Read Mousgoum Labar na war yivai n’avut 12 Bible Online

Labar na war yivai n’avut 12 - Mousgoum bible

Labar na war yivai n’avut 12

¹War mefeŋ a naka aŋ ŋoya wuzani Sawul n’ahini Kis war Siglag, ɗai zamai e hilisi pini buri e zini pini war hatam, e ɗi askarai na agulɗi a huna kai, e si siɗi edi ta mini hatam.

²E ɗi ɗai na gaini ɓaraw, viliyu lai tiɗi; gaini tiɗi sulu paŋ e kiɗi e ɵiɓi ɓaraw, e bili viliyu lai, arbaɗi ɗai zamai e ɗi zegalakaini Sawul tar war pini Benyamin, e ɗi miɗi:

³Ahiyezer n’abaiɗi gaini Yowas n’ahini Sema na Gibiya par, Yeziyel gaini Pelet alini Asmewet, Beraka gaini Yehu na Anatot par,

⁴Yismaia na war Gabawon par a ɗif na agulni a huna kai, ɗai pini hu,

⁵Irmeya, Yazyel, Yoha n’aŋ gaini Yosabad na Gedera par,

⁶Elusai, Yerimot, Beyaliya, Semariyahu gaini Sefatiyahu na Huruf par,

⁷Elka na, Yisiyahu, Asarel, Yowezer gaini Yasobeham na war pinzibani Kora,

⁸Yoweba gaini Zebadiya n’ahini Yeroham na Gedor par lai.

⁹Ɗai zamai war pinzibani Gat e ɗuklisi edi e hili pini David, e simni gaini war hlai zi ŋoyai edi war basga na kaɗataŋ, e ɗi ɗai na agulɗi a huna kai, n’e hitri ya midini hatam, e ɗi gaini gamar gaini kawakai lai war tiɗi, agulɗi a huna kai maini gurnai nɵa, kokolakai maini widre na sini huwuŋ nɵa lai.

¹⁰Ezer ɗa a abaiɗi, Obadiya aga wulani, Eliyab a na ag'aŋ hu,

¹¹Misma n’a na ag'aŋ puɗu, Yirmeya a na ag'aŋ ɵim,

¹²Atai a na ag'aŋ ɵaara, Eliyel a na ag'aŋ muguzak,

¹³Yoaha n’aŋ a na ag'aŋ mitwis, Elsabad a na gaŋ ɵeeŋe,

¹⁴Yirmeyehu a na gaŋ, Makbannai a na gaŋ a na ag'aŋ pi ktai.

¹⁵Hanɗa e ɗi abakaiɗi askarai na war pinzibani Gat, n’agwi arbaɗi a ŋa midiɗi askarai miya ɗaw, n’abai arbaɗi a ŋa midiɗi askarai dubu ɗaw lai.

¹⁶E ɗi nagai n’e vidi ra na Yurdaŋ amai war tile n’avut war hlai na yem a tika amai haa a huŋva edi midini daŋ, ɵimiɗi ɗai n’e simni warni huduk na ɵimani piɗi futi na koskoi sek gaiɗi na dawai par paŋ.

¹⁷Ɗai zamai na war pinzibani Benyamin gaini Yuda lai e hilisi sini David war hlaini zi ŋoyai,

¹⁸David a niyasi annini miɗi a miɗiɗi: na ɓa ki hilisi sa na war ɵeɗ, aŋ zini pa lai ɗa, aga mu yimiki sa gaiɗi agula paŋ, amma na ɓa hiliki ɗa a hili zi rhai kapai ki siŋa tiɗi gawŋa paŋ ktai ta a tetema wala na meefeŋ kai, Alaw na wiiɗi tamaimu a zaida, aga a ziti sariya hanɗa.

¹⁹Nɵa seze na wiini Alaw a niya warni Amasai abaini vok n’askarai warni hu, a muɗa: tiyi mi ɗi ɗaiku David, tiyi mi ɗi ɗaiku ahini Esai, ɵeɗ a sumna muduku, ɵeɗ midini ni n’a zina puku, David a yimiɗi sini, a ziɗi aŋ abakai arbaɗi vokɗi askaraini.

²⁰Ɗai zamai war pinzibani Manase par e hili pini David, Won hlai n’a halasi gaiɗi Filistrekai aŋ hitimi Sawul. Amma David gaiɗi ɗaini e kiɗi e zni piɗi Filistrekai kai buri war kitini mi na wiiɗi abakaiɗi Filistrekai, e siki David edi sak ɓa a hitima gaiɗi kai, e miɗi aga David a fuɗumu tumu edi kafa kapai a tapa arbani gaini Sawul n’epigezani.

²¹Won hlai na David a hala war Siglag, ɗai na war pinzibani Manase e tipi gaini, e ɗi miɗi: Adna, Yosabad, Mikayel, Yozabad, Elihu gaini Cilletai, nagai paŋ e ɗi abakaiɗi askarai n’e ŋi midiɗi askarai na dubu ɗaw ɗaw war pinzibani Manase,

²²E ɗi nagai n’e zni pini David gaiɗi vok na wiini buri nagai paŋ e ɗi ɗai na agulɗi a huna kai, e bindi aŋ bagakai arbaɗi askarai na wiini.

²³Mefeŋ paŋ ɗa ɗai e hilisi sini David aŋ zni pini, haa vokɗi askarai na wiini e bindi viya maini vokɗi askarai na wiini Alaw nɵa.

²⁴Pɵaɗi ɗai n’e zizini siɗi mini hatam, n’e hilisi pini David war Hebron aŋ sitini pai na wiini Sawul pini miɗi na wiini EPIƊ-ƊAI a na maini nɵa:

²⁵War pinzibani Yuda, askarai na gaini gamar, gaini kawai lai tiɗi e ɗa ɗai dubu ɵaara gaini miya mitwis,

²⁶War pinzibani Simeyon, askarai na agulɗi a huna kai ɗai dubu muguzak gaini miya ɗaw,

²⁷war pinzibani Levi, askarai dubu puɗu gaini miya ɵaara,

²⁸gaini Yoyada abaini pinzibani Aaron, gaiɗi ɗai pini dubu hu gaini miya muguzak lai.

²⁹Gaini Sadok gawla zi hatam na agulni a huna kai gaiɗi ɗai n’abakai caaɓa pi sulu na war pinzibani par lai.

³⁰War pinzibani Benyamin, na zagalakaini Sawul tar askarai dubu hu na haa sini mefeŋ ni ta, abaiɗi e ɗifu war sda na ahani Sawul.

³¹War pinzibani Efrayim, ɗai na agulɗi a huna na yikiɗi a wa gara arbaɗi pinzibaɗi lai ɗa askarai dubu caaɓa gaini miya mitwis.

³²War galni pinzibani Manse na war piɗi futi na koskoi sek, askarai dubu pi mitwis n’e virisi edi gaini yikiɗi yikiɗi buri e hilisi e tiki David aŋ pai.

³³War pinzibani Isakar, n’e siɗi ɓrawni hlai kapai e siŋkiɗi wiiɗi aliɗi Izrayel wala n’e siɗi e ziŋ, askarai n’abakai miya sulu gaiɗi nagai n’e ɗa pini paŋ lai.

³⁴War pinzibani Zabulon, askarai na siɗi gaini si edi ta mini hatam gaini wazagaiɗi zi hatam, na agulɗi pal ɗai dubu ɵim.

³⁵War pinzibani Neftali, abakaiɗi askarai dubu ɗaw, askarai na piɗi hu pi muguzak, gaini gamar gaini kawakai lai tiɗi.

³⁶War pinzibani Dan, askarai dubu caaɓa pi mitwis gaini miya ɵaara siɗi gaini zizini mini hatam.

³⁷War pinzibani Aser askarai dubu puɗu gaini zizini mini hatam.

³⁸Anene duɓani ra na Yurdan par, war pinzibani Ruben, Gat gaini galni pinzibani Manase lai, asakarai dubu miya gaini caaɓa gaini wazagaiɗi zi gaw paŋ tiɗi.

³⁹Askarai zi hatam hanɗa paŋ, na siɗi gaini si edi ta mini hatam, e hilisi gaini hiini ktai war Hebron aŋ tiki David aŋ pai midiɗi Izrayel paŋ, aliɗi Izrayel na zamai ɗa paŋ e hilisi gaini nhiini ktai lai ɓa e tiki David aŋ pai.

⁴⁰E simni gaini David woni haa mefeŋ hu, e simi, e si wazagai paŋ na tawalakaiɗi na war Hebron e ziziniŋ buriɗi ɗa.

⁴¹Ɗai na war hlai ni par haa sini afti na wiini Isakar, na wiini Zabulon gaini Neftali lai e libisi wazagai zi simi viya midini Ablehökai, Zligini, midini Plasai Atoŋo gaini garakai lai. E libisi avudi, gamla na wiini alini luwuŋ Fige, alini luwuŋ zi vin na hûleŋ, vin, emel, wazagai n’e zini puɗu puɗu n’abakai gaini n’agogoi lai viya kadai, buri firiyi n’abai a nafu aha war Izrayel.