Read Mousgoum Labar na war yivai n’avut 15 Bible Online

Labar na war yivai n’avut 15 - Mousgoum bible

Labar na war yivai n’avut 15

¹David a rga dalam viya war fuŋ n’abai na wiini David, a zizina hlai ktai ta burini Zunduk na wiini Alaw, a pini gumu tiɓ lai.

²nɵa a muɗa, libini Zunduk na wiini Alaw hanɗa e libiŋ ɗa e ɗi levitekai kiiɗi, buri EPIƊ-ƊAI a viriɗisi edi ɗaw buri e libi Zunduk na wiini EPIƊ-ƊAI lai, e zi ɵeŋ na wiini EPIƊ-ƊAI lai haa kureɗ.

³David a tipiɗi aliɗi Izrayel paŋ aha war Yeruzalem kapai a zogosi Zunduk na wiini EPIƊ-ƊAI war hlai n’a zezenaŋ burini.

⁴A tipiɗi paakai zi ɓaka na war pinzibani Aaron gaiɗi Levitkai paŋ,

⁵War pinzibani Kehat, abaiɗi a Uriyel, tawalakaini zamai lai e zi paŋ: 120;

⁶War pinzibani Merari, abaiɗi a Asaia tawalakaini zamai lai e zi paŋ 220;

⁷War£pinzibani Gerson, abaiɗi a Yuwel, tawalakaini zamai lai e zi paŋ 130;

⁸War pinzibani Elisafan, abaiɗi Asemaia gaini tawalakai zamai paŋ 200;

⁹War pinzibani Hebron, abaiɗi Eliyel, tawalakaini zamai lai 80;

¹⁰War pinzibani Uzziyel, abaiɗi a Amminadab gaiɗi tawakaini paŋ 112.

¹¹David a yikiɗi paakai zi ɓaka, Sadok gaini Abiyatar, gaini Uriyel, Asaia, Yuwel, Semaya, Eliyel, Amminadab na Levitkai lai.

¹²A miɗiɗi: tiki ki ɗi n’abakai war pinzibani Levi, zi siki edi sɗik, tiki gaiɗi tawalakaiki paŋ, hili tikisi Zunduk na wiini Epiɗ-ɗai Alaw na wiiɗi Izrayel, kiŋsi war hlai na mu zezenaŋ burini.

¹³Buri ɓa azi n’avut ki ɗifu kai; Epiɗ-ɗai Alaw na wiimu a ziyi gir buri mi hili aŋ tikiŋsi maini na gadai a ɗiyaŋ ɵa kai.

¹⁴nɵa Paakai zi ɓaka gaiɗi Levitkai e zi siɗi edi sɗik kapai e hili e tikisi Zunduk na wiini Epiɗ-ɗai Alaw na wiiɗi Izrayel.

¹⁵Maini na Musus a gada midini pini seŋ na wiini EPIƊ-ƊAI nɵa, levitekai e libi Zunduk na wiini Alaw amai wulaɗi ta gaini saga.

¹⁶David a miɗiɗi wiiɗi abakaiɗi levitekai buri e miliɗi tawalakaiɗi war sdaɗi, nagai zi zini yama gaini wazagai zi zini yama tiɗi, maini: adill, gaŋgraŋ gaini kawai n’a tuwa kapai gaini e zini yama gaini gdanɗi, aŋ siŋka firyiɗi edi.

¹⁷Levitkai e sini sda wiini Heman n’ahini Yuwel, wiini maini zi sda Asaf n’ahini Berekiyahu, pra wiini Etam n’ahini Kusaiahu war piɗi humunini Merari.

¹⁸E miliɗi tawalakaiɗi zamai n’e gi wulaɗi na nagai e ŋi midiɗi lai maini: Zekariyahu, Ben, Yaaziyel, Semiramot; Yehiyel, Unni, Eliyab, Benaniyahu, Maaseyahu, Mattitiyahu, Eliflehu, migneyahu, Obed-Edom gaini Yehiyel ɗai zi giɗimi mini magala lai.

¹⁹Arbaɗi nagai zi zini yama ɗa: Heman, Asaf gaini Etan, e ɵiɓi kawai n’a wa zi kiya lai.

²⁰Sakariyas, Aziyel, Semiramot, Yehiyel, Unni, Eliyab, Maseya gaini Beneya lai e ɵiɓi adill na wulani a wa geleŋ ɗa.

²¹Matiyahu, Eliflehu, Mikneyahu, Obed-Edom, Yehiyel gaini Azaziyahu lai e ɵiɓi adill na wulani hulum ɗa, na sogomni mitwis, e ɵi wuzaɗi nagai n’e zini yama.

²²Keneniyahu n’abaiɗi levitekai n’e libi Zunduk a kata sdani libini buri a sɗa futini ya.

²³Berekiya gaini Elka na e ɗi nagai n’e giɗimi mini magala na wiini Zunduk ɗa.

²⁴Obed-Edom gaini Yehiya lai. Baniyahu, Yosafat, Neteneyel, Amasai, Sakariyahu, Benaniyahu gaini Eliyeser na paakai zi ɓaka e pɵi fana wuzani Zunduk na wiini Alaw.

²⁵David gaiɗi n’abakai n’arbaɗi Izrayel, gaiɗi n’abakai n’e ɵi wuzaɗi askarai na dubu e hili aŋ tikisi Zunduk zi bonu na wiini EPIƊ-ƊAI ahani Obed-Edom par war firiyi.

²⁶Alaw a zina piɗi levitekai n’e libi Zunduk zi bonu na wiini EPIƊ-ƊAI ɗa, nɵa e zi ɓaka zi tese gaini garakai muguzak lai, gaini adumai gamalaki muguzak lai.

²⁷David gaiɗi levitekai lai e libi Zunduk paŋ gaiɗi ɗai zi zini yama, gaini Ka naniya n’abaini sdani wala zi libi e wi sapa zi leŋ na gaini futini siɗi, David a nafu gaini sapa zi leŋ na wiiɗi paakai zi ɓaka sini ɵew

²⁸Aliɗi Izrayel paŋ e kisi Zunduk zi bonu na wiini EPIƊ-ƊAI aha warɗi Yeruzalem, arbani leŋi-leŋi, gaini tuwini miyok, fana zi pɵi, gaini kawai n’a tuwa lai, gaini adill gaini gaŋgraŋ lai.

²⁹Won hlai na Zunduk zi bonu na wiini EPIƊ-ƊAI a cosi aha war fuŋ n’abai na wiini David, Mikal n’ahini Sawul te yimasi arɗi arni fenetir, te tala pai David a na pra amai, a dedema lai gaini firiyi, te tirkaŋ warɗi agulɗi.