Read Mousgoum Labar na war yivai n’avut 26 Bible Online

Labar na war yivai n’avut 26 - Mousgoum bible

Labar na war yivai n’avut 26

¹Ɗai zi giɗimi mini magala e ɗifu gaini vok na wiiɗi lai. War pinzibani Kore, wala zi vili a yima ɗa a Meselemiyahu n’ahini Kore, na tiyni Abiyasaf.

²Meselemiyahu a wa ali muguzak, e giri piɗi marɗi maini nɵa: n’avut ɗa a Sakariyahu, n’ag'aŋ sulu ɗa a Yediyaiel, n’ag'aŋ hu ɗa a Zebadiyahu, n’ag'aŋ puɗu ɗa a Yatniyel,

³n’ag'aŋ ɵim ɗa a Elam, n’ag'aŋ ɵaara ɗa a Yeheha n’aŋ, n’ag'aŋ muguzak ɗa a Eliyohenai.

⁴Obed-Edom a wa ali mitwis, e giri piɗi marɗi maini nɵa: Semaya, Yekozabad, Yowa, Sakar, Netaneyel,

⁵Amiyel, Isakar, Pehultai lai, buri Alaw a ɓakaŋ ta.

⁶Semaya n’ahini n’abai ɗa a wa ali n’e bindi aŋ ɗai n’abakai war pinziba na wiiɗi, buri ɓa e ɗi ɗai n’e siɗi hatam gara, na agulɗi a huna kai.

⁷Alini Semaya ɗa e ɗi miɗi: Otni, Refaiel, Obed, Elzabad gaiɗi zagalakaini, ɗai zi hatam na agulɗi a huna kai, Elihu gaini Semakiyahu.

⁸Nagai hanɗa paŋ e ɗi pinzibani Obed-Edom, nagai gaiɗi aliɗi na maɵagai gaini zagalakaiɗi zamai lai, e ɗi ɗai zi siɗi hatam, na agulɗi a huna kai. Buri gdaŋɗi n’a na siŋka edi siɗi par war sda. Nagai paŋ e ɗa doogo ɵaara pi sulu.

⁹Vok na wiini Meselemiyahu gaiɗi alini gaiɗi zagalakaini lai e zi ɗai doogo pi mitwis, e ɗi ɗai n’e siɗi hatam gara, n’agulɗi a huna kai.

¹⁰Hosa na war pinzibani Merari par a wa ali puɗu: Simri a abai na war pinzibaɗi, abai zi wi ɗa a ni kai, amma epini a tikaŋ aŋ abai ta,

¹¹n’ag'aŋ sulu ɗa a Hikiyahu, n’ag'aŋ hu ɗa a Tebaliyahu, n’ag'aŋ puɗu ɗa a Sakariyahu. Alini Hosa gaiɗi zagalakaini paŋ e zi vok na ɗai warni doogi pi hu.

¹²Vokɗi ɗai zi giɗimi min magala gaiɗi abakaiɗi lai e zi sda amlai war Dalam na wiini EPIƊ-ƊAI.

¹³Gɗamni min magala paŋ a za pini wala zi vili, a za siɗi ɗai paŋ, n’abakai gaiɗi n’agogoi, war pakatai pakatai paŋ lai.

¹⁴Min magala na piɗi futi na dawai par, wala zi vili a yima Selemiyahu, magala na min hlai n’azumai sek, wala zi vili a yima Sakariyahu n’ahini, ɗif zi si gadai, na yel gara lai.

¹⁵Magala na war gal n’amai sek ɗa, wala zi vili a yima Obed-Edom, gɗamni magazin a sa tiɗi alini lai.

¹⁶Min magala na piɗi futi na koskoi sek gaini min magala na wiini Selekat, n’aŋ miɗi futi na te hala amai sek ɗa, a sa tini Supim gaini Hosa. Ɗai zi giɗimi ɗa, e ɗiyi ɗa maini nɵa:

¹⁷Min magala na piɗi futi a dawai par ɗa, yivai paŋ levitekai ɵaara ɵaara, min magala na war gal n’azumai sek ɗa, yivai paŋ levitekai puɗu puɗu, min magaziŋ ɗa, ɗai sulu sulu azi sulu.

¹⁸Dilimi n’agwi na piɗi futi koskoi sek ɗa, ɗai e diyisi wrɗi futi par puɗu, amlai warɗi sulu lai.

¹⁹Hanɗa a vokɗi ɗai zi giɗimi mini magala n’e miliɗi piɗi humuni na wiini Kore gaini Merari par ɗa.

²⁰Levitekai zamai ɗa, e miliɗi midini godai na war dalam na wiini Alaw, gaini godai na wiini Wazagai n’a sa aŋ wiini Alaw lai.

²¹Pinzibani Ladan na war pinzibani Gerson ɗa, abakaiɗi pinzibaɗi e ɗi pinzibani Yehiyeli.

²²Alini Yehileli, Zetam gaini Yuwel na tawalni lai e miliɗi midini godai na war dalam na wiini EPIƊ-ƊAI.

²³War piniziba na wiini Amram: Yisehar, Hebron gaini Uzziyel.

²⁴Gɗamni godai ɗa, a sa tini Zebuwel na war pinzibani Gerson n’ahini Musus.

²⁵Zagalakaini n’alini Eliyezer na tawalni e ɗi miɗi: Rehabiyahu n’epini Yesaiahu, n’epini Yoram, n’epini Zikri, n’epini Selomit lai.

²⁶Selomit gaiɗi zagalakaini ɗa e miliɗi midini godai na wiini wazagai na sɗik na pai Davidɗ gaiɗi abakaini piniziba, gaiɗi abakaiɗi vokɗi askarai na dubu, gaini vokɗi askarai n miya, gaiɗi abakaiɗi askarai zamai zamai lai e siŋ wiini Alaw.

²⁷Wazagai hanɗa e miliŋsi war der na wiini hatam par kapai e zizini Dalam na wiini EPIƊ-ƊAI gaini.

²⁸Wazagai na ɗif na mini Alaw Samuwel, Sawul n’ahini Kis, Abner n’ahini Ner, gaini Yowab n’ahiɗi Seruya lai e siŋni wiini Alaw, a sa war tini Selomit gaiɗi zagalakaini.

²⁹War pinzibani Yisehar, Kenaniyahu gaiɗi alini e miliɗi mini sda n’anene arbaɗi ɗai aŋ ɗai n’e ɵi wuzaɗi ɗai, aŋ ɗai n’e ɗkuliti sariya lai.

³⁰War pinzibani Hebron, Hazabiyahu gaiɗi zagalakaini, ɗai n’agulɗi a huna kai, paŋ ɗai dubu gaini miya muguzak, e tiki hangalɗi sini afti na wiiɗi Izrayel na tini Yurdan pini futi na koskoi sek ɗa. E tiki hangalɗi sini wazagai na wiini EPIƊ-ƊAI gaini sda na wiini pai lai.

³¹Yeriya a nafu aŋ abai war piɗi humuni na wiini Hebron. War buza n’ag'aŋ doogo doogo puɗu na David aŋ warɗi pai, e fifiki war pinziba na wiiɗi, e niviɗi ɗai zi hatam n’agulɗi a huna kai war pinzibani Hebron, war Yazer na war Galaad.

³²Yeriya gaiɗi zagalakaini, e zi paŋ ɗai zi hatam n’agulɗi a huna kai, dubu sulu gaini miya muguzak. Paŋ e ɗi abakai na war pinzibaɗi. David a miliɗi midini pinzibani Ruben, pinzibani Gat gaini galni pinzibani Manase lai kapai e tiki hangalɗi sini wazagai na wiini Alaw, sini wazagai na wiini pai lai.