Read Mousgoum Lokwita n’ag'aŋ sulu na wiiɗi paakai 24 Bible Online

Lokwita n’ag'aŋ sulu na wiiɗi paakai 24 - Mousgoum bible

Lokwita n’ag'aŋ sulu na wiiɗi paakai 24

¹War mefeŋ na wiini ɗa, Nebukatnezar pai na Babilon a tika afti na Yuda, Yoyakim a hina azumai pini ɵa haa buza hu, asakal par hiinini a bunda pla a faka amai sini.

²Nɵa EPIƊ-ƊAI a ɵina vokɗi ɗai zi vram na Babilon par, na Asiriya par, na Mowab par gaiɗi na war Ammon par lai midini Yoyakim kapai e tûûri afti na Yuda edi maini n’EPIƊ-ƊAI a muɗaŋ war miɗi ɗaini, ɗai na mini Alaw ɗa nɵa.

³Wala hanɗa a za siɗi Yuda ɗa pini miɗi na wiini EPIƊ-ƊAI, kapai a siɗi piɗi Yuda edi wuzani arni par gaigai. A za nɵa buri tuwur na wiini Manase, buri a za wazagai na maafanai viya gara.

⁴Pra, a za nɵa buri a ma felɗi ɗai na tiɗi war seŋ kai edi viya gara haa Yeruzalem paŋ te va gaini fel hanɗa, EPIƊ-ƊAI a firiya a hinini meefeŋ hanɗa kai.

⁵Labar na midini sda na Yoyakim a zaŋ paŋ ɗa aŋ gaini ɗû war maktuɓ na wiiɗi paakai na Yuda ɗa kai ɗi?

⁶Yoyakim a mra, a hala gaiɗi tamaini, Yoyakin n’ahini a suma pai war balamni.

⁷Pai n’Egipte ɗa, a niyasi edi midini aftini par kir kai, buri ɓa pai na Babilon a mula afti n’a naka pini ɗa kafa, sini ra n’Egipte par haa sini ra na Öfrata ta.

⁸Yoyakin a suma pai sek ɗa buzani doogo pi mitwis, a za warɗi pai tile hu aha warɗi Yeruzalem. Emini yikiɗi ɓa: Nehusta, t'ahini Elnatan na Yeruzalem par.

⁹A paya payai na meefeŋ wuzani arni EPIƊ-ƊAI kal kal maini epini nɵa.

¹⁰War mefeŋ ni ɗa, askarai na wiini Nebukatnezar pai na Babilon e hilisi e hitimiti Yeruzalem, e cikiti lai.

¹¹Won hlai n’askaraini e ɗa gûnisi edi par siɗi ɗa, Nebukatnezar pai na Babilon gaini midini dama a halasi a hitimiti.

¹²Nɵa Yoyakin pai na Yuda gaiɗi emini, gaiɗi ɗaini n’abakai, gaiɗi abakaiɗi askaraini lai e niyisi edi war fuŋ n’abai ɗa par e si siɗi wiini pai na Babilon. Pai a miliɗi aŋ ɗai zi daŋgai war buza n’ag'aŋ mitwis n’a na warɗi pai.

¹³A luba wazagai n’amlai war godai na war tempel na wiini EPIƊ-ƊAI gaini n’amlai war godai n’ahani pai ɗa, a gzila wazagai zi or na Salmun pai na Izrayel a zizinaŋ burini tempel na wiini EPIƊ-ƊAI ɗa paŋ edi maini n’EPIƊ-ƊAI a muɗaŋ ɗa nɵa.

¹⁴A kiɗi ɗai na Yeruzalem ɗa paŋ edi aŋ bege: ɗai n’abakai gaiɗi ɗai zi farai, e zi paŋ ɗai dubu doogo. a kiɗi ɗai zi yûri kawakai gaiɗi zi gɵi faiffai e di aŋ bege lai. E hini ɗa, e ɗi ɗai na murgakai tar.

¹⁵A ka Yoyakin aŋ bege a Babilon, emini gaiɗi falakaini, askaraini n’abakai gaiɗi abakai na midini afti lai, a miliɗi a Yeruzalem par a kiɗi a Babilon.

¹⁶Ɗai zi farai ɗa e zi paŋ dubu muguzak, ɗai zi yûri kawakai gaiɗi zi gɵi fai fai e zi dubu ɗaw, ɗai n’e kiɗi e hitimi ta ta ɗa paŋ pai na Babilon a kiɗi aŋ bege a Babilon.

¹⁷Pai na Babilon ɗa a tika tawalni epini Yoyakin na yikini ɓa: Mattaniya aŋ pai ta, a bindini yikini ɓa: Sedesiyas.

¹⁸Sedesiyas a suma sek ɗa buzani caaɓa pi ktai, a buza warɗi pai buza doogo pi ktai aha war Yeruzalem. Emini yikiɗi ɓa: Hamutal t'ahini Yirmeya na Libna par.

¹⁹A paya payai na meefeŋ wuzani arni EPIƊ-ƊAI, kal kal maini Yoyakim nɵa.

²⁰Wala hanɗa a za siɗi Yeruzalem gaiɗi Yuda ɗa maini hanɗa ɵa burini hiy na wiini EPIƊ-ƊAI, haa a tikiɗi piɗi edi wuzani arni par gaigai. Sedesiyas a faka amai sini pai na Babilon.