Read Mousgoum Lokwita n’ag'aŋ sulu na wiiɗi paakai 18 Bible Online

Lokwita n’ag'aŋ sulu na wiiɗi paakai 18 - Mousgoum bible

Lokwita n’ag'aŋ sulu na wiiɗi paakai 18

¹War buza n’ag'aŋ hu na Oziyas n’ahini Ela pai na Izrayel aŋ warɗi pai, Ezekiyas n’ahini Akaz a suma pai midiɗi Yuda.

²A suma pai sek ɗa, buzani caaɓa pi ɵim, a buza warɗi pai buza caaɓa pi ɵeeŋe a Yeruzalem. Emini yikiɗi ɓa: Abi, t'ahini Zekariyas.

³A paya payai na pɗem wuzani arni EPIƊ-ƊAI kal kal maini David na tiyni nɵa.

⁴A vada hlai zi ɓaka edi ɗa a ni, a haɗa alini fuŋ z'alawai na gaini ɗiyi amai zaw zaw ɗa edi, a ɗukla luwuŋ z'alaw na gaini pi tiɓ tiɓ ɗa azumai, a haɗa wala meefeŋ zi kiya na Musus a zaŋ ɗa edi buri ɓa haa sini mefeŋ ni ɗa aliɗi Izrayel e yi wala zi ɗûgûdi zi lûgûzi wuzani e sini yiki ɓa: Nehustan.

⁵Ezekiyas a ɗiya yimini midini Epiɗ-ɗai Alaw na wiiɗi Izrayel. Arbaɗi paakai n’e simi war Yuda paŋ ɗa, n’e vigi wuzani par gaiɗi n’e simi asakalni par lai ɗa, ktai n’a kata gaini aŋ kai.

⁶A naga sini EPIƊ-ƊAI, a pla mini duk kai zaŋ. A za pini gadai n’EPIƊ-ƊAI a siŋni wiini Musus ɗa.

⁷EPIƊ-ƊAI a nafu gaini, wala paŋ n’a hiinaŋ li ɓa a zaŋ a zi ɗa a zaŋ ta. A faka amai sini pai na Asiriya, pai a kiɗa aŋ ŋa midini kir kai.

⁸Ni gaini midini a rɗa amai midiɗi Filistrekai a tika futi piɗi haa aha midini afti na Gaza ta, a mula hlaiɗi zi gɗam gaini fuŋɗi n’abakai lai.

⁹War buza n’ag'aŋ puɗu na Ezekiyas aŋ warɗi pai na Yuda, a buza n’ag'aŋ muguzak na Oziyas n’ahini Ela a na aŋ pai midiɗi Izrayel ɗa lai, Salma nasar pai na Asiriya a halasi a cikiti Samariya.

¹⁰Ɗai na Asiriya e zi buza hu e tikiti Samariya ɗaw. E tikiti war buza n’ag'aŋ ɵaara na Ezekiyas aŋ warɗi pai na Yuda, a buza n’ag'aŋ ɵeeŋe na Oziyas aŋ warɗi pai midiɗi Izrayel ɗa lai.

¹¹Pai na Asiriya a kiɗi ɗai na Izrayel war Asiriya, a siɗi hlai zi simni a Hala, na zamai ɵimani ra Habor midini afti na Gozaŋ, warni fuŋ n’abakai na Mede lai.

¹²Buri ɓa e ɵini mini Epiɗ-ɗai Alaw na wiiɗi kai; E hi amai midini gadai na wiini bonu n’a zaŋ gaiɗi: wazagai na Musus ɵeŋ na wiini EPIƊ-ƊAI a gidiɗi midini ɗa e yimiŋ kaalai, e zi pini kaalai.

¹³War buza n’ag'aŋ doogo pi puɗu na Ezekiyas aŋ warɗi pai, Sennakerib pai na Asiriya a hitima fuŋ n’abakai zi ɵaga na war Yuda ɗa paŋ, a mulaŋ lai.

¹⁴Nɵa Ezekiyas pai na Yuda, a ɵina ɗai sini pai na Asiriya a Lakis a miɗini: mu za meefeŋ, hitimaŋa kir kai, na ku tikaŋŋa li maɗa paŋ ɗa, aga mu zaŋ. Pai na Asiriya a tikini tar midini Ezekiyas pai na Yuda, a virgini arzaŋ kilo dubu ɵeeŋe, or kilo miya ɵeeŋe lai.

¹⁵Ezekiyas a sini arzaŋ n’amlai warni tempel na wiini EPIƊ-ƊAI gaini n’amlai war godai n’ahani pai ɗa lai.

¹⁶War sarti ni ɗa, Ezekiyas a sa futi ɓa e hûrki or na sini porte gaini na sini luwuŋ na sini ɗa edi, luwuŋ na ni pai na Yuda gaini midini dama a sa futi ɓa e yimi or sini ɗa, a siŋni wiini pai na Asiriya.

¹⁷Amma pai na Asiriya a ɵina abaiɗi askarai na wiini, gaini abaiɗi ɗaini zi sda gaini abai na midini dalamni lai a Lakis par sini Ezekiyas pai na Yuda war Yeruzalem gaini vokɗi askarai piɗi pɗem ta lai. E hili e cû war Yeruzalem, won hlai n’e cû woni e hili e ɗiyisi mini hlai na yem na warɗi avai n’amai par a kasi warni ɗaw ɗa, e ɗiyisi warɗi futi na te ka edi war vuwai na wiini ɗif n’a za sapa bogro par lai.

¹⁸E ɵini pini pai ɓa a halasi e firiyi e miɗi gaini. Amma a halasi miɗi ɗa a Eliyakim n’ahini Hilkiya abai na midini dalam na wiini pai, gaini sekreter Sebna gaini Yowa n’ahini Asaf ɗif na mini pai lai.

¹⁹Abai na midini dalam na wiini pai a miɗiɗi: ki miɗini wiini Ezekiyas ɓa, pai n’abai, pai n’a Asiriya ɗa a na muɗa ɓa: a tika hiinini tiɓ na ɗa midini a maɗa?

²⁰Ku hiina warku ɓa seŋ zi miɗi na taf taf kadai ɗa, a yel gaini kurfuk na war hatam ɗe! Ku pɵa na ɗa midini asiya kiɗa na kapai ku faka amai sa ɗa?

²¹Ku pɵa na ɗa midiɗi Egipte, vayai na gaini hiɗi ɓaw, na asiya ɗi paŋ n’a pa tini li midini ɗa a ɓulaŋ fu tini ɗi? Faraw pai n’Egipte a na maini nɵa burini asiya ɗi paŋ n’a na pɵa midini ɗa.

²²Ablaŋtaŋkai aga ki wiyiŋa seŋ ɓa: ki pɵi na ɗa midini Epiɗ-ɗai Alaw na wiiki ɗi ɗa, a ni na Ezekiyas a tuura hlaini zi ɓaka gaini gûwiŋni zi yi ɓaka edi ɗa kai ɗi? A miɗiɗi wiiɗi ɗai na Yuda gaiɗi na Yeruzalem ɗa ɓa: E hûrgi azumai ɗa wuzani gûwiŋ zi yi ɓaka n’a na war Yeruzalem ɗa kiini a Ezekiyas ni kai ɗi.

²³Na ɓa ɵa ɗa, ro epin-geza na pai na Asiriya haw le, na ɓa ɗaiku zi dibiri plasai e ɗa ɗa, ta aga mu piyuku plasai dubu sulu.

²⁴Tuku maa ku kiɗa ku burga Lawan na wiini epin-geza n’agwi na piɗi marni ɗa kai, ku pɵa na ɗa midiɗi Egipte ɓa aga te sukusi Saretai zi gaw gaini plasai.

²⁵Kai tiɓ ɗa, mu halasi mu hitima, mu tuura hlai hanɗa edi lai na ɗa, ki hiini ɓa dirini EPIƊ-ƊAI aŋ warni kai ɗi, a saŋa futi ɗa a EPIƊ-ƊAI ɓa mu hala mu hitima afti hanɗa, mu tuuraŋ edi lai.

²⁶Eliyakim n’ahini Hilkiya, Sebna gaini Yowa e miɗini wiini abai na midini dalam na wiini pai maini nɵa: mu siiwuku, miɗiyisi gaini mini seŋ na wiiɗi ɗai na Aram ɗa tiyi mi ɵiniŋ ya. Ku miɗiyi gaini mini seŋ na wiiɗi Yudiyakai ɵimani ɗai n’e ɗa amai midiɗi zilaagai par aŋ ziɓiri na ɗa kai.

²⁷Abai na midini dalam na wiini pai a wiyiɗi seŋ: seŋ na epin-geza a ɵenaŋasi aŋ muɗaŋ ɗa a na burini epin-gezaku gaiku tuku kiiki ɗi, nagai n’e simnisi amai par midiɗi zilaagai hanɗa, aga e bindi e simi fulaiɗi, e ci huŋoiɗi lai gaiki tiki ɗa e ɗi nagai kai ɗi?

²⁸Nɵa Abai na midini dalam na wiini pai a ɗiya amai zaw a ɗuula gaini gdaŋni war mini seŋ na wiiɗi Yudiyakai, a muɗa: ziɓiri seŋ na wiini pai n’abai ɗa, pai na Asiriya.

²⁹Pai a n’a muɗa maini nɵa: ki hini Ezekiyas a dûûliki kai buri a kiɗa a piliki edi war ta par kai.

³⁰Ki tiɓi pini Ezekiyas n’aga a ziki miɗiki ɓa: ki pɵi ɗa midini EPIƊ-ƊAI, aga a piliki edi fakat fakat, n’a miɗiki lai ɓa fuŋ n’abai hanɗa aga a sa tini pai na Asiriya kai ɗa kai.

³¹Pai na Asiriya a na muɗa maini nɵa: ki yimi seŋni Ezekiyas ɗa kai, ki zi marmai gaya, ki wiyisi amlai pa, nɵa asiya asiya ɗi paŋ aga a luma ali luwuŋ zi vin gaini ali luwuŋ Fige na wiini, aga a ca yem war kiliŋi na wiini par lai.

³²Asakal par aga mu halaɗi, mu kiki midini afti na maini na wiiki nɵa. Afti n’a za algama, n’a za vin na hehe, afti zi peŋ gaini luwuŋ zi vin afti n’a za luwuŋ Olive n’a za emel, afti n’a za emelni ami lai. Nɵa aga ki simni karki ki mri kai. Ki yimi pini Ezekiyas n’a na dûûliki ɓa EPIƊ-ƊAI aga a piliki edi kai.

³³Alawai na wiini pinziba hanɗa e kiɗi e ɗiliŋa aŋ tika aftiɗi ɗi?

³⁴Alawai na wiiɗi Hamat, gaiɗi na wiiɗi Arpad e ɗi wata ɗa? Alawai na wiiɗi Sefarvayim, gaiɗi na wiiɗi Hena gaiɗi na wiiɗi Iva ɗa e ɗi wata ɗa? E ɗiliŋa aŋ tikiti Samariya ɗi?

³⁵Arbaɗi alawai na wiini afti hanɗa, ktai n’a ɗalaŋa aŋ tika aftini kai ɗa a na wata ɗa? Na kapai EPIƊ-ƊAI a ɗalaŋa aŋ tikiti Yeruzalem ɗa.

³⁶Ɗai e simni hiyak, e wiyi seŋ kai, buri pai Ezekiyas a miɗiɗi ɓa: E wiyi seŋ kai.

³⁷Asakal par Eliyakim n’ahini Hilkiya abaini dalam na wiini pai, sekreter Sebna gaini ɗif na mini pai Yowa e wiyisi sini Ezekiyas, sapa na siɗi gaini ɓisi edi ɓas ɓas, e miɗini seŋ na abaini dalam na wiini pai na Asiriya a miɗiŋɗisi ɗa.