Read Mousgoum Lokwita n’ag'aŋ sulu na wiiɗi paakai 6 Bible Online

Lokwita n’ag'aŋ sulu na wiiɗi paakai 6 - Mousgoum bible

Lokwita n’ag'aŋ sulu na wiiɗi paakai 6

¹Mefeŋ ktai, ɗai na mini Alaw e miɗini wiini Aliza: hlai na mu zumu dingumu warni ɗa agwi gara.

²Mi firiyi mi hili agoɗom wulani ra Yurdan ɗif paŋ a blasi luwuŋ tini ktai ktai kapai mi hilisi mi rgi hlai zamai na mu zumu dingumu warni. Aliza a wiyiɗi seŋ: hili wiiki.

³Ktai arbaɗi a siiwaŋ a miɗini: za barka, hala gaiyi lai; Aliza a waya seŋ: pɗem aga mu hala gaiki.

⁴Nɵa a hala gaiɗi, e sû agoɗom war ra Yurdan e tiki piɗi e bili luwuŋ ɗa.

⁵Ktai arbaɗi won hlai n’a na bla luwuŋ na wiini ɗa, beŋel na wiini a rɗa edi bak, a kɵa agoɗom su. A ɗuula a muɗa: mu za maɵa ɗa epin-geza, mu tikaŋsi maa gaini tiki.

⁶Ɗif na wiini Alaw a zilbaŋ a miɗini: a kɵa wata ɗa? A siŋkini hlai n’a kɵa woni ɗa. Aliza a ɗukla luwuŋ ktai a bulaŋ agoɗom su, tizaw tar beŋel ɗa a fanasi amai midini yem.

⁷Aliza a miɗini: te kaŋsi amai: ɗif a wûti tini midini a tikaŋsi.

⁸War sarti na pai na Siriya a naka war hatam gaiɗi aliɗi Izrayel ɗa, a diŋgiɗi ɗai n’abakai na wiini a miɗiɗi: aga mu tika kaŋɗi askaraiŋa woni hlai hanɗa nɵa nɵa.

⁹Ɗif na wiini Alaw a miɗini wiini pai na Izrayel: ku za hangal, hlai hanɗa nɵa nɵa ku vuga woni kai, buri ɓa askarai na Siriya par aga e hilisi e pi woni.

¹⁰Nɵa pai na Izrayel ɗa a ɵina askarai war hlai na ɗif na mini Alaw a siŋkiŋni ca ca. Aliza a zini zaida wiini pai ɵa taŋŋa taŋŋa, pai a sumna kureɗ gaini ziŋi zeŋ. Wala hanɗa a za ɗa azi viya.

¹¹Wala hanɗa a ɓilkini hiinini pai na Siriya gara, a tipiɗi ɗai n’abakai a miɗiɗi: ɗif n’arbamu par na mini aŋ gaini pai na Izrayel ɗa asiya ɗa? Siŋkiŋa yikini nɵa ta haw kai ɗi?

¹²Ktai arbaɗi par a miɗini: a ɗif ktai maa kai pai n’epin-geza, a zaŋ tuku na ɗa a Aliza na ɗif na mini Alaw na Izrayel ɗa, a kiɗa a miɗini seŋku na ku muɗaŋ amlai warɗi dilimiku zi feŋ ɗa wiini pai na Izrayel ɗa;

¹³A muɗa: hili, tili hlai n’aŋ woni ɗa, kapai mu ɵina ɗai e yimiŋŋasi. E miɗini: a n’a Dotan

¹⁴Pai a ɵina plasai, saret zi gaw gaini vokɗi askarai lai e hili e sû woni duvuk e gûni fuŋ n’abai ɗa azumai gun.

¹⁵Sleŋ na wiini ɗif na wiini Alaw a faka amai gorof par a niyasi anene, a tala ɗa askarai e gûni fuŋ n’abai ɗa azumai gun gaini plasai gaini saret zi gaw lai, a miɗini wiini Aliza: Aiya epin-geza, kapai mu zumu maɵa maɵa ɗa?

¹⁶Aliza a wiyini seŋ: ku huna kai, nagai n’e ɗa gaimu par ɗa viya e sûwiɗi n’e piɗi par ɗa.

¹⁷Asakal hanɗa Aliza a siiwa maini nɵa: EPIƊ-ƊAI milini arni edi kapai a tala. EPIƊ-ƊAI a milini arni ɵeŋni Aliza edi, a tiliti huwuŋ na Aliza a sumna midiɗi ɗa, gaini vi ta tini plasai gaini saret zi gaw n’a luma pre pre lai.

¹⁸Askarai na Siriya e niyi aha aŋ yimi Aliza, Aliza a siiwa a muɗa: EPIƊ-ƊAI, arɗi ɗai hanɗa duk, EPIƊ-ƊAI a arɗi maini na Aliza a muɗaŋ ɗa nɵa.

¹⁹Aliza a miɗiɗi: hanɗa te futi ɗa kai, hanɗa a fuŋ n’abai ɗa kaalai, hilisi pa kapai mu kiki piki sini ɗif na ki ɗa piyiŋ ɗa. A kiɗi a Samariya.

²⁰Won hlai n’e niyi li aha war Samariya ɗa, Aliza a muɗa: EPIƊ-ƊAI, miliɗi arɗi ɗai hanɗa edi kapai e tili. EPIƊ-ƊAI, a mala arɗi edi, e tili siɗi ɗa aha war Samariya yaw.

²¹Won hlai na pai na Izrayel a tiliɗi ɗa, a miɗini wiini Aliza: apa, mu fiɗiɗi edi ɗi?

²²A wiyini seŋ: ku fiɗiɗi edi kai, ɗai na ku yuva ku yimiɗisi mini gaw par na ɗa, ku na fiɗiɗi edi ca ca ɗi? Siɗi simi e simi, siɗi yem e ci lai, asakal par ku hiniɗi e wiyi sini pai n’epin-gezaɗi ɗa.

²³Pai a ziɗi simi viya e simi, e ci lai, asakal par a hiniɗi e wiyi sini pai n’epin-gezaɗi. Sini mefeŋ hanɗa par ɗa, ɗai zi virimi wazagai na war Siriya par e bindi e hilisi midini afti na wiiɗi Izrayel kir kai.

²⁴Buza yaw asakal hanɗa par, Ben-Hadad pai na Siriya a tipiɗi askarai na wiini paŋ, a halasi a cikiti Samariya.

²⁵Nɵa wiyamai n’amai te za aha warɗi Samariya, askarai e siki hlai gdaŋ, wala a vuga aha sek kai, haa humokni ablehö ktai ɗa a bunda a suma sulai z'arzaŋ doogo doogo mitwis, galni kilo na wiini a nai sawal ɗaw ɗa a suma sulai z'arzaŋ ɵim.

²⁶Mefeŋ ktai, pai na Izrayel a n’a vuga amai midini ɵaga ɗaw, muni ktai te ɗuulaŋ te miɗini: pai n’epin-gezayi, zina pa ta kai ɗi.

²⁷Pai a wiyiɗi seŋ: na ɓa EPIƊ-ƊAI a zina puku kai ɗa, ta mu kiɗa mu zina puku gaini a maɗa? Gaini algama zaw gaini vin ɗi?

²⁸Pai a miɗiɗi pra: Ku firiya ɗa a maɗa? Te wiyini seŋ: muni hanɗa te muɗaŋa ɓa: mu sa ahiya ɗa, mi limiŋ girna ta, kapai dawai ɗa, mi limi na wiiɗi na lai.

²⁹Mi di ahiya yit mi simiŋ ta, dawaini ɗa mu miɗiɗi ɓa te sasi ahiɗi kapai mi limiŋ ɗa, te ŋoya ahiɗi cok.

³⁰Won hlai na pai a ɵina seŋɗi muni hanɗa, a ɓasa sapa na sini edi, ɗai e tiliɗi pai amai midini ɵaga sek ɗa aŋ gaini sapa zi tuwi amlai par war sapani ca.

³¹Pai a muɗa: na ɓa girna mu ɗukla humokni Aliza n’ahini Safat ɗa edi daf kai ɗa, Alaw a tikaŋa gir mada.

³²Aliza gaiɗi n’abakai n’arbaɗi ɗai, e ɗifu ahani ca, Won hlai na pai a ɵinasi ɗifni na ɗa. Wuzani hlai na ɗif a cosi sini ɗa, Aliza a miɗiɗi wiiɗi n’abakai n’arbaɗi ɗai: tili, zi fiɗi ɗai ɗa a ɵinasi ɗif na ɓa a halasi a ɗukla humokŋa edi daf. A cosi li tar ɗa, ki dûgûsi mini hlai ɗa amai duk, ki hiniŋsi amlai kai. A tuwasi pini par na ɗa ezini epin-gezani lai kai ɗi.

³³Aliza a ɵa mini edi kai hai, Won hlai na ɵeŋ na wiini pai a cosi, a miɗini: gir hanɗa a kaŋsi midiyi na ɗa a EPIƊ-ƊAI, mu baiya zamai tini EPIƊ-ƊAI par ɗa a maɗa?