Read Mousgoum Labar na war yivai n’avut 28 Bible Online

Labar na war yivai n’avut 28 - Mousgoum bible

Labar na war yivai n’avut 28

¹David a tipiɗisi ɗai n’abakai na war Izrayel paŋ aha war Yeruzalem, n’abakai na midini pinziba gaiɗi n’abakaini vok n’e ɗa war ɵeŋni pai, abakaiɗi askarai na dubu dubu gaiɗi abakaiɗi askarai na miya miya, gaiɗi n’abakai na midini wazagai gaini farani farai na wiini pai gaiɗi alini, Mampatakai gaiɗi askarai zi hatam, asakarai n’agulɗi a huna kai paŋ lai.

²Pai David a ɗiya amai zaw a miɗiɗi: ɗaiya, tawalakaya lai, ɵini. Mu rga wara buri mu rga Dalam na Zunduk zi bonu na wiini EPIƊ-ƊAI, hlai n’Alaw na wiimu a mula ezini midini a tika woni, mu paya wazagai na mu rgaŋ gaini paŋ lai.

³Amma Alaw a muɗaŋa maini nɵa: ku rgaŋa Dalam ku tuku kai, buri tuku ku ɗif zi hatam, ku ma fel edi viya gara.

⁴War pinziba na wiini apa, Epiɗ-ɗai Alaw na wiiɗi Izrayel a varaŋa muta, aŋ suma pai midiɗi Izrayel haa kureɗ, avut par a vara Yuda aŋ n’abai, war pinzibani Yuda a viriti pakatai na wiini apa, arbaɗi tiyi n’alini ɗif a tala arni pɗem buri a varaŋa aŋ suma pai midiɗi Izrayel paŋ.

⁵EPIƊ-ƊAI a saŋa ali viya, arbaɗi nagai paŋ ɗa a vara ahiya na Salmun aŋ sumna midiɗi Paramai zi pai na wiini EPIƊ-ƊAI na midiɗi Izrayel.

⁶Asakal par a muɗaŋa: n’aga a rgaŋa Dalam gaini pakataini lai ɗa a Salmun n’ahiku, buri mu varaŋ ɗaw aŋ ahiya, Ta aga mu bunda aŋ epini lai.

⁷Na ɓa a ɗiya li war jre aŋ za pini gadai na wiya, gaini gadai zi ɗû na wiya lai maini n’a zaŋ tiyana na ɵa, pai na mu sitini na ɗa aga te vada edi kai.

⁸Tiyana ɗa, wuzani arɗi Izrayel paŋ, wuzani vok na wiini EPIƊ-ƊAI, wuzani Alaw na wiimu lai, zi pini gadai na wiini Epiɗ-ɗai Alaw na wiiki, fifiki ezini lai, kapai afti na pɗem hanɗa a bunda aŋ wiiki, ki hiniŋ aŋ bulum wiiɗi aliki haa kureɗ.

⁹Amma tuku Salmun ahiya, sɗa Alaw na wiini apuku, za ɵeŋni gaiɗi agul ktai, gaini hiini na pɗem, buri EPIƊ-ƊAI a sɗa hiini n’aŋ warɗi agul, a sɗaŋ edi ktai ktai paŋ. Na ɓa ku payaŋ li ɗa aga a suŋkuku sini, amma na ɓa ku hinaŋ li edi ɗa, Ni aga a bunda arni edi suku par gamai.

¹⁰Tala haw le, tiyana ɗa EPIƊ-ƊAI a vuruku buri ku rgini Dalam n’aga za aŋ hlai na sɗik. Ɗiya gdaŋ, za sda.

¹¹David a sini plan na wiini Dalam na wiini Alaw wiini Salmun n’ahini gaini dalamai na warni, gaini magaziŋ, gaini dalamai n’amai, dalamai m’amlai arba gaiɗi dilimi na wiini Zunduk zi bonu na wiini Alaw.

¹²A sini plan na wiini wazagai paŋ n’a firiya a zaŋ aha war pakatai na wiini Dalamni EPIƊ-ƊAI gaini dalamai na ɵimani pakatai ɗawwa ɗa, n’e mili godai na wiini Dalamni Alaw gaini godai na wiini wazagai n’e siŋ wiini Alaw woni.

¹³A sini yikini vokɗi paakai zi ɓaka gaiɗi Levitekai, gaini sdaɗi n’aga e ziŋ amlai warni Dalamni EPIƊ-ƊAI gaini yikini wazagai n’aga e zi sda gaini amlai war Dalamni EPIƊ-ƊAI lai.

¹⁴David a siŋkini gumani or gaini gumani arzaŋ n’a kiɗa aŋ zizina wazagai n’e zi sda gaini war Dalamni Alaw ta ɗa;

¹⁵A siŋkini gumani or n’e zi wala zi tiki lampa midini zi or, gaini lampa zi or lai, pra a siŋkini gumani arzaŋ n’e zi wala zi tiki lampa midini zi arzaŋ gaini lampa zi arzaŋ lai, pini sda n’aga e ziŋ gaini wala n’e tiki lampa midini.

¹⁶A siŋkini gumani or n’e zi table zi or n’e mili peŋ n’a sa sini Alaw midini gaini arzaŋ n’e zi table zi arzaŋ gaini lai.

¹⁷A siŋkini gumani furset gaini kop n’e mi fel warni, gaini sakan zi or na gaini futini, gaini feŋ zi or gaini zi arzaŋ lai.

¹⁸A siŋkini gumani or na gaini futini n’e rgi gûwiŋ zi yi wazagai zi ɗûgûzi zi lûgûzi gaini, a siŋkini model na wiini saret na wiini Alaw gaini na wiiɗi Kerubimkai zi or na graŋɗi gaini wi edi midini Zunduk zi bonu na wiini EPIƊ-ƊAI.

¹⁹Wazagai hanɗa paŋ ɗa, mu navaŋ gaini ɗûɗo tini EPIƊ-ƊAI par, a sinkaŋa edi gaglai midini wala n’aga mu zaŋ n’a na war plaŋ ɗe paŋ.

²⁰Asakal par David a miɗini wiini Salmun n’ahini: ɗiya gdaŋ, yimiti agulku, za sda, ku huna kai, ku pa arku, buri Epiɗ-ɗai Alaw, Alaw na wiya aga a za gaiku, aga a hunuku kai, aga a zina puku haa sda zi zi na sini Dalamni a vada kafa.

²¹Vokɗi paakai zi ɓaka gaiɗi levitekai, n’aga e zi sda na wiini Dalamni Alaw e ɗi na, ɗai na diriɗi a na, na yalakai gara war sda aga e zi sda hanɗa gaiku, n’abakai n’e ɵi wuze gaiɗi ɗai paŋ aga e zi wala paŋ na ku miɗiɗi li midini.