Read Mousgoum Labar na war yivai n’avut 16 Bible Online

Labar na war yivai n’avut 16 - Mousgoum bible

Labar na war yivai n’avut 16

¹E ki Zunduk na wiini Alawi amlai warni gumu na David a zizinaŋ burini ɗa. Asakal par e zi ɓaka zi yi gaini ɓaka wi ɵeɗ lai wiini Alaw.

²Won hlai na David a vada gaini zini ɓaka zi yi gaini ɓaka zi ɵeŋ li lai a ɓikiɗi ɗai war yikini EPIƊ-ƊAI.

³Asakal par David a ɓirwiɗi wazagai zi simi wiiɗi aliɗi Izrayel paŋ, wus paŋ zaw muni paŋ, a nava peŋ na wula ktai, gato zi tumun ktai gaini gato na gaini alini luwuŋ zi vin na hûlrŋ ktai lai.

⁴David a miliɗi levitekai zamai n’e ɗa war sda wuzani Zunduk na wiini EPIƊ-ƊAI kapai e hini midiɗi a kɵa gaini Epiɗ-ɗai Alaw na wiiɗi Izrayel kapai e sini kol e kûliŋ gaini yama lai.

⁵Asaf abaiɗi n’a ɵa wuzaɗi, n’aga wulani a Sakariyas, Aziyel, Semiramot, Yehiyel, Mattitiya, Eliyab, Benaniyahu. Obed-Edom gaini Yehiyel ɗa e ɵiɓi adill gaini gaŋgraŋ, Asaf a ɵiɓa kawai n’a wa lai.

⁶Benaniyahu gaini yahaziyel na paakai zi ɓaka e pɵi fana wuzani Zunduk zi bonu na wiini Alaw kûreɗ-kûreɗ.

⁷Mefeŋ hanɗa azi n’avut na David a sa futi sini Asaf gaiɗi Levitkai na marni buri e kûli EPIƊ-ƊAI.

⁸Yama na wiiɗi a muɗa maini nɵa: kûli EPIƊ-ƊAI, miɗi edi midini yikini, Sinki sdani n’abakai edi arbaɗi ɗai.

⁹Zini yama burini, kûliŋ gaini wazagaiki zi yama, miɗi edi midini sdani zi hiila paŋ.

¹⁰Firiyi burini yikini na sɗik; ki firiyi tiki paŋ na ki ɗa piyi EPIƊ-ƊAI.

¹¹Piyi EPIƊ-ƊAI, piyi spakni, ki piyiŋ kûreɗ-kûreɗ.

¹²hini miɗiki a kɵa gaini hiila n’a zaŋ. Gaini wazagai zi hiila gaini seŋ n’a ɗiyaŋ, n’a niyasi edi war mini par.

¹³Tiki na pinzibani Izrayel na ɵeŋni, tiki na pinzibani Yakob zi viri n’edi;

¹⁴EPIƊ-ƊAI a Alaw na wiimu, a ŋa midiɗi yai paŋ ɗa a ni.

¹⁵Ki hini miɗiki a kɵa kureɗ gaini bonu na wiini, seŋ n’a niyasi mini par a na buri pinziba na wuzani sek haa dubu.

¹⁶Bonu n’a zaŋ gaini Abraham, n’a ɗiya midini pra gaini wala zi hi-mi wiini Isak,

¹⁷A bundaŋ aŋ gadai zi ɗiyi burini Yakob, aŋ bonu n’a vada edi kai buriɗi Izrayel.

¹⁸Won hlai n’a muɗa: aga mu suku afti naka naan aŋ wiiku, hanɗa a bulum n’aga a sa suku tuku gaini pinzibaku.

¹⁹Tiki ki ɗika viya kai ɗif a kiɗa a pɵiki ta; vok n’agwi kadai na wiiɗi ɗai na morkokai.

²⁰E zûgi midini afti ktai par midini na zamai, warɗi pai ktai par warɗi na zamai.

²¹Paŋ ktai Alaw a hina ɗif aŋ siɗiɗi gir arɗi kai, A ziɗi gir wiiɗi paakai zamai zamai buriɗi:

²²A muɗa, ki tiki tiki siɗi ɗaiŋa na mu viriɗi edi kai, ki zi wala na meefeŋ siɗi ɗai na ma ɗe kaalai.

²³Tiki ɗai na midiɗi yai paŋ, zini yama burini EPIƊ-ƊAI, mefeŋ mefeŋ paŋ, miɗi edi midini kûri na wiini.

²⁴Miɗi edi midiɗi abaini arbaɗi pinzibaɗi ɗai, midini sdani na pɗamai arbaɗi ɗai paŋ lai.

²⁵Buri EPIƊ-ƊAI a abai, kolni a suwa suwai, Sabab gara a sûwiɗi alawai na zamai ɗe paŋ.

²⁶Alawai na wiiɗi ɗai paŋ ɗa e ɗi wala kadai, amma EPIƊ-ƊAI a ni n’a za hlai n’amai.

²⁷Arni a tala zuf gara, a ŋala gara lai. Hlai n’aŋ woni ɗa a spak gaiɗi abai.

²⁸Tiki ɗai na midiɗi yai paŋ sini kol wiini EPIƊ-ƊAI, siɗiti abaini gaini spakni lai.

²⁹Siɗi ɓa yikini EPIƊ-ƊAI a na abai kisi like na wiiki, niyisi amlai wuzani. EPIƊ-ƊAI a na sɗik, hûrgi azumai wuzani, Won hlai n’a siŋka sini li arki

³⁰Tiki ɗai na midini afti paŋ ziriyi wuzani, nkam, yai t'aŋ gaini ɗiyi gdaŋ te mugza kai,

³¹Hlai n’amai ɗa, firiya, yai, va gaini firiyi lai. Miɗiɗi wiiɗi ɗai paŋ ɓa, EPIƊ-ƊAI ɗa a pai.

³²Yem-ra gaini wazagai na warku paŋ, suura; basga n’edi gaini wazagai na warku paŋ, za fet.

³³Luwuŋai na war basga lai ɗuula gaini firiyi wuzani EPIƊ-ƊAI buri a na halasi aŋ ŋa midini afti.

³⁴Kûli EPIƊ-ƊAI buri Ni a pɗem, buri dirini a na haa kureɗ.

³⁵Ki miɗini ɓa: kûriyi edi kor, Alaw na ku na kûrɗiyi, Piliyisi edi tiɗi pinzibaɗi ɗai na zamai par, tipiyi war hlai ktai tap, nɵa aga mi kûli yikuku na sɗik, aga mi kûli siyi buri mi ɗa suku kol.

³⁶Kol sini Epiɗ-ɗai Alaw na wiiɗi Izrayel; war hlai n’a vada kai par haa hlai n’a vada kai. Ɗai paŋ e miɗi: amen, kûli EPIƊ-ƊAI.

³⁷David a hina Asaf gaiɗi marni na levitekai wuzani Zunduk zi bonu na wiini EPIƊ-ƊAI sa. Kapai woni e zi sdaɗi n’aŋ gaini kiti ta ta war yuvai kûreɗ-kûreɗ;

³⁸David a vara Obed-Edom n’ahini Yeditun gaini Hosa, gaiɗi zagalakaiɗi zamai doogo-doogo-ɵaara pi mitwis aŋ ɗai zi giɗimi mini magala.

³⁹David a hina pai zi ɓaka Sadok gaiɗi paakai zi ɓaka na marni wuzani hlai zi simni na wiini EPIƊ-ƊAI n’a na war hlai zi ɓaka na Gabawon,

⁴⁰Kapai e zi ɓaka zi yi wiini EPIƊ-ƊAI kûreɗ-kûreɗ midini gûwiŋ zi yi ɓaka, gorof par lai, koskoi lai, kapai e zi wala paŋ n’a ɗoli war ɗû n’EPIƊ-ƊAI a siŋɗi wiiɗi Izrayel.

⁴¹Heman gaini Yedutun gaiɗi nagai paŋ n’e viriɗisi, n’e yikiɗisi gaini yikiɗi yikiɗi aŋ si kûli EPIƊ-ƊAI e ɗifu gaiɗi lai, buri dirini a na haa kureɗ.

⁴²Heman gaini Yedutun e ɗifu gaiɗi, e ɗi ɗai n’e zi sda gaini fana zi pɵi, gaini kawai n’a tuwa, gaini wazagai n’e zini yama na wiini Alaw gaini. Alini Yedutun e ɗifu aŋ ɗai zi giɗimi mini magala.

⁴³Ɗai paŋ e wiyi ahaɗi ahaɗi, David lai a waya ahani aŋ ɓikiɗi ɗai n’aha hani.