Read Mousgoum Labar na war yivai n’ag'aŋ sulu 10 Bible Online

Labar na war yivai n’ag'aŋ sulu 10 - Mousgoum bible

Labar na war yivai n’ag'aŋ sulu 10

¹Robowam a hala war Sikem, buri aliɗi Izrayel paŋ e hilisi a Sikem buri e tikiŋ amai aŋ pai.

²Amma Won hlai na Yerobowam n’ahini Nebat a ɵina hanɗa hlai n’aŋsi war Egipte, buri a pra edi woni wuzani pai Salmun, a wayasi war Egipte par.

³E ɵini pini e yikiŋsi, a halasi gaiɗi aliɗi Izrayel na zamai paŋ lai, e midini wiini Robowam maini nɵa:

⁴Apuku, a yimiyi maiɗi bagakai ɵa, a tika zi sda zi gir midiyi lai, tiyana ɗa, na ɓa tuku ku ɵiyi smer li siyi agwi ɗa, aga mi hini aŋ ɗaiku ɵa.

⁵Robowam a wiyiɗi seŋ a muɗa: hili ki zisi mefeŋ hu kapai ki wiyisi sa, ɗai e hili wiiɗi.

⁶Pai Robowam a paya yel siɗi n’abakai n’e zika sda gaini Salmun n’epini par a miɗiɗi: tiki ki firiyi mu wiyiɗi seŋ wiiɗi ɗai hanɗa ɓa maɵa ɗa?

⁷E wiyini seŋ ɓa: na ɓa ku ziɗi li pɗem wiiɗi ɗai hanɗa, na ɓa ku viɗi firyiɗi li amai, na ɓa ku miɗiɗi li seŋ na pɗem lai ɗa, aga e hini aŋ ɗaiku ɵa haa kureɗ.

⁸Amma Robowam a yima gadai na n’abakai e siŋni ɗa kai, a zilbiɗi marni n’e wili gaini, n’e ɗa gaini war sda,

⁹a miɗiɗi: tiki ɗa, ki miɗi maɵa lai ɗa, ki firiyi ɓa, mu wuyuɗumu seŋ wiiɗi ɗai n’e hilisi e zilbiŋa ɓa: mu ɵiɗi smer siɗi agwi, mu tika sda zi gir n’apa a tikaŋ midiɗi edi agwi lai ɗa, maɵa ɗa?

¹⁰Marni na gawlakai n’e wili gaini e wiyini seŋ ɓa: aga ku miɗiɗi wiiɗi ɗai n’e hilisi e muɗuku ɓa: apuku ɗa a tikiyi sda zi gir midiyi, amma tuku ku ɵiyi smer siyi agwi ɗa ɓa: ahi ta n’agwi ɗa, spakɗi a suwa graŋni apa ɗa,

¹¹Apa a tikiki gir miɗiki, amma tiyana par ɗa, ta aga mu riya gir hanɗa amai, a ɵiɓiki gaini daɓala z'amur, amma ta aga mu ɵiɓiki gaini daɓala n’aŋ mini ɗa a kawai.

¹²Yerobowam gaiɗi ɗai na gaini paŋ e hilisi sini Robowam war mefeŋ n’ag'aŋ hu maini n’a miɗiŋɗi ɓa: ki wiyisi sa war mefeŋ n’ag'aŋ hu nɵa.

¹³Pai Robowam a wiyiɗi seŋ gaini wûle na gdaŋ, a hina gadai na n’abakai n’arbaɗi ɗai e siŋni ɗa edi ta,

¹⁴a wiyiɗi seŋ gaini hiini na wiiɗi marni na gawlakai maini nɵa: apa a tikiki gir miɗiki, amma ta aga mu riya gir hanɗa amai, a ɵiɓiki gaini daɓala z'amur, ta aga mu ɵiɓiki gaini daɓala n’aŋ mini ɗa a kawai.

¹⁵Na ɓa pai a ɵina miɗi ɗai ɗa kai ɗa, a wala n’Alaw a zaŋ kapai seŋ n’EPIƊ-ƊAI a miɗiŋ ni wiini Yerobowam n’ahini Nebat war mini ɗif na mini Alaw Ahiyo na Silo par a va amai.

¹⁶Won hlai n’aliɗi Izrayel na war gal n’azumai par, e tili ɓa pai a dara a ɵina seŋɗi kai, e wiyini seŋ e miɗi: arbaɗi na gaini David ɗa a maɗa? Wala ktai maa arbaɗi gaini ahini Isai hanɗa kai koo, tumu Izrayel na war gal n’azumai par, ɗif paŋ a waya ahani ahani, tuku na pinzibani David ɗa, za gaiɗi ɗai na war pinzibaku ɗa, nɵa aliɗi Izrayel na war gal n’azumai par paŋ e wiyi ahaɗi.

¹⁷Robowam a hina a ŋa midiɗi aliɗi Izrayel n’e ɗa war fuŋ n’abakai na midini afti na Yuda.

¹⁸Pai Robowam a ɵina Adoram ɗif n’abai na midini sda zi dewele siɗi aliɗi Izrayel na war gal n’azumai sek, amma nagai e fiɗiŋ edi gaini kriyit. Pai Robowam maa a niya amai warni saretaini aŋ lawa aha war Yeruzalem sek na cɗek cɗek.

¹⁹Aliɗi Izrayel na war gal n’azumai sek e ɓûrwi edi siɗi nagai na war gal n’amai sek, arbaɗi a hina ɵa haa girna.