Read Mousgoum Labar na war yivai n’ag'aŋ sulu 13 Bible Online

Labar na war yivai n’ag'aŋ sulu 13 - Mousgoum bible

Labar na war yivai n’ag'aŋ sulu 13

¹War buza n’ag'aŋ -pi mitwis na Robowam aŋ warɗi pai, Abiya a bunda aŋ pai na Yuda.

²A ŋa aha war Yeruzalem buza hu, emini e yikiti ɓa: Mikaiahu t'ahini Uriyel na Gibeya par. Gaw a za arbani Abiya gaini Yerobowam.

³Abiya a niya war hatam gaiɗi askarai n’agulɗi a huna kai, na tiɗi a pa edi kadai kaalai dubu miya puɗu, Yerobowam a zizina sini mini par gaiɗi askarai n’agulɗi a huna kai na tiɗi a pa edi kaalai miya mitwis lai.

⁴Abiya a ɗiyasi amai par midiɗi huwuŋ Semaraiim na te na midini hlai zi huwuŋ na wiini Efrayim, a muɗa: Yerobowam gaiɗi aliɗi Izrayel paŋ, ɵini pɗem!

⁵Tiki ki siɗi ɓa, Epiɗ-ɗai Alaw na wiiɗi Izrayel a siti pai wiini David midiɗi Izrayel paŋ haa kureɗ, wiini ni gaini pinzibani lai kai ɗi? Hanɗa a bonu n’a sɗa aŋ ɓulka edi kai.

⁶Amma Yerobowam n’ahini Nebat, ɗif zi sda na wiini Salmun n’ahini David a faka amai sini Epin-gezani.

⁷Ɗai na navaɗi kai, na hiiniɗi gulai e tipisi sini e rɗi amai midini Robowam n’ahini Salmun; Robowam a nafu agwi, a sɗa wala ktai kai, gdaŋni a kiɗa a simiɗi kai.

⁸Tiyana ɗa, tiki ki firiyi ɓa ki zi gdaŋ gaiɗi pai na wiini EPIƊ-ƊAI na t'aŋ war tiɗi alini David, tiki ki ɗi vok n’abai, ki ɗi gaini alawai zi rgi zi or n’a ziŋga garakai na Yerobowam a zizinaŋ tiki lai.

⁹Tiki ki birgiɗi paakai zi ɓaka na wiini EPIƊ-ƊAI na war pinzibani Aaron gaiɗi Levitkai lai edi kapai ki miliɗi paakai zi ɓaka maiɗi ɗai na midini afti zamai ɗa nɵa, ɗif paŋ n’a halasi li gaini gari pini kai lai, gamalakai tini muguzak lai ɗa, a bunda aŋ pai zi ɓaka na wiiɗi alawai hanɗa, na kadai tiɓ e ɗi alawai kai ɗe tar.

¹⁰Amma tiyi ɗa, EPIƊ-ƊAI a Alaw na wiyi, tiyi mi hiniŋ edi kai, paakai zi ɓaka n’e zi ɵeŋ na wiini EPIƊ-ƊAI e ɗi pinzibani Aaron, Levitekai ɗe e ɗa war sdaɗi!

¹¹Gorof par paŋ, koskoi paŋ, e yi ɓaka zi yi wiini EPIƊ-ƊAI gaini wala ɗûgûdi zi lûgûzi lai, e zizini peŋ n’a sa sini EPIƊ-ƊAI amai midiɗi tabel na hilu ta ta, koskoi koskoi paŋ, e tiki afu mini lampakai na midini wala zi or zi tiki lampakai, buri ɓa tiyi mi ɗa hili wuzaɗi gaini sda na wiini Epiɗ-ɗai Alaw na wiyi, amma tiki ki hiniŋ edi mak.

¹²Tili, aŋ wuzaɗi ɗa a Alaw gaini midini dama, paakai zi ɓaka na wiini e ɗa gaini faana n’aga e pɵiŋ kapai ɗai e ɵi tiɗi miɗi Won hlai n’e tiki piɗi li aŋ hitimi gaiki tiɗi. Ɗai na Izrayel, ki hitimi gaini Epiɗ-ɗai Alaw na wiiɗi tamaiki kai, buri aga ki kiɗi aŋ zi wala ktai sini kai.

¹³Yerobowam a ɵina askarai aŋ siɓikiɗisi duɓaɗi par, askarai na Yuda par e hini amlai arbaɗi askarai na Izrayel gaini vok n’a na siɓikiɗisi duɓaɗi par ca.

¹⁴Askarai na Yuda par e bindi arɗi duɓaɗi, e tili hatam aŋsi wuzaɗi par lai, duɓaɗi par lai, e tiki piɗi e ɗûûli sini EPIƊ-ƊAI, paakai zi ɓaka ɗe aŋ pɵi faana lai.

¹⁵Askarai na Yuda e ɵi tiɗi miɗi su su, Won hlai n’e ɗa ɗûûli maini hanɗa nɵa, Alaw a waya Yerobowam gaiɗi aliɗi Izrayel paŋ duɓaɗi wuzani Abiya gaiɗi askarai na Yuda.

¹⁶Aliɗi Izrayel e pri edi wuzaɗi askarai na Yuda, Alaw a siɗi war tiɗi lai.

¹⁷Abiya gaiɗi ɗaini e giɵibiɗi ɗai na Izrayel tini fiɗi meefeŋ, e fiɗi piɗi askaraiɗi n’agula a huna kai na tiɗi a pa edi kadai kaalai ɗa, ɗai dubu miya ɵim.

¹⁸War mefeŋ ni ɗa, aliɗi Izrayel e tiki siyer, ɗai na Yuda e rɗi amai buri e pɵi midini Epiɗ-ɗai Alaw na wiiɗi tamaiɗi.

¹⁹Abiya a tika futi pini Yerobowam, a mula fuŋ n’abakai pini par: Betel gaini fuŋ n’agogoi na ɵimani, Yesana gaini fuŋ n’agogoi na ɵimani, Efron gaini fuŋ n’agogoi na ɵimani lai.

²⁰Yerobowam a hina a nava midini kir kai war mefeŋ n’Abiya aŋ warɗi pai, haa EPIƊ-ƊAI a fuɗaŋ ɵa ta.

²¹Amma Abiya ɗa spakni a riya amai sek sek, a mula falakai -pi puɗu, a wa ali na maɵagai caɓa-pi-sulu, na falakai -pi-ɵaara lai.

²²Sda zamai zamai na wiini Abiya n’a zaŋ gaini n’a muɗaŋ aŋ gaini ɗû war maktuɓ na wiini ɗif na mini Alaw Iddo.

²³Abiya a mra, a hala gaiɗi tamaini, e piŋ war fuŋ n’abai na wiini David. Asa n’ahini a suma pai war balamni. War mefeŋ na wiini ɗa, afti paŋ a nafu war ɵeɗ haa buza doogo.