Read Mousgoum Labar na war yivai n’avut 19 Bible Online

Labar na war yivai n’avut 19 - Mousgoum bible

Labar na war yivai n’avut 19

¹Asakal hanɗa, Nahas pai na wiiɗi Ammonitekai a mra su, ahini na Hanun a sumna aŋ pai war balamni.

²Nɵa David a muɗa: aga mu za pɗem sini Hanun n’ahini Nahas buri epini a za pɗem sa gara, David a ɵina ɗai sini aŋ sini arai zi pi buri mri na wiini epini. Ɗai na wiini David e sûmidini afti na wiiɗi Ammonitekai sini Hanun aŋ sini arai zi pi.

³Amma abakaiɗi Ammonitekai e miɗini wiini Hanun: ku hiina na ɓa David a ɵinasi ɗai suku aŋ suku arai zi pi na ɗa, a sa na hormo wiini apuku ki ɗi ɗi? Ɗaini n’e hilisi ahaku na ɗa a na buri e tili afti, buri e fiki dûrgûzi amai, e tili na ɗa ezini hlai lai kai ɗi?

⁴Hanun a yimiɗi ɗai na wiini David ɗa, a faɗa muɗgi na miɗi edi, a ɗukla sapa na siɗi haa amai sini flesɗi ta ta, asakal par a birgiɗi.

⁵E hili wiiɗi. Ɗai e hili e miɗini wiini David gaini wala n’a za siɗi ɗai hanɗa, a ɵina ɗai miɗi buri e ɗifu war siyer n’abai. Pai a siɗi miɗi ɓa: ki simnisi war Yeriko ca haa muɗgi na miki a diya ca haw kapai asakal par ki wiyisi aha.

⁶Ammonitekai e siɗi ɓa e ɓilki siɗi li arni David, Hanun gaiɗi Ammonitekai e ɵini arzaŋ talan dubu ɗaw aŋ piyisi saret zi gaw gaiɗi ɗai zi dibiri plasai tiɗi ɗai na Siriya na war Mezopotamiya par, na Maka par gaiɗi na Soba par lai.

⁷E nivi saret zi gaw dubu hu pi sulu, e sini farai wiini pai na Maaka gaiɗi ɗaini lai e hilisi e pi miɗi Madaba tiɓ. Ammonitekai e niyisi edi warni fuŋɗi n’abai par, e tipisi e hili mini hatam lai.

⁸Won hlai na David a ɵina hanɗa, a ɵina Yowab na abaiɗi askarai, gaiɗi askarai na agulɗi a huna kai.

⁹Ammonitekai e niyisi anene, e giri siɗi mini hatam, mini magala na wiini Raba kapital na wiiɗi. Amma paakai n’e hilisi aŋ zini piɗi e simni edi kiiɗi war basga

¹⁰Yowab a tala ɓa hatam ansi wuzani par lai duɓani par lai, a viriɗi ɗai n’e siɗi hatam gara arbaɗi askarai na wiiɗi Izrayel, a giriɗi miɗi ɗai na Asiriya gar.

¹¹Askarai n’e hini ɗa a siɗi tini Abisai na tawalni, nagai e giri miɗi Ammonitekai gir lai.

¹²Asakal par Yowab a miɗini wiini tawalni na ɓa Siriyakai e sûwiŋa li gaini gdaŋ ɗa, ku lawaŋa ɗuwal, na ɓa Ammonitkai e suwuku tuku li ɗe ta aga mu luwuku ɗuwal lai.

¹³Ɗiya gdaŋ, hutumumu gaini gdanmu buriɗi ɗaimu gaini fuŋ n’abakai na wiini Alaw na wiimu lai. EPIƊ-ƊAI a za maini n’a dara nɵa.

¹⁴Nɵa Yowab gaiɗi ɗaini e hili aŋ hitimiɗi ɗai na Siriya, ɗai na Siriya e pri edi wuzaɗi.

¹⁵Won hlai na Ammonitekai e tili ɓa ɗai na Siriya e ɗa rivi, nagai lai e pri edi wuzani Abisai na tawalni Yowab, e wiyi aha war fuŋɗi n’abai, nɵa Yowab a waya aha war Yeruzalem.

¹⁶Won hlai na Siriyakai e tili ɓa Aliɗi Izrayel e rɗi amai midiɗi li, e ɵini ɗai piɗi siriyakai na anene duɓani ra na Öfrata par. Sofak abaiɗi askarai na wiini Hadadezer a nafu aŋ abaiɗi.

¹⁷Ɗai e kiŋsi labar hanɗa wiini David. David a tipiɗi ɗai na Izrayel paŋ, e hiwi ra na Yurdan amai, e sû midiɗi, e giri miɗi. David a ziziniɗi ɗaini mini hatam wuzaɗi ɗai na Siriya, ɗai na Siriya e hitimiɗisi.

¹⁸Ɗai na Siriya e pri edi wuzaɗi ɗai na Izrayel. David gaiɗi ɗaini e fiɗi ɗai zi saret zi gaw dubu muguzak, gaiɗi askarai na kadai dubu puɗu lai. A fuɗa Sofak abaiɗi askarai hanɗa lai.

¹⁹Won hlai na nagai n’e ɗika pini Hadadezer, e tili ɓa ɗai na Izrayel e rɗi amai midiɗi li, e piyi ɵeɗ gaini David, e zi siɗi aŋ bagakaini lai. Ɗai na Siriya e wiyisi katawai aŋ zini piɗi Ammonitekai kir kai.