Read Mousgoum Labar na war yivai n’avut 29 Bible Online

Labar na war yivai n’avut 29 - Mousgoum bible

Labar na war yivai n’avut 29

¹Pai David a midini wiini diŋgi paŋ maini nɵa: Salmun n’ahiya n’Alaw a varaŋ na ɗa agwi, a zeŋe kai, sda ɗa a sda n’abai, buri ɓa a rga na ɗa a Dalam na wiini ɗif kai, amma a na wiini Epiɗ-ɗai Alaw.

²Mu fuɗa was haa, mu paya or, arzaŋ, kiiya, kawai, luwuŋ, ali-fuŋ onikse, ali-fuŋ n’e diɓigin sini hlai, ali-fuŋ na murɗakai, gaini ali-fuŋ n’a sɗa kiini kiini, ali-fuŋ na pinzibani kiini kiini n’a zuva gara gaini Marbre na mudkwi viya lai n’e rgi Dalam na wiini Alawŋa gaini.

³Pra, buri mu firiya Dalam n’Alaw na wiya gara, or gaini arzaŋ na wiya ɗa mu saŋ buri e rgi Dalam na wiini Alaw na wiya gaini sini wazagai na mu tapaŋ burini Dalam na sɗik hanɗa.

⁴Mu sa or na gaini futini kilo dubu miya, arzaŋ na gaini futini lai kilo dubu miya sulu gaini puɗu kapai e ɵirɓi sini tempel ɗa gaini.

⁵Tiyana ɗa, ɗif na dirini a na buri a sa or gaini arzaŋ burini EPIƊ-ƊAI kapai ɗai zi sda e zi wazagai n’e ziŋ gaini or gaini arzaŋ lai a na ɗi?

⁶Nɵa abakaiɗi pinziba gaiɗi n’abakai na war pinziba na pi sulu na warɗi Izrayel, abakaiɗi askarai na dubu dubu gaiɗi na miya miya, gaiɗi n’abakai na midini sda na wiini pai e si like na pini diriɗi,

⁷e siŋ buri sda na wiini Dalamni Alaw. Or ɗa kilo dubu miya gaini muguzak, sulai zi or dubu, arzaŋ ɗa a suwa kilo dubu miya hu, kiiya kilo gobi dubu miya ɵaara, kawai a suwa dubu miliyon hu.

⁸Nagai n’e ɗa gaini ali-fuŋ na pɗamai e siŋni tini Yehiyel na war piɗi humunini Gerson aŋ mili amlai warni godai na wiini Dalamni Alaw.

⁹Ɗai paŋ e firiyi buri like n’e siŋ pini diriɗi, buri e siŋni wiini EPIƊ-ƊAI gaini agulɗi paŋ, pai David lai firiyi n’abai a yimaŋ.

¹⁰David a zini tese wiini EPIƊ-ƊAI wuzani diŋgi paŋ a muɗa: kol ɗa a wiiku Epiɗ-ɗai Alaw na wiiɗi Izrayel, tuku na k’apiyi war hlai n’a vada kai par haa hlai n’a vada kai,

¹¹EPIƊ-ƊAI, amai, spak, zuf, pai gaiɗi abai lai a wiiku, buri wazagai na war hlai n’amai n’azumai midiɗi yai lai a wiiku paŋ, EPIƊ-ƊAI, Tuku ku pai midini wazagai zi rgi paŋ, ku ŋa midini paŋ lai.

¹²Der gaiɗi abai paŋ a halasi na suku par, ku ŋa midini wazagai paŋ ku tuku lai, gdaŋ gaini spak paŋ aŋ war tuku, ku sitini abai wiini ɗif, ku ɗiyaŋ gdaŋ lai ku tuku.

¹³Nɵa tiyana ɗa, mi ɗa zuku tese, Alaw na wiyi, mi ɗa kûli yikuku na zuf gara war yama.

¹⁴Ta mu siya ktai ɗa, ɗaiŋa e ɗi na wa lai ɗa, na kapai haa mi si like pini diriyi maini hanɗa nɵa ɗa, wazagai paŋ a halasi na suku par, na mi suŋku na maa a halasi na tuku par.

¹⁵Buri tiyi mi ɗi morkokoi wuzani arku, mi ɗi ɗai na gaini azi yaw yaw maiɗi tamaiyi nɵa. Mefeŋyi na midiɗi yai ɗa a na maini sezeni luwuŋ n’a na burini hlai n’agwi nɵa. Biyi na pini ɵeɗ na wiyi aŋ kaalai.

¹⁶Epiɗ-ɗai Alaw na wiyi, wazagai na mi tipiŋ viya, na kapai mi rgi Dalam na wiiku gaini, na mi yiki yikuku na sɗik warni lai, hanɗa paŋ a halasi suku tuku par, a wiiku lai.

¹⁷Alaw wiya, mu sɗa ya ɓa, ku sɗa hiini n’a na amlai warɗi agul, ku firiya ɗa a jre. Ta ɗa, mu sa wazagai hanɗa paŋ pini diriŋa, gaiɗi agul na jre, tiyana ɗaiku n’e ɗi ɵima na kaw ɗa, mu tiliɗi e ɗa e si like na pini diriɗi gaini firiyi lai.

¹⁸Epiɗ-ɗai Alaw na wiini, Abraham, Isak gaini Yakob na tamaiyi, giɗima hiini na pɗem n’a na warɗi ɗaiku hanɗa haa kureɗ, hina hiiniɗi a ɗiya muduku tuku ktai.

¹⁹Ku sitini agul na ɗikat wiini Salmun n’ahiya, kapai a yima gadaiku, wala na ku gada midini gaini gadaiku zi ɗiyi lai, a za pini lai, a rga Dalam n’abai na mu zizina wazagai paŋ burini ɗa.

²⁰Asakal par David a muɗa wiini diŋgi: zini tese wiini Epiɗ-ɗai Alaw na wiiki, diŋgi a za tese wiini Epiɗ-ɗai Alaw na wiiɗi tamaiɗi, e gûɓi azumai, e hûrgi azumai wuzani EPIƊ-ƊAI, wuzani pai lai.

²¹Dawaini ɗa, ɗai e fiɗi wazagai zi ɓaka wiini EPIƊ-ƊAI, e zini ɓaka zi yi, e fiɗi garakai dubu ɗaw, adumai dubu ɗaw, alini adumai dubu ɗaw, gaini ɓaka zi vin na midini ta ɗe lai, gaini ɓaka zamai zamai viya na buriɗi aliɗi Izrayel ɗe paŋ.

²²War mefeŋ ni ɗa, ɗai e simi, e ci lai wuzani EPIƊ-ƊAI gaini firiyi n’abai, azi n’ag'aŋ sulu e tiki Salmun n’ahini David aŋ pai, e mini emel midini aŋ ɗif n’abai na wiini EPIƊ-ƊAI, Sadok aŋ pai n’abai zi ɓaka lai.

²³Salmun a sumna midiɗi paramaiɗi pai na wiini EPIƊ-ƊAI, aŋ pai war balamni David n’epini, sdani a hala gaini futuni, ɗai na Izrayel paŋ e ɵini pini.

²⁴Ɗai n’abakai paŋ, askarai n’agulɗi a huna kai ɗe paŋ, gaiɗi alini David paŋ lai e wiyi siɗi azumai pini pai Salmun.

²⁵EPIƊ-ƊAI a bunda pai Salmun abai wuzani arɗi aliɗi Izrayel paŋ. Paini te pai zi hormo na pai zamai a simiti ka war Izrayel duk kai.

²⁶David n’ahini Isai a ŋa midiɗi Izrayel gaini hlaiɗi paŋ.

²⁷A suma pai midiɗi Izrayel buza puɗu, buza muguzak war Hebron, buza hu pi hu war Yeruzalem lai.

²⁸A mra war wel zi muluk, a buza viya, faraini viya, kolni viya lai. Salmun n’ahini a suma pai war balamni.

²⁹Sdani pai David paŋ n’a tika pini gaini par haa sini n’a ɗiya gaini ta, aŋ gaini ɗûarbani sda na wiini ɗif na mini Alaw Samuwel, arbani na wiini ɗif na mini Alaw Natan gaini na wiini ɗif na mini Alaw Gad lai.

³⁰War maktuɓ hanɗa lai e miɗi midiɗi paini gaini spakni, gir n’a za sini ni dama, n’a za siɗi Izrayel gaini n’a za sini aftiɗi paakai na ɵimaɗi paŋ lai.