Read Mousgoum Lokwita n’ag'aŋ sulu na wiiɗi paakai 25 Bible Online

Lokwita n’ag'aŋ sulu na wiiɗi paakai 25 - Mousgoum bible

Lokwita n’ag'aŋ sulu na wiiɗi paakai 25

¹War mefeŋ n’ag'aŋ doogo na wiini tile n’ag'aŋ doogo war buza n’ag'aŋ ɵeeŋe na Sedesiyas aŋ warɗi pai, Nebukadnezar pai na Babilon a halasi gaiɗi askarai na wiini paŋ a Yeruzalem, a pasi miɗi par tiɓ. E libi hlai n’e ŋûyi siɗi duɓani amai, e gûniti Yeruzalem amlai gaini gun.

²te hina gaini ciki ɵa haa sini buza na n’ag'aŋ doogo pi ktai na Sedesiyas aŋ warɗi pai.

³War mefeŋ n’ag'aŋ ɵeeŋe na wiini tile ni ɗa, wiyamai te riya amai siɗi ɗai ɗa abai ta, wala zi simi aha war fuŋ ɗa aŋ kir kai,

⁴Zlaagai na sini fuŋ n’abai ɗa hlaiɗi ktai a ɓasa ɓas, duvuk ɗa, askarai na Yuda e prisi edi war mini magala n’a na arbani ɵaga na sulu gobi sini zardeŋ na wiini pai ɗa, askarai na Babilon e ɗifu anene duɓani fuŋ n’abai par ɵa sa lai, pai Sedesiyas a tikiti futi n’a Araba sek ɗa.

⁵Askarai na Babilon e tiki futi pini pai, e yimiŋ war hlai na plas na Yeriko. Askarai na wiini ɗa gdaŋ te sûwiɗi su e pri edi yaw.

⁶Askarai na Babilon e yimisi pai Sedesiyas, e kiŋ a Ribla wuzani pai na Babilon ɗa a zitini sariya.

⁷E ɵi wulaɗi alini wuzani arni, asakal par pai Nebukatnezar a co arni co co, a rgaŋ gaini jaɓ zi kiya na gdaŋai a kaŋ a Babilon.

⁸War mefeŋ n’ag'aŋ muguzak na wiini tile n’ag'aŋ ɵim, war buza n’ag'aŋ doogo pi ɵeeŋe na Nebukadnezar pai na Babilon aŋ warɗi pai ɗa, Nebuzaradan abaiɗi ɗai n’e giɗimi pai, ɗif zi sda na wiini pai na Babilon a cosi a Yeruzalem.

⁹A ɵa afu pini tempel na wiini EPIƊ-ƊAI gaini dalam na wiini pai, gaini dalamai zamai zamai na Yeruzalem ɗa paŋ lai. A ɵa afu pini dalam na wiiɗi ɗai n’abakai ta ta ɗa lai.

¹⁰Askarai na Babilon par n’e hilisi gaini abaiɗi ɗai n’e giɗimi pai ɗa, e hiɗiti zilaagai na siɗi Yeruzalem ɗa azumai.

¹¹Nebuzaradan abaiɗi ɗai n’e giɗimi pai ɗa, a kiɗi piɗi ɗai n’e hini aha war fuŋ n’abai ɗa aŋ bege war Babilon: nagai n’e si siɗi wiini pai na Babilon, gaiɗi n’e hini piɗi ɗai na Yuda ɗa lai.

¹²Amma a hiniɗika ɗai zamai na murgakai aha midini aftiɗi kapai e pi luwuŋ zi vin, e hirmi vuwai ɗa lai.

¹³Ɗai na Babilon ɗa e hiɗi gaarakai zi kiya n’amlai war tempel na wiini EPIƊ-ƊAI ɗa azumai, e hiɗi Saretai gaini daya n’abai zi kiya n’amlai war tempel na wiini EPIƊ-ƊAI azumai lai. E libi kiya ɗa a Babilon.

¹⁴E mili dumbakai gaini wazagai n’e mili bono edi gaini, gaini muguɗ, gaini kopai gaini wazagai n’e zi sda gaini amlai warni tempel si kiya ɗa paŋ.

¹⁵Abaiɗi ɗai n’e giɗimi pai ɗa a mula wazagai n’e yi wazagai zi ɗûgûdi zi lûgûzi gaini, gaini n’e mi fel zi yiimi warni, z'arzaŋ ɗa lai, zi zi or ɗa lai.

¹⁶Gaarakai na sulu, daya n’abai gaini Saretai na pini na Salmun a zizinaŋ burini tempel na wiini EPIƊ-ƊAI ɗa, kiloni kiyani ɗa a pɵa tini ɗif kai.

¹⁷Gaarakai na sulu, mogoni n’amai sek ɗa metir ɵeeŋ ɵeeŋe, amai par merfeŋni ɗa e rgi wala na midini gaini ɵiri edi na zi kiya na mogoni n’amai sek ɗa metir ɗaw gaini gal gal, wala maini ava ɵa gaini wi sini ɗik ɗik, alini luwuŋ grenade gaini gûni sini gun gun lai, paŋ e ziŋ gaini kiya. Gaarakai na sulu ɗa a rga maini marni ɵa, ava na sini maini marni ɵa lai.

¹⁸Abaiɗi ɗai n’e giɗimi pai ɗa, a yima Seraya pai zi ɓaka n’abai, Sefaniya pai zi ɓaka n’aga wulani, gaiɗi paakai zi ɓaka na hu n’e giɗimi mini tempel ɗa lai.

¹⁹A yima abaiɗi askarai ktai n’e tikiŋ midini sdaɗi askarai, a yima ɗai n’abakai na wiini pai ɵim n’e hini ka aha war fuŋ n’abai, a yima sekreter na miliɗi ɗai na war askar a sa tini ɗa, ɗai zamai na Yuda par gaiɗi doogo doogo ɵaara. Ɗai hanɗa paŋ e ɗifu aha warɗi Yeruzalem.

²⁰Nebuzaradan abaiɗi ɗai n’e giɗimi pai ɗa a ziɗi aŋ ɗai zi daŋgai, a kiɗi wiini pai na Babilon a Ribla.

²¹Pai na Babilon a fiɗiɗi edi a Ribla, midini afti na Hamat. Nɵa ɗai na Yuda ɗa e bindi aŋ bagakai edi gaigai sini aftiɗi par.

²²Amma ɗai na murgakai n’e hini aha midini afti na Yuda ɗa, Nebukadnezar pai na Babilon a tika Gedaliya n’ahini Ahikam, n’ahini Safan ɗa aŋ Lawan midiɗi ta.

²³Won hlai na abakaiɗi askarai gaiɗi ɗai na piɗi e ɵini ɓa pai na Babilon a tika Gedaliya aŋ Lawan ta ɗa, e hilisi sini a Mispa gaiɗi ɗai na piɗi ɗa, e ɗi miɗi: Yismaiel n’ahini Netaniya; Yoha n’aŋ n’ahini Koreya, Seraya n’ahini Tanhumet na Netofa par gaini Yaazaniya na Maaka par lai.

²⁴Gadaliya a miɗiɗi wiiɗi abakaiɗi askarai gaiɗi ɗai na piɗi maini nɵa: ki hûni ɓa aga ki bindi li aŋ bagakai na wiiɗi ɗai na Babilon ɗa kai, wiyisi aha midini afti na Yuda ɗa, ki zi pini miɗi na wiini pai na Babilon ɗa lai, mu miɗiki: wala ktai na meefeŋ aga a za siki kai.

²⁵Amma war tile n’ag'aŋ muguzak na wiini buza ni ɗa, Yismaiel n’ahini Netaniya, n’ahini Elisama n’aŋ war pinziba na wiini pai a halasi a Mispa gaiɗi ɗai pini doogo e fiɗi Gedaliya edi, ɗai na Yuda gaiɗi na Babilon n’e ɗifu gaini a Mispa ɗa lai.

²⁶Nɵa ɗai ɗa paŋ, na agwi kai, na abai kai, abakaiɗi askarai kai paŋ e rivi war Egipte buri e hûniɗi ɗai na Babilon ɗa ta.

²⁷Buza doogo doogo hu pi muguzak, asakal n’e ki Yoyakin edi aŋ bege war Babilon ɗa, war mefeŋ caaɓa pi muguzak na wiini tile n’ag'aŋ doogo pi sulu ɗa, Ewil-Merodak a bunda aŋ pai war Babilon. War buzani dama a za yum sini Yoyakin pai na Yuda, a ɵaŋsi edi warɗi daŋgai par.

²⁸A zaŋ aŋ marmaini ta, a sitini paramaini amai par midiɗi paakai na maini ɵa n’e ɗa gaini war Babilon ɗa paŋ.

²⁹A wiini sapa zi daŋgai na sini ɗa edi, a bunda a suma ɗa gaini pai na Babilon ɗa haa sini mrini ta.

³⁰Hazani na war yuvai yuvai paŋ ɗa a zina pini ɗa a pai na Babilon ɗa, haa sini mrini ta.