Read Mousgoum Lokwita n’ag'aŋ sulu na wiiɗi paakai 22 Bible Online

Lokwita n’ag'aŋ sulu na wiiɗi paakai 22 - Mousgoum bible

Lokwita n’ag'aŋ sulu na wiiɗi paakai 22

¹Yosiyas a suma pai sek ɗa buzani mitwis, a buza warɗi pai buza doogo doogo hu pi ktai a Yeruzalem. Emini yikiɗi ɓa: Yedida, t'ahini Adaya n’a Boskat par.

²A paya payai na pɗem wuzani arni EPIƊ-ƊAI, a tikiti te futi na wiini David na tiyni ɵa kal kal, a zaga edi warɗi par duk kai zaŋ.

³War buza n’ag'aŋ doogo pi mitwis na Yosiyas aŋ warɗi pai ɗa, a ɵina sekreter Safaŋ n’ahini Asaliya, n’ahini Mesullam amlai war tempel na wiini EPIƊ-ƊAI, a miɗini:

⁴hala sini Hilkiya pai zi ɓaka n’abai ku miɗini ɓa a pɵa farai na ɗai e kiŋsi burini tempel na wiini EPIƊ-ƊAI na paakai zi ɓaka n’e giɗimi mini hlai e yimiŋ amai ta ɗa, ta ta.

⁵E si farai hanɗa tiɗi n’abakai na midini sdani zizinini tempel na wiini EPIƊ-ƊAI ɗa, kapai e virgiɗi nagai n’e ɗa zi sdani ɗa,

⁶ki siŋɗi wiiɗi ɗai n’e tûki dalam, n’e rgi dalam gaiɗi n’e gɵi alifuŋ ɗa lai, kapai e wirisi luwuŋ gaini alifuŋ n’abakai na e zizini tempel ɗa gaini ɗa.

⁷Ɗif nɵa aga zilba seŋni farai hanɗa tiɗi kai, buri nagai aga e zi gaini war jre.

⁸Hilkiya pai zi ɓaka n’abai a miɗini wiini sekreter Safan: Mu navasi maktuɓ na wiini Ɗû ɗa amlai war tempel na wiini EPIƊ-ƊAI su. Hilkiya a siŋni wiini Safaŋ, Safan a ŋaŋ gaini wulani amai.

⁹Sekreter Safan a wayasi sini pai a miɗini maini nɵa: tiyi ɵeŋku ɗa, mi mili farai na mi niviŋ war kes na wiini tempel ta ɗa, mi siŋɗi tiɗi n’abakai na midini sdani zizinini tempel na wiini EPIƊ-ƊAI ɗa ta.

¹⁰Asakal par sekreter Safan a miɗini wiini pai ɓa: Hilkiya pai zi ɓaka n’abai a saŋasi maktuɓ ktai an na, Safan a ŋaŋ wuzani pai gaini wulani amai.

¹¹Won hlai na pai a ɵina seŋ n’aŋ warni maktuɓ na wiini Ɗû par ɗa a ɓasa sapa na sini ɗa edi, buri ɓa hiinini a turla.

¹²Asakal par a yikasi Hilkiya pai zi ɓaka n’abai gaini Ahikam n’ahini Safan, gaini Akabor n’ahini Mikaia, sekreter Safan gaini Asaia, ktai arbaɗi n’abakai na wiini pai, a miɗiɗi maini nɵa:

¹³Hili ki zilbi dirini EPIƊ-ƊAI buriya, buriɗi ɗai na Yuda paŋ pini seŋ n’aŋ war maktuɓ na e niviŋsi hanɗa; Buri hiy na EPIƊ-ƊAI a zaŋ sumu ɗa a hiy n’abai gara. Buri ɓa tamaimu e zi pini seŋ n’aŋ war maktuɓ hanɗa kai, e zi pini wala n’a ɗo warni kaalai.

¹⁴Hilkiya Pai zi ɓaka n’abai, Ahikam, Akbor, Safan gaini Asaia lai e hili siɗi muni na mini Alaw Hulda, munini Sallum n’ahini Tikva n’ahini Harhas ɗif n’a giɗima sapa n’e zi sda gaini war tempel ɗa. Te sumna a Yeruzalem war kartiye na hehe ɗa. Pai n’abai zi ɓaka gaiɗi marni ɗa e si labar na miɗi wiiɗi muni na mini Alaw ɗa ta. Won hlai n’e vidi gaini seŋɗi li,

¹⁵te wiyiɗi seŋ te muɗa: ki hili ki miɗini wiini pai n’a ɵinikisi sa ɗa ɓa:

¹⁶Epiɗ-ɗai Alaw na wiiɗi Izrayel a na muɗa maini nɵa: aga mu hinasi gir midiɗi Yeruzalem gaiɗi ɗai na warɗi aŋ va seŋ n’aŋ war maktuɓ na pai na Yuda a ŋaŋ na ɗa paŋ amai.

¹⁷Buri ɓa ɗai na Yeruzalem e hiniŋa edi mak, e yi wazagai zi ɗûgûdi zi lûgûzi wiini alawai na zamai, e limiŋa agula gaini sdaɗi n’e ziŋ ɗa paŋ. Tiyana hiyŋa na siɗi Yeruzalem ɗa a za abai ta, aga a tika azumai gobi nɵa tar kai.

¹⁸Amma wiini pai na Yuda n’a ɵinikisi aŋ zilbi dirini EPIƊ-ƊAI ɗa, ki miɗini ɓa Epiɗ-ɗai Alaw na wiiɗi Izrayel a na muɗa maini nɵa: ku ɵina seŋ n’aŋ war maktuɓ hanɗa gaini futini ya,

¹⁹Won hlai na ku ɵina seŋ na mu muɗaŋ midiɗi Yeruzalem gaiɗi ɗai na warɗi ɓa fuŋ n’abai hanɗa aga a bunda aŋ greŋ, aŋ hlai na gaini zi tûûsi lai ɗa, a fuɗuku suku, ku hosasi suku azumai wuza, ku ɓasa sapa na suku edi, ku tuwa wuzani ara lai, nɵa ɗa tiyana Ta ɗe mu ɵina tuwiku ya lai, a miɗi na sini EPIƊ-ƊAI par.

²⁰Buri hanɗa, aga mu hunuku ku mra, ku hala gaiɗi tamaiku azumai war waŋ sek war ɵeɗ. Gir n’aga mu hinaŋsi midiɗi Yeruzalem ɗa arku aga a talaŋ kai. Hilkiya gaiɗi marni e wiyinisi seŋ wiini pai Yosiyas n’a ɵiniɗi ɗa.