wiini Yuda tar.

¹⁹Amma ɗai na Yuda ɗa lai, e zi pini gadai na wiini Epiɗ-ɗai Alaw na wiiɗi kai, e zi ɗa pini gadai zi ɗiyi na ɗai na Izrayel e ɗiyiŋ ɗa.

²⁰Pini hanɗa, EPIƊ-ƊAI a birgiɗi pinzibaɗi Izrayel ɗa gaini hlaiɗi edi wuzani arni par, a tikiɗi siyer, a siɗi war tiɗi ɗai zi vram kapai e ɵiriɗi edi wuzani arni par.

²¹Won hlai n’EPIƊ-ƊAI a tika arni afti na wiiɗi Izrayel edi sini afti n’a naka pini David par ɗaw ɗa, ɗai e viri Yerobowam n’ahini Nebat aŋ pai, Yerobowam a kiɗi ɗai na Izrayel edi gaigai sini EPIƊ-ƊAI par, a kiɗi aŋ zi tuwur n’abai.

²²Aliɗi Izrayel e zi tuwur na Yerobowam a zaŋ ɗa paŋ, e hini ktai maa edi pini kai.

²³Haa EPIƊ-ƊAI a birgiɗi wuzani arni par, maini n’a muɗaŋ war miɗi ɗaini na mini Alaw ɗa nɵa. A kiɗi ɗai na Izrayel edi war Asiriya, edi gaigai sini aftiɗi par haa girna.

²⁴Pai na Asiriya a mulasi ɗai a Babilon par, a Kut par, a Ava par, a Hamat par, a Sefarvaiim par lai, a miliɗi war fuŋ n’abakai na war Samariya war balamɗi aliɗi Izrayel. E tikiti Samariya e simni warni fuŋɗi n’abakai lai.

²⁵War hlai n’e tiki piɗi aŋ simni a Samariya tar ɗa, e siɗi hormo na e siŋni wiini EPIƊ-ƊAI kai, nɵa EPIƊ-ƊAI a ɵinasi gurnai midiɗi a fuɗa ɗai arbaɗi viya.

²⁶Ɗai e miɗini wiini pai na Asiriya ɓa: pinzibaɗi ɗai na ku miliɗisi edi par, ku kiɗisi midini afti na Samariya hanɗa e siɗi hormo n’e siŋni wiini alaw na midini afti hanɗa kai. alaw ni ɗa a ɵina gurnai midiɗi, tiya n’a na fiɗiɗi edi tuku na, buri ɓa e siɗi de na wiini alaw na midini afti hanɗa kai.

²⁷Pai na Asiriya a sa miɗi ɓa: hili ki piyi ktai arbaɗi paakai zi ɓaka n’e miliɗisi war Samariya par, a waya aha kapai a hitriɗi de na wiini alaw na midini afti ni ɗa wiiɗi ɗai na morkokai ɗa.

²⁸Nɵa pai zi ɓaka ktai n’arbaɗi n’e miliɗisi war Samariya par, a halasi a sumna a Betel a hitriɗi ɗai midini hormo n’e siŋni wiini EPIƊ-ƊAI ɗa.

²⁹Pinziba paŋ a zizina alawai na wiini ta ta, e miliŋ amlai warni tempel na war hlai zi ɓaka na ɗai na Samariya e ziziniŋ ɗa. Pinziba paŋ a za maini hanɗa ɵa war fuŋ n’abai n’aŋ warni paŋ.

³⁰Ɗai na Babilon e rgi alaw n’e yikiŋ ɓa: Sukot-Benot, ɗai na Kut e rgi alaw n’e yikiŋ ɓa: Nergal, ɗai na Hamat e rgiŋ alaw n’e yikiŋ ɓa: Asima,

³¹ɗai na Avite e rgi alaw n’e yikiŋ ɓa: Nibaz gaini n’e yikiŋ ɓa: Tartak, ɗai na Sefarvaiim siɗi aŋ yiɗi aliɗi edi aŋ ɓaka wiini alaw Adrammelek gaini alaw Anammelek, alawai na wiiɗi ɵa.

³²E bindi e hûni EPIƊ-ƊAI, e viri ɗai zamai arbaɗi par aŋ paakai zi ɓaka kapai e zi ɓaka war yikiɗi amlai war tempel na war hlai zi ɓaka ɗa.

³³E hûni EPIƊ-ƊAI lai, e hûrgi azumai wuzani alawai na wiiɗi lai, maini na e ɗika e ziŋsi midini afti n’e miliɗisi warni par nɵa.

³⁴Haa girna ɗai na Samariya ɗa e zi ɗa pini de na wiiɗi n’avut par ɗa, e zini hormo wiini EPIƊ-ƊAI kai, e zi pini gadai gaini de n’a bunda aŋ wiiɗi ɗa kai, e zi pini Ɗû gaini gadai zi ɗiyi n’EPIƊ-ƊAI a siŋɗi wiiɗi alini Yakob, n’a ɵini yiki ɓa: Izrayel ɗa kai.

³⁵EPIƊ-ƊAI a za bonu gaiɗi, a gidiɗi maini nɵa: ki zini hormo wiini alawai zamai ɗa kai, ki hûrgi azumai wuzani kaalai, ki zi ɵeŋni kai, ki zini ɓaka kaalai.

³⁶A milikisi edi warɗi Egipte par ɗa a EPIƊ-ƊAI, a milikisi gaini spak n’abai gara, ki zini hormo wiini Ni, ki hûrgi azumai ɗa wuzani Ni, ki zini ɓaka ɗa wiini Ni lai.

³⁷Aga ki zi pini gadai gaini de gaini Ɗû gaini gadai zi ɗiyi n’a ɗoŋ aŋ wiiki. Ki zi pini kûreɗ-kûreɗ. Ki zini hormo wiini alawai na zamai ɗa kai.

³⁸Ki hini miɗiki a wula gaini bonu na mu zaŋ gaiki kai. Ki zini hormo wiini alawai na zamai ɗa kai.

³⁹Ki zini hormo ɗa wiini Epiɗ-ɗai Alaw na wiiki, aga a piliki edi war tiɗi gawki paŋ par ɗa a ni.

⁴⁰Amma e ɵini mini kai, e zi ɗa pini deɗi n’avut par ɗa ɵa.

⁴¹Pini zibaɗi ɗai hanɗa, e zini hormo wiini EPIƊ-ƊAI lai, e zi ɵeŋni alawai na zamai na jrekai kai ɗa lai. Sda na tamaiɗi e ziŋ ɗa, haa girna aliɗi gaiɗi tiyakaiɗi e zi ɗa a ni lai.