Read Mousgoum Labar na war yivai n’avut 23 Bible Online

Labar na war yivai n’avut 23 - Mousgoum bible

Labar na war yivai n’avut 23

¹David a luma buza ta, a za wel takai takai, nɵa a tika ahini na Salmun aŋ pai midiɗi Izrayel.

²Asakal par a tipiɗi n’abakai n’e ɵi wuzaɗi ɗai na midini afti na Izrayel paŋ, paakai zi ɓaka gaiɗi levitekai lai.

³Levitkai na buzaɗi sini hu par amai sek ɗa a pɵiɗi paŋ. Pɵaɗi paŋ ɗai dubu hu pi mitwis.

⁴A mula arbaɗi par dubu caaɓa pi puɗu buri e tili sdani Dalam na wiini EPIƊ-ƊAI, a mula dubu ɵaara aŋ ɗai n’e ɗûhi wazagai, aŋ ɗai zi ɗûkliti sariya lai.

⁵David a mula ɗai dubu puɗu aŋ ɗai zi giɗimi mini magala, ɗai dubu puɗu aŋ kûli EPIƊ-ƊAI gaini wazagai zi zini yama n’a zaŋ buri e kûliŋ gaini.

⁶David a tikiɗi arɗi edi kiiɗi kiiɗi, piɗi humuni na wiini Gerson, Kehat gaini Merari n’alini Levi.

⁷Gerson a wa Ladan gaini Simey,

⁸Ladan a wa Yehiyel ahini n’avut, Zetam gaini Yuwel, paŋ ali hu.

⁹Simey a wa Selomit, Haziyel gaini Haran, paŋ ali hu e ɗi tamai dalam na war pinzibani Ladan.

¹⁰Simey a wa ali zamai puɗu, Yahat, Ziza, Yehus gaini Beriya, e ɗi alini Simey na puɗu ɗa.

¹¹Yahat a hini n’avut, Ziza a n’aga wulani, amma Yehus gaini Beriya e wi ali viya kai, e diŋgi amai aŋ pakatai, ktai war sda ktai lai.

¹²Kehat a wa ali puɗu, Amram, Yishar, Hebron gaini Uziyel lai.

¹³Amram a wa Aaron gaini Musus. Aaron a vara edi, ni gaini pinzibani buri a za sda amlai war hlai na sɗik gara haa kureɗ, aŋ zi ɓaka zi lugos na pɗem wuzani EPIƊ-ƊAI, aŋ zi ɵeŋni, aŋ ɓikiɗi ɗai lai war yikini haa kureɗ

¹⁴Musus ɗa a ɗif na wiini Alaw, alini e pɵi arbaɗi pinzibani Levi.

¹⁵Musus a wa Gerson gaini Eliyezer.

¹⁶Gerson a wa Sebuwel ahini n’avut.

¹⁷Eliyezer a wa ahi ktai yikini Rehabiya, a wa zamai kir kai. Amma Rehabiya a wa ali viya gara.

¹⁸Yishar a wa Selomit ahini n’avut.

¹⁹Hebron a wa ali puɗu, Yeriyahu ahini n’avut, n’aga wulani ɗa a Amariya, n’ag'aŋ hu a Yahaziyel, n’ag'aŋ puɗu a Yekameyam.

²⁰Uziyel a wa Mika ahini n’avut gaini Ysiya ahini n’aga wulani lai.

²¹Merari a wa Mahli gaini Muhi. Mahli a wa Eliyazar gaini Kis.

²²Eliyazer a mra sek ɗa a wa ahi na wus kai, e wiiɗi e ɗi ali na falakai, e miliɗi aŋ falakai ɗa e ɗi alini Kis na tawalni epiɗi.

²³Musi a wa ali hu, Mahli, Eder gaini Yeremot.

²⁴Hanɗa e ɗi pinzibani Levi, e ɗi tamai dalam paŋ lai, e pɵiɗi edi ktai ktai gaini yikiɗi yikiɗi, sini buza caaɓa par ta amai sek, e zi sda amlai war Dalam na wiini EPIƊ-ƊAI.

²⁵David a muɗa ya ɓa: Epiɗ-ɗai Alaw na wiiɗi Izrayel aga a sa si n’amla wiiɗi ɗaini, Ni dama aga a sumna aha war Yeruzalem haa kureɗ lai.

²⁶Nɵa Levitkai aga e libi gumu gaini wazagai n’e zi sda gaini ɵa yaw kir kai.

²⁷Pin pɵiɗi pinzibani Levi ɗa, a za siɗi nagai na buza caaɓa par amai sek pini seŋ na David a ɗiyaŋ ɗa.

²⁸Nagai aga e zi sda piɗi alini Aaron amlai war Dalam na wiini EPIƊ-ƊAI, aha war pakatai na wiini Dalam n’Alaw, amlai war dalam zi feŋ, war zi n’edi aŋ hilu na wiini wazagai na wiini Alaw paŋ, war sda n’a za amlai war dalam na wiini Alaw paŋ lai.

²⁹E zi peŋ n’e miliŋ midini tabel na wiini Alaw, e piyi avudi na lehid n’e zi ɓaka na mini fel warni kai gaini, e zi kisere na gaini is arni kai, gamla, gaini lagiya, e giɗimi, e tiki hangalɗi sini wazagai n’e ŋi wazagai warni, gaini n’e kiti mogoni wazagai gaini lai;

³⁰Gorof par gaini koskoi paŋ e hilisi wuzani EPIƊ-ƊAI aŋ kûliŋ gaini yama, e sini kol lai

³¹aŋ zi ɓaka zi yi na ɗai e kiŋsi wiini EPIƊ-ƊAI paŋ, aga e hili war Sabbat, war merfeŋni tile, war fet, aga e zi hanɗa wuzani EPIƊ-ƊAI kûreɗ-kûreɗ pini pɵani n’aŋ gaini kiti ta ta ɗa.

³²Hanɗa a sdaɗi n’aga e ziŋ war gumu n’e nivi gaini EPIƊ-ƊAI woni, n’aga e ziŋ sini wazagai na wiini Alaw, n’aga e zini piɗi tawalakaiɗi n’alini Aaron warni amlai war Dalam na wiini EPIƊ-ƊAI.