Read Mousgoum Lokwita n’ag'aŋ sulu na wiiɗi paakai 20 Bible Online

Lokwita n’ag'aŋ sulu na wiiɗi paakai 20 - Mousgoum bible

Lokwita n’ag'aŋ sulu na wiiɗi paakai 20

¹War sarti ni ɗa, Ezekiyas veglek na gdaŋ a yimaŋ. Ɗif na mini Alaw Esaya n’ahini Amots a halasi sini a miɗini: EPIƊ-ƊAI a na muɗa maini nɵa: muɗa seŋ n’aŋ muku na ku firiya ku miɗiŋɗi wiiɗi ɗai na ahaku ta ta, buri ɓa aga ku sumna karku kai.

²Ezekiyas a bunda arni amlai sini hlai sek, a siiwa EPIƊ-ƊAI a muɗa:

³Hai, EPIƊ-ƊAI, hina muduku a kɵa buriya, buri mu paya payai na ɗikat wuzani arku gaiɗi agula ktai lai, mu za ɗa a wazagai n’a tala arku pɗamai lai. Asakal hanɗa, Ezekiyas a tuuwa gara.

⁴Esaya maa a cosi edi war pakatai na wiini pai ɗa kai hai, wûle na wiini EPIƊ-ƊAI a muɗa sini maini nɵa:

⁵Waia sini Ezekiyas na paiɗi ɗaiŋa ɗa, ku miɗini ɓa: Epiɗ-ɗai Alaw na wiini David na tiyiku a na muɗa maini nɵa: mu ɵina siiwaku li, mu tala tuwi n’arku ya lai. Tiyana aga mu zuuluku, war mefeŋ n’ag'aŋ hu ɗa aga ku hala amai war tempel na wiini EPIƊ-ƊAI.

⁶Aga mu riya buzaku amai katawai doogo pi ɵim, tuku gaini fuŋ n’abai hanɗa paŋ aga mu kûrɗiki edi tini pai na Asiriya par. Aga mu wa ta edi midini fuŋ n’abai hanɗa buriya ta dama gaini David na ɵeŋŋa lai.

⁷Esaya a muɗa: kisi lagiya zi Fige na hûleŋ ktai, e kinisi lagiya ktai a girdaŋ mini wuruk na wiini pai ɗa, kapai a zuulaŋ.

⁸Nɵa Ezekiyas a zilba Esaya: aga mu sɗa ɓa EPIƊ-ƊAI aga a zuulaŋa, war mefeŋ n’ag'aŋ hu ɗa, aga mu hala amai war tempel na wiini EPIƊ-ƊAI lai ɗa sini a maɗa?

⁹Esaya a wiyini seŋ: aga ku sɗa ɓa EPIƊ-ƊAI a va seŋni n’a muɗaŋ ɗa amai war hanɗa: seze n’aŋ midini ɓok na wiini Akaz ɗa, ku firiya ɓa a hala wuzani amai sek ɓok doogo zaw, a waya azumai sek ɓok doogo ɗi?

¹⁰Ezekiyas a wiyini seŋ: seze ɗa a kiɗa a hala wuzani sek ɓok doogo, amma gir ɗa a wiyi n’a waya azumai sek ɓok doogo ɗa.

¹¹Ɗif na mini Alaw Esaya a siiwa EPIƊ-ƊAI, EPIƊ-ƊAI a waya seze azumai sek ɓok doogo sini hlai n’a nafu woni ɗa par.

¹²War sarti ni ɗa, Merodak-Baladan n’ahini Baladan pai na Babilon a ɵininisi letre gaini katu wiini Ezekiyas buri a ɵina ɓa Ezekiyas a nafu veglek.

¹³Ezekiyas a yimiɗi morkokai gaini firiyi, a siŋkiɗi hlai na wazagaini na pɗamai aŋ warni ta ta ɗa paŋ: arzaŋ, or, wazagai zi ɗûgûdi zi lûgûzi, itir, wazagaini zi gaw, gaini wazagai n’a na n’amlai warni godaini ɗa paŋ. Wala n’a hina aha war dalamni ta zaw warɗi paini ta n’Ezekiyas a siŋkiŋɗi kai ɗa aŋ kai.

¹⁴Ɗif na mini Alaw Esaya a halasi sini pai Ezekiyas a zilbaŋ a muɗa: ɗai hanɗa e muduku ɓa maɵa ɗa? E hilisi wata par ɗa? Ezekiyas a wiyini seŋ: E hilisi midini afti na gaigai, a Babilon par.

¹⁵Esaya a zilbaŋ pra: n’e tilisi aha war dalamku ɗa a maɗa? Ezekiyas a waya seŋ: Wazagai n’aha war dalamŋa paŋ e tiliŋ paŋ, wala ktai n’a hina amlai war godaiŋa ta na mu siŋkiŋɗi kai ɗa aŋ kai.

¹⁶Nɵa Esaya a miɗini wiini Ezekiyas, EPIƊ-ƊAI a na muɗa suku maini nɵa:

¹⁷Mefeŋ aga a gizi, wazagai n’a na aha war dalamku na paakai na wuzaku par e tipiŋ ka ɗa paŋ, ɗai aga e libiŋ a Babilon sek, wala ktai maa aga a hina piɗi kai, a muɗaŋ ɗa a EPIƊ-ƊAI.

¹⁸Aga e kiɗi pinzibaku gaiɗi aliku na ku wiiɗi ku tuku mal lai, aga e ziɗi aŋ ɗai na kɓarai aha war dalam na wiini pai na Babilon.

¹⁹Ezekiyas a miɗini wiini Esaya: seŋ na wiini EPIƊ-ƊAI na ku muɗaŋa hanɗa a seŋ na gaini futini, a hiinaŋ warni ɓa: war mefeŋ na wiini ɗa ɗai aga e simni war ɵeɗ, hûwyi aga a za kai.

²⁰Labar na midini sdani Ezekiyas n’a zaŋ, kurfukni na war hatam ɗa, ɓili n’a ɓiliti avai ɗa, gaini ɓisi n’a ɓasa arakai n’a ka yem aha war fuŋ n’abai sek ɗa, wazagai hanɗa paŋ ɗa aŋ gaini ɗû war maktuɓ na wiiɗi paakai na Yuda kai ɗi?

²¹Ezekiyas a mra, a hala gaiɗi tamaini, Manase n’ahini a suma pai war balamni.