Read Mousgoum Labar na war yivai n’avut 13 Bible Online

Labar na war yivai n’avut 13 - Mousgoum bible

Labar na war yivai n’avut 13

¹David a za diŋgi gaiɗi n’abakai na midini vokɗi askarai na dubu dubu gaiɗi na miya miya gaiɗi zi spak paŋ lai;

²Asakal par a miɗiɗi wiiɗi vokɗi Izrayel paŋ, na ɓa wala hanɗa a tala arki pɗem, na ɓa a na sini Epiɗ-ɗai Alaw na wiimu par lai ɗa, ɵunumu ɗai piɗi tawalakaimu n’e hinisi aha midini afti na wiiɗi Izrayel paŋ, paakai zi ɓaka gaiɗi levitekai n’e ɗa warni fuŋɗi n’abakai lai kapai e diŋgi gaimu.

³Mu hulumu mu tukumusi Zunduk na wiini Alaw na wiimu, mu wuyunmusi aha buri war mefeŋ na Sawul a naka aŋ pai mu tukumu hangalmu sini kai.

⁴Dingi a yima seŋ hanɗa gaini firiyi buri wala hanɗa a yima hiiniɗi ɗai gara.

⁵David a tipiɗisi aliɗi Izrayel azumai kafa, sini haga n’amai par na gaiɗi Egipte par haa aha miɗi Lebo-Hamat war gal n’azumai sek ta, kapai e hili e tikisi Zunduk na wiini Alaw war Kiriyat-Yeyarim par.

⁶David a hala gaiɗi aliɗi Izrayel paŋ war Baala a dara a muɗa Kiryat Yeyarim na te na war Yuda kapai e tikisi Zunduk na wiini Alaw EPIƊ-ƊAI n’a sumna amai midiɗi Kerubimkai, won hlai n’e ɗa yiki yikini woni.

⁷Zunduk na wiini Alaw a nafu ahani Abinadab, e tikiŋ amai warni Saret na hehe ta, Uzza gaini Ahiyo e hilisi gaini.

⁸David gaiɗi aliɗi Izrayel paŋ e didimi gaini gdaŋɗi paŋ wuzani Alaw, e zini yama gaini gaŋgraŋ, gaini adill, gaini gaŋga gaini kawai n’a wa gaini fana lai.

⁹Won hlai n’e cûsi gobi sini luluf na wiini Kidon, ezini ɵaakai a sirɓa, nɵa Zunduk na wiini EPIƊ-ƊAI a dara a kɵa, Uzza a wa tini aŋ cakaŋ amai,

¹⁰nɵa EPIƊ-ƊAI a za hiy n’abai sini a fuɗaŋ edi, buri a wa tini mini Zunduk ɗa, a mra wuzani Alaw woni hlai ni ɗa.

¹¹Hangalni David a tuura viya gara sini EPIƊ-ƊAI, buri baŋa n’a ɵa gaini mrini Uzza. Haa girna hlai hanɗa e yikiŋ ɓa ɓaŋa na wiini Uzza.

¹²War mefeŋ ni ɗa, David a bunda muhunai wuzani Alaw, a muɗa: Zunduk na wiini Alaw hanɗa kapai mu kaŋ a haia maɵa maɵa ɗa?

¹³nɵa David a kaŋ ahani war fuŋ n’abai na wiini David ɗe kir kai, amma a tikaŋ ka ahani Obed-Edom na Gat ɗe ta.

¹⁴Zunduk na wiini Alaw a hina ahani Obed-Edom aha war dalamni haa tile hu. EPIƊ-ƊAI a ɓaka dalamni gaini wazagaini paŋ lai.