Read Mousgoum Lokwita n’ag'aŋ sulu na wiiɗi paakai 19 Bible Online

Lokwita n’ag'aŋ sulu na wiiɗi paakai 19 - Mousgoum bible

Lokwita n’ag'aŋ sulu na wiiɗi paakai 19

¹Won hlai na pai Ezekiyas a ɵina seŋ hanɗa, a ɓasa sapa na sini edi, a wa sapa zi tuwi sini, a hala amlai war tempel na wiini EPIƊ-ƊAI.

²Asakal par a ɵina Eliyakim na abaini dalam na wiini pai, gaini sekreter Sebna, gaiɗi paakai zi ɓaka na e fini war sda viya sini ɗif na mini Alaw Esaya n’ahini Amot nagai lai, e wi sapa zi tuwi siɗi,

³e miɗini wiini Esaya maini nɵa: Ezekiyas ɓa girna ɗa, a mefeŋ zi kwimi, zi gir, zi siyer lai. Maini na ɗai e miɗiŋ na ɵa ɗa: "ahi midini edi ta, amma emini gdaŋɗi na te siŋka kapai a wasi gaini aŋ kai".

⁴Ablaŋtaŋkai, Epiɗ-ɗai Alaw na wiiku a ɵina seŋ na pai na Asiriya a ɵinasi abai na midini dalam na wiini aŋ muɗaŋ, aŋ tirka Alaw na karni ɗa ya ɗi. Ablaŋtaŋkai Epiɗ-ɗai Alaw na wiiku ɗa aga a tikini gir midini buri seŋ n’a ɵinaŋ mini par ɗi. Nɵa ɗa, tuku Esaya siiwa EPIƊ-ƊAI buriɗi ɗaiku n’e hini karɗi ɗa haw kai ɗi.

⁵Ɗai na pai Ezekiyas a ɵiniɗi ɗa e cû sini Esaya.

⁶Esaya a miɗiɗi: hili ki miɗini wiini Epingezaki ɓa: EPIƊ-ƊAI a na muɗa maini nɵa: seŋ na ku ɵinaŋ na ɗai na wiini pai na Asiriya e miɗiŋ sa aŋ meefeŋ paŋ ɗa ku hunaŋ kai.

⁷Tala, aga mu sini hiini ktai, aga a nava labar n’aha par, pini labar hanɗa, aga a waya aha midini aftini, a co li aha midini aftini ɗa, aga mu fuɗaŋ edi gaini kaɵkar.

⁸Abai na midini dalam na wiini pai a ɵina ɓa pai na Asiriya a n’a Lakis kir kai, a hala a Libna aŋ hitima fuŋ n’abai hanɗa, a hala pini woni.

⁹Pai na Asiriya a nava labar ɓa Tirhaka na Etiyopiya par pai n’Egipte a na halasi aŋ hitima gaini. Pai na Asiriya a waya a ɵina ɗai sini Ezekiyas a miɗini pra:

¹⁰Ki miɗini wiini Ezekiyas pai na Yuda ɗa ɓa: ku tika hiiniku midini Alaw na wiiku gara ta, ku hiina ɓa aga a ɗalaŋa aŋ tikiti Yeruzalem ɗi ɗa, ku wula ɵa kai.

¹¹Tuku gaini muduku ku sɗa wala na paakai na Asiriya e ɗa e ziŋ sini afti na zamai paŋ ɗa, e tûriŋ edi marwai marwai, tuku ku hiina ɓa aga ku mula miɗi par yaw kir kai ɗi!

¹²alawai na wiiɗi pinziba na tamaiya na wuza par e tûriŋ edi maini: Gozaŋ, Haral, Resef gaiɗi ɗai na Eden n’e ɗa a Telasar ɵa ɗa, e kiɗi e piliɗi edi tiɗi par ɗi?

¹³Pai na Hamat, na Arpad, na Layir, na Sefarvaiim, na Hena gaini na Iva ɗa e ɗi wata ɗa?

¹⁴Ezekiyas a tikiti letre tiɗi ɗai n’e ɵiniɗisi ɗa par, aŋiti, a niya amai warni tempel na wiini EPIƊ-ƊAI a militi letre hanɗa edi wuzani EPIƊ-ƊAI.

¹⁵A siiwa EPIƊ-ƊAI a muɗa: Epiɗ-ɗai Alaw na wiiɗi Izrayel, tuku na ku sumna amai midiɗi Kerubimkai, paakai na midiɗi yai paŋ ɗa Alaw na wiiɗi ku tuku ktai buri ku za hlai n’amai gaiɗi yai.

¹⁶EPIƊ-ƊAI, zagasi ɵimaku zak zibura, EPIƊ-ƊAI, malasi arku edi mal, tala. Slina seŋ na ɗai na Sennakerib a ɵiniɗisi e ɗa miɗiŋ suku tuku Alaw na karku haw.

¹⁷EPIƊ-ƊAI, a jre ɓa paakai na Asiriya e vidiɗi pinzibaɗi ɗai edi viya gaini aftiɗi paŋ lai.

¹⁸E pûki alawaiɗi arni afu, amma alawai ni ɗa a Alaw kai, a wazagai n’a rga gaini tini ɗif. Zamai ɗa a luwuŋ, zamai ɗa a alifuŋ lai, paakai na Asiriya e tûriŋ edi.

¹⁹Tiyana ɗa tuku Epiɗ-ɗai Alaw na wiyi, kûriyi edi tini Sennakerib par kur, kapai paakai na midini afti paŋ aga e siɗi ɓa k’Alaw ku tuku EPIƊ-ƊAI ktai.

²⁰Esaya n’ahini Amot a ɵina ɗai sini Ezekiyas aŋ miɗini maini nɵa: Epiɗ-ɗai Alaw na wiiɗi Izrayel a na muɗa ɓa: siiwa na ku siiwaŋa burini Sennakerib pai na Asiriya ɗa, mu ɵinaŋ ya.

²¹EPIƊ-ƊAI a na muɗa sini maini nɵa: Siyon na juvi te na miisuku, te na zuku yewere, Yeruzalem na juvi, te na riya puku, te gigiza midiɗi puku lai.

²²Ku tirka ɗa asiya ɗa? Ku muɗa seŋ na meefeŋ na ɗa sini asiya ɗa? Ku muɗa gaini wûle na gdaŋ na ɗa wiini asiya ɗa, na ku talaŋ maini ɗif na nafani aŋ kai ɵa ɗa asiya ɗa? Ku zaŋ na sa ta Alaw na sɗik, Alaw na wiiɗi Izrayel.

²³War miɗi ɗai na ku ɵiniɗisi ɗa, ku tirkaŋa ta EPIƊ-ƊAI ku muɗa gaini warku ɓa: gaini saretaiŋa zi gaw na viya hanɗa, ta Sennakerib mu niya haa amai merfeŋni huwoŋai, haa amlai arbani jur na Liban, aŋ ɗukla luwuŋ Sedre n’abakai gaini luwuŋ Sipre na mogokai lai. Mu hala haa amai merfeŋɗi huwuŋi na muguwi gara ɗa ta. Haa sini jur na gaini futini gara ɗa ta lai.

²⁴Mu ɓula kalaŋ midini aftiɗi ɗai zamai zamai, mu ca yem na warni lai. Mu hiɗika arakaini Nil ɗa paŋ amai, hlai na mu tika aza midini afti n’Egipte.

²⁵Sennakerib, ku sda hanɗa mu kataŋsi haa avut par muta, ku sɗa ɵa kai ɗi? Haa gamai par mu hiinaŋsi ta, tiyana ɗa mu vaŋli amai. Mu tukuku ɗa buri ku haɗa fuŋ n’abakai zi ɵaga ɗa azumai, ku bundaŋ aŋ greŋ.

²⁶Ɗai na war fuŋ hanɗa gdaŋɗi a vada vat, e ɗa war hunai, war siyer lai. E bindi maini evek n’edi war basga nɵa, maini sugoi n’a guɗa nɵa, maini sugoi n’a diya amai midini dalam nɵa, maini algama na neme neme a yimaŋ wuzani bûzûgûni nɵa lai.

²⁷Mu sɗa n’aŋ suku ɗa paŋ: mu sɗa simniku na ku sumna azumai, mu sɗa niyiku n’edi, mu sɗa wiyiku n’aha lai, mu sɗa fiki na ku faka amai sa gaini hiy ɗa lai.

²⁸Nkam, ku faka amai sa gaini hiy, seŋku zi miɗi na ɗewek ɗa mu ɵinaŋ paŋ lai. Tiyana ɗa, aga mu pa sogom merfeŋku tiɓ, mu wa eleŋze muku ɗik lai. Aga mu wuyuku warɗi futi na ku halasi warɗi par ɗaw ɗa.

²⁹Amma tuku Ezekiyas aga a suŋkuku ɗa a hanɗa: Abaraina ɗaˆ ɗai aga e simi ɗa a seyem n’a ɗiya kiini. Buza na wuzamu nɵa lai. Amma buza n’ag'aŋ hu ɗa, Ki sûwiɗi seyem, ki hiɗi, ki pi luwoŋai zi vin, ki limi alini lai.

³⁰Ɗai na war pinzibani Yuda n’e hini karɗi, aga e rivi sirdai azumai sek, aga e wi ali amai siɗi maini luwuŋ nɵa.

³¹Buri ɓa war Yeruzalem par ɗai n’e hini ɗa aga e niyisi edi, nagai n’e kûrɗisi ɗa, aga e ɗiyisi amai midiɗi huwuŋ Siyon par, hanɗa a wala n’EPIƊ-ƊAI aga a zaŋ buri diri n’a na ya warni gara ɗa.

³²Tiyana EPIƊ-ƊAI a na muɗa midini pai na Asiriya maini nɵa: aga a niya aha war fuŋ n’abai hanɗa kai, aga a ɵiɓa ɓaraw ktai maa aha warni sek kai, aga a hitimaŋ gaini gamar kai, aga a liba afti amai azini ɵaga kapai e pri aha sek midini ɗaw kai.

³³Aga a waya duɓani warɗi futi n’a halasi warɗi par ɗaw, aga a niya aha warɗi Yeruzalem kai, a miɗi n’a halasi sini EPIƊ-ƊAI par.

³⁴Aga mu wa ta edi midini fuŋ n’abai hanɗa, mu koraŋ edi lai. Aga mu za hanɗa buriya ta dama, burini David na ɵeŋŋa ɗa lai.

³⁵War duvuk hanɗa, ɵeŋ na wiini EPIƊ-ƊAI a niya aha war kaŋ na wiiɗi ɗai na Asiriya, a fuɗa ɗai dubu miya gaini doogo doogo mitwis pi ɵim; gorof par Won hlai na ɗai e fikisi amai ɗa, e tili ɗa, hlai paŋ a kopoŋ sal.

³⁶Sennakerib pai na Asiriya a sa miɗi wiiɗi ɗai buri e rɗi kaŋɗi ɗa, a waya war Ninive a sumna woni.

³⁷Mefeŋ ktai, hlai na Sennakerib a na aŋ siiwa amlai war tempel na wiini Nisrok alaw na wiini ɗa, alini zamai sulu Adrammelek gaini Sareser e fiɗiŋ edi gaini kaɵkar, asakal par e pri edi midini afti na Ararat. Asaradon n’ahini a suma pai war balamni.