Read Mousgoum Lokwita n’ag'aŋ sulu na wiiɗi paakai 8 Bible Online

Lokwita n’ag'aŋ sulu na wiiɗi paakai 8 - Mousgoum bible

Lokwita n’ag'aŋ sulu na wiiɗi paakai 8

¹Mefeŋ ktai, Aliza a miɗiɗi wiiɗi muni n’a ɵiyasi ahiɗi amai war mri par ɗa maini nɵa: faka amai, hala, tuku gaini dalamku paŋ, zogo midini afti zamai na ku daraŋ, buri ɓa EPIƊ-ƊAI a na kasi wiyamai midini afti hanɗa, aga a za haa buza muguzak.

²Muni te faka, te za maini na ɗif na mini Alaw a miɗiŋɗi nɵa, te hala na gaini dalamɗi, te zogo midini afti na wiiɗi Filistrekai te sumna woni haa buza muguzak.

³Asakalni buza na muguzak hanɗa par, muni te wayasi edi midini afti na wiiɗi Filistrekai par te hala te siiwa pai buri dalamɗi gaini vuwaiɗi.

⁴Pai a nafu aŋ haɗa kalaŋ gaini Gehazi, ɵeŋ na wiini ɗif na wiini Alaw. A miɗini: muɗaŋa, wazagai n’abakai n’Aliza a zaŋ ɗa haw ɗa.

⁵Gehazi a nafu aŋ virnini seŋ wiini pai, maɵa maɵa ɗa Aliza a ɵiya ahiyagwi amai war mri par. Won hlai n’a na virna seŋ hanɗa, muni n’Aliza a ɵiya ahiɗi amai war mri par ɗa, te halasi te siiwa pai burini dalamɗi gaini vuwaiɗi lai. Gehazi a miɗini: Pai n’epin-geza, muni te na, ahiɗi n’Aliza a ɵiyaŋ amai war mri par ɗa a na lai.

⁶Pai a zilbiti muni ɗa, na te virnini seŋ hanɗa. Nɵa pai a yika ɗifni n’abai ktai a hina seŋɗi paŋ war tini. A miɗini: piyiɗi wazagaiɗi muni hanɗa kafa, virgiɗi warni vuwaiɗi sini mefeŋ na te zogoɗi midini aftimu par haa girna ta.

⁷Mefeŋ ktai Aliza a hala war Damas. War mefeŋni ɗa Ben-hadad pai na Siriya a nafu veglek, ɗai e hili e miɗini wiini pai ɓa: ɗif na wiini Alaw ɗa a cosi co.

⁸Nɵa pai a miɗini wiini Hazayel ɓa: paya katu tuku ta, hala nava gaini ɗif na wiini Alaw ɗa. Ku miɗini a zilba dirini Alaw buriya haw ɗa, aga mu zuula warni veglek hanɗa par tiɓ ɗi?

⁹Hazayel a hala sini Aliza, a kiini wazagai zi like na pɗamai na war Damas par, a libaŋ gaini ɵigini doogo doogo puɗu. A co a ɗiya wuzani Aliza a miɗini: ta mu ɵeŋ na wiini ɵeŋku Ben-Hadad pai na Siriya, a ɵenaŋasi suku ɗa a ni, ɓa ku zilba dirini Alaw burini haw ɗa, aga a zuula mini veglek n’aŋ sini ɗa par tiɓ ɗi?

¹⁰Aliza a wiyini seŋ: aga ku zuula fakat fakat, amma EPIƊ-ƊAI a sinkaŋa ara ɓa, aga a mra fakat.

¹¹Tizaw arni ɗif na wiini Alaw a hina warni hlaini ɵa ca, a muguza kai, asakal par agwi a tika pini a tuwa.

¹²Hazayel a zilbaŋ: epin-geza a tuwa buri maɗa? Aliza a wiyini seŋ: buri mu sɗa meefeŋ n’aga mu ziŋɗi wiiɗi aliɗi Izrayel ɗa, aga ku ya fuŋɗi n’abakai zi ɵaga edi, aga ku fiɗiɗi aliɗi na gawlakai edi gaini kaɵkar, aga ku kirpiɗi aliɗi na koɗokokai, aga ku ɓasa warɗi falakai zi ziyi edi lai.

¹³Hazayel a wiyini seŋ: ta na begeku na ɗa mu siya lai ɗa, ta na hirge hanɗa, mu kiɗa mu za wala na maini nɵa maɵa maɵa ɗa? Aliza a wiyini saŋ: EPIƊ-ƊAI a siŋkaŋa ara ɓa aga ku suma pai midiɗi Siriya.

¹⁴Hazayel a fakasi sini Aliza par, a wayasi sini epin-gezani, epin-gezani a zilbaŋ: Aliza a muɗukusi maɵa ɗa? Haz aiel a wiyini seŋ: a muɗaŋa ɓa aga ku kurɗa.

¹⁵Dawaini Hazayel a mula borgo a ziibaŋ arni yem, a baraŋ arni pai bar kapai suŋfani a wula warni, Ben-Hadad a mra, Hazayel a suma pai war balamni.

¹⁶War buza n’ag'aŋ ɵim na Yoram n’ahini Akab pai na Izrayel aŋ warɗi pai, Yoram n’ahini Yosafat pai na Yuda ɗa a suma pai war Yuda.

¹⁷A suma pai sek ɗa buzani doogo doogo hu pi sulu, a buza warɗi pai aha war Yeruzalem buza mitwis.

¹⁸A tikiti te futi na wiiɗi paakai na wiiɗi Izrayel maini pinzibani Akab ɗa nɵa, buri a tikiti aŋ muni ɗa t'ahini Akab. A za wazagai na maafanai wuzani arni EPIƊ-ƊAI,

¹⁹amma EPIƊ-ƊAI a firiya a tûûriti Yuda edi kai burini David na ɵeŋni, buri a miɗini ya ɓa: pai ɗa aga te suma war pinzibani ɵa haa kureɗ.

²⁰War sarti na wiini ni ɗa, ɗai na Edom e fiki amai siɗi pai na Yuda ɗa, e tiki pai midiɗi ta.

²¹Yoram a faka gaini Saret zi gaw pini a hala war Sayir. War duvuk, ni gaiɗi abakai na midini saret zi gaw ɗa, e rɗi amai midiɗi Edomitekai n’e gûniɗi azumai ɗa, ɗai e pri edi, e rûvi ahaɗi.

²²Amma Edom te hina war fiki n’amai siɗi pai na Yuda ɵa haa girna. War mefeŋ ni ɗa Libna te faka amai siɗi Yuda lai.

²³Labar zamai na midini sdani Yoram ɗa, aŋ gaini ɗû war maktuɓ na wiiɗi paakai na Yuda kai ɗi?

²⁴Yoram a mra, e piŋ gaiɗi tamaini war fuŋ n’abai na wiini David, Akaziyas n’ahini a suma pai war balamni.

²⁵War buza n’ag'aŋ doogo pi sulu na Yoram n’ahini Akab pai na Izrayel aŋ warɗi pai ɗa, Akaziyas n’ahini Yoram pai na Yuda a simiti pai.

²⁶A suma pai sek na ɗa buzani caaɓa pi sulu. A buza warɗi pai aha war Yeruzalem buza ktai. Emini yikiɗi ɓa: Atali t'ahini Omri pai na Izrayel.

²⁷A tikiti te futi na wiini pinzibani Akab ɗa, a za wazagai na maafanai wuzani arni EPIƊ-ƊAI maini pinzibani Akab ɗa nɵa, buri ɓa ni lai a za zigel gaini pinziba hanɗa war tiki.

²⁸A hala pini Yoram n’ahini Akab ɗa, aŋ hitimi gaini Hazayel pai na Siriya ɗa war Ramot na war Galaad, amma ɗai na Siriya e zini wuruk wiini Yoram ta.

²⁹Yoram a wayasi war Yizreyel aŋ zuula wurukni na ɗai na Siriya e ziŋni war Ramot, war hlai n’a nafu aŋ hitima gaini Hazayel pai na Siriya ɗa. Nɵa Akaziyas n’ahini Yoram pai na Yuda ɗa a hala a Yizreyel aŋ ɗugula Yoram n’ahini Akab buri ɓa sini a nafu gdaŋ.