Read Mousgoum Lokwita n’ag'aŋ sulu na wiiɗi paakai 9 Bible Online

Lokwita n’ag'aŋ sulu na wiiɗi paakai 9 - Mousgoum bible

Lokwita n’ag'aŋ sulu na wiiɗi paakai 9

¹Mefeŋ ktai, Aliza a yika gawla ktai arbaɗi vokɗi ɗai na mini Alaw a miɗini: zizina suku, tikiti gagazai z'emel n’e miŋ midiɗi ɗai n’agwi hanɗa tuku ɗaw, hala war Ramot na war Galaad.

²Ku co li woni ɗa, ku paya futi aŋ nava gaini Yehu n’ahini Yosafat, n’ahini Nimsi. Ku navaŋ li ɗa, ku ɗiyaŋ amai arbaɗi marni zaw, asakal par ku kaŋ warɗi dilimi n’amlai par piɗi marɗi ɗa.

³Ku tikiti gagazai z'emel n’e miŋ midiɗi ɗai n’agwi ɗa, ku mini emel midini, ku miɗini ɓa: EPIƊ-ƊAI a na muɗa maini nɵa: gaini mini emel hanɗa, mu zuku aŋ pai midiɗi Izrayel. Asakal par ku mala mini hlai edi, ku lawa wiiku, ku baiya kir kai.

⁴Gawla na ɗif na mini Alaw, a faka a hala war Ramot na war Galaad.

⁵Won hlai n’a co ɗa, a niviɗi abakaiɗi askarai azumai midiɗi marɗi ta, a muɗa: ɗif n’abai, seŋ ktai aŋ ma, Yehu a miɗini: ku firiya ku miɗiŋni wiini asiya ɗa? A wiyini seŋ: wiiku tuku, ɗif n’abai.

⁶Yehu a faka amai, a hala gaini amlai warɗi dilimi ɗa. Gawla na ɗif na mini Alaw a mini emel midini a muɗa: Epiɗ-ɗai Alaw na wiiɗi Izrayel a na muɗa maini nɵa: gaini mini emel hanɗa mu zuku aŋ pai midiɗi ɗai na wiini EPIƊ-ƊAI, n’e yikiɗi zamai ɓa " Izrayel".

⁷Aga ku fiɗiɗi pinzibani Akab n’epini gezaku edi, aga mu vurga felɗi ɗaiŋa na mini Alaw gaini felɗi ɗai zamai zi sda na wiini EPIƊ-ƊAI na Yezabel na munini te fiɗiɗi edi.

⁸Pinzibani Akab ɗa paŋ aga e nivi fiɗi n’edi, aga mu vidiɗi ɗai na maɵagai na war pinzibani paŋ ɗa edi, na kempekai gaiɗi na bagakai lai.

⁹Aga mu za sini pinzibani Akab ɗa kal-kal maini na mu zaŋ sini pinzibani Yerobowam n’ahini Nebat gaini pinzibani Basa n’ahini Ahiyya ɗa nɵa.

¹⁰Amma Yezabel ɗa hirgakai aga a limiti war zardeŋɗi na Yizreyel ɗa, ɗif aga a piti kai. Asakal par a mala mini hlai edi a lawa wiini.

¹¹Yehu a niyasi anene siɗi marni n’abakaiɗi askarai na wiini pai ɗa, nagai e zilbiŋ e miɗini: maɵa! arwai ɗa a halasi suku ɵa jam ɗa tiɓ! a wiyiɗi seŋ: jam, ɗai nagai tiki ki siɗiɗi, seŋɗi n’e miɗiŋ ɗa ɗe ki siɗiŋ ya lai.

¹²E miɗini: ku rha ɗa a muku, miɗiyi seŋ n’a muɗuŋku ɗa. Yehu a wiyiɗi seŋ: a muɗaŋa seŋ viya, amma abaini ɓa: EPIƊ-ƊAI ɓa gaini mini emel hanɗa a firiya a zaŋa aŋ pai midiɗi Izrayel.

¹³Won hlaini tizaw, abakaiɗi askarai e wi kaput na siɗi edi, e biriŋ azumai ezini midini ɓok ɗa bar bar, e tiki piɗi e yibi fana e miɗi: Yehu ɗa a pai.

¹⁴Yehu n’ahini Yosafat, n’ahini Nimsi a rga warni aŋ zini meefeŋ wiini Yoram, war mefeŋ ni ɗa Yoram gaiɗi ɗai na Izrayel paŋ e ɗifu war hatam gaini Azaiel pai na Siriya piɗi Ramot na war Galaad.

¹⁵Ɗai na Siriya e zini wuruk wiini Yoram. Yoram a hala a Yizreyel aŋ zuula wuruk n’a navaŋ mini hatam n’a zaŋ gaini Azaiel pai na Siriya ɗa. Yehu a miɗiɗi wiiɗi abakaiɗi askarai maini nɵa: na ɓa warki aŋ gaya ɗa, arbaki par ɗa ɗif nɵa a niya edi war fuŋ n’abai ɗa par aŋ ka labarni wala n’a za hanɗa war Yizreyel kai.

¹⁶Yehu a niya warni Saretni zi gaw a hala a Yizreyel. Yoram a nafu midini li gaini fini waŋ, Akaziyas pai na Yuda a halasi sini aŋ ɗugulaŋ lai.

¹⁷Ɗif n’a giɗima amai midini poriyo na Yizreyel ɗa a tala vokɗi ɗai na wiini Yehu a na halasi, a muɗa: vokɗi ɗai a n’a halasi. Yoram a muɗa: yika ɗif zi plis ktai, ɵinaŋ miɗi kapai a zilbiɗi haw, e hilisi na ɗa jam tiɓ ɗi?

¹⁸Ɗif zi plis a hala miɗi ɗai hanɗa, a miɗiɗi: pai ɓa ki hilisi na ɗa jam tiɓ? Yehu a wiyini seŋ a muɗa: jaaku maa, bundaɗi arku, ɵaasi piyi. Ɗif n’a giɗima amai midiɗi poriyo ɗa a sa labar aha sek ɓa: ɗif ɗa a co siɗi ya sme amma a wayasi kai.

¹⁹Pai a waya a ɵina ɗif zi plis zamai pra a hala haa siɗi ta a zilbiɗi, pai ɓa ki hilisi na ɗa jam tiɓ ɗi? Yehu a wiyini seŋ: jaaku maa, bundaɗi arku, ɵaasi piyi.

²⁰Ɗif n’a giɗima amai midiɗi poriyo ɗa a sa labar aha sek ɓa: ɗif ɗa a co siɗi ya, amma a na wayasi kai pra. Deɓar na ɗai e dibirisi na ɗa a tala maini na wiini Yehu n’ahini Nimsi ɗa ɵa, buri e dibiri ɗa a gdaŋ gara.

²¹Yoram a muɗa: ziziniŋa Saretŋa ɗa, e ziziniŋni lai. Yoram pai na Izrayel gaini Akaziyas pai na Yuda, e niyisi edi mini Yehu, ɗif paŋ midini Saretni dam dam, e nivi gaiɗi marɗi edi war vuwai na wiini Nabot na Yizreyel.

²²War hlai na Yoram a tala Yehu tar ɗa a zilbaŋ: ku halasi ɵa jam tiɓ ɗi Yehu? Yehu a wiyini seŋ: a jam na maɵa maɵa ɗa? Yezabel na amuku siɗi aŋ hurga azumai wuzaɗi alawai na zamai ɗa ɵa, aŋ zilba gaini evek ɵa na ɗa, ku na sɗaŋ kai ɗi?

²³Yoram a bunda arni plisni aŋ pri edi, a miɗini wiini Akaziyas: Akaziyas ku za hangal, ɗai e kitisi miɗi mada ta.

²⁴Yehu a tikiti ɓurwiini a ɵeɓaŋ, ɓurwi te yimaŋ sini kerpeɵni, te sûti agulni haa te niyasi edi. Yoram a kɵa azumai warni Saretni, a mra.

²⁵Yehu a miɗini wiini Bidkar ɗif n’a ɵa wuzani plisni: tika kopoŋni, blaŋ war vuwai na wiini Nabot na Yizreyel ɗa. Hina muduku a kɵa ɓa, hlai na tuku gaya ta, mu ɗumu kaa pini Akab ɗa, EPIƊ-ƊAI a muɗa seŋ ktai sini maini nɵa:

²⁶EPIƊ-ƊAI a muɗa: gobi na ɗa, mu tuluku ku fuɗa Nabot gaiɗi alini edi, Sda hanɗa Ta aga mu zilbaŋ war tuku war vuwai hanɗa dama, a miɗi na sini EPIƊ-ƊAI par. Nɵa ɗa, tika kopoŋni Yoram ɗa, bulaŋɗi edi war vuwai hanɗa, pini miɗi n’EPIƊ-ƊAI a muɗaŋ ɗa.

²⁷Won hlai na Akaziyas pai na Yuda a tala hanɗa, a tikiti futi na Bet-Gan aŋ pra edi, Yehu a tika futi pini a muɗa: fiɗi ni edi lai, e zini wuruk amai war Saretni warɗi futi na te hala amai a Gur sek gobi gaiɗi Ybleyam. Alawa haa a Megido a mra woni.

²⁸Ɗaini e libiŋsi gaini Saret a Yeruzalem, e piŋ war waŋni gaiɗi tamaini war fuŋ n’abai na wiini David.

²⁹Akaziyas a bunda aŋ pai midiɗi Yuda ɗa war buza n’ag'aŋ doogo pi ktai na Yoram n’ahini Akab aŋ warɗi pai.

³⁰Yehu a nafu gobi aŋ niya aha warɗi Izrayel, Yezabel te ɵina ɓa, te girda wala pini arɗi, te zizina ayir na midiɗi lai, asakal par te wasi midiɗi anene arni fenetir ɗaw te talasi azumai sek.

³¹Won hlai na Yehu a firiya a tikasi ezini aha mini magalani fuŋ n’abai sek ɗa, Yezabel te miɗini: jam tiɓ, Zimri n’a fuɗa epini gezani.

³²A ɵa arni amai a ɗuula a muɗa: n’a firiya a tapa gaya ɗa asiya ɗa, asiya ɗa? Ɗai na kɓarai na ahani pai azi sulu, hu, e wisi midiɗi arni fenetir e tiliŋsi azumai sek.

³³A miɗiɗi: Bilitisi Yezabel azumai. E bilitisi azumai lai, felɗi a cirɗa amai sini ɵaga gaini plasai, Yehu a kirpiti azumai gaini Saretni lai.

³⁴A niya aha a suma, a ca lai, asakal par a muɗa: hili ziziniti adivi na mafuni hanɗa azumai ta buri na t'ahini pai lai.

³⁵E hili aŋ piti, amma e nivi ɗa a humok, azi gaini ti lai.

³⁶E wiyisi e miɗini wiini Yehu. Yehu a muɗa: hanɗa a seŋ n’EPIƊ-ƊAI a muɗaŋ war mini ɗif na mini Alaw Eliyas na Tisbe par ɓa: hirgakai aga a luma neŋɗi Yezabel war vuwai na Izrayel ɗa.

³⁷Kopoŋɗi Yezabel ɗa aga a bunda aŋ zilgit n’e kûŋ edi war vuwai, war vuwai na Yizreyel, ɗif a kiɗa a muɗa ɓa hanɗa te Yezabel kir kai.