Read Mousgoum Labar na war yivai n’ag'aŋ sulu 14 Bible Online

Labar na war yivai n’ag'aŋ sulu 14 - Mousgoum bible

Labar na war yivai n’ag'aŋ sulu 14

¹Asa a za sɗa na pɗem n’a sa firiyi wiini Epiɗ-ɗai Alaw na wiini.

²A haɗa gûwiŋ zi yi ɓaka na wiini alawai na zamai gaini hlai zi ɓaka azumai, a gzila ali-fuŋ n’e ɗiyiŋ amai zaw zaw aŋ alaw edi, a bla alawai zi luwuŋ n’e piŋ tiɓ tiɓ azumai lai.

³A miɗiɗi wiiɗi ɗai na Yuda buri e piyi Epiɗ-ɗai Alaw na wiiɗi tamaiɗi, e zi pini ɗû gaini gadai na wiini lai.

⁴A tuura hlai zi ɓaka n’aŋ war fuŋ n’abakai na war Yuda paŋ edi gaini hlai zi yi wazagai zi ɗûgûdi zi lûgûzi lai, war mefeŋ na wiini ɗa, afti paŋ a nafu war ɵeɗ.

⁵A rga fuŋ n’abakai zi ɵaga war Yuda buri afti a nafu war ɵeɗ. Hatam a za war mefeŋ hanɗa kai, buri EPIƊ-ƊAI a sini si n’amla.

⁶A miɗiɗi wiiɗi ɗai na Yuda: rgumu fuŋ n’abakai hanɗa amai, gununmu amlai gaini ɵaga gun gaini poriyo lai, pumu tapra mini gaini kawai n’e ɵi mini gaini; afti hanɗa aŋ war tumu tiyana, buri ɓa tumu mu piyumu Epiɗ-ɗai Alaw na wiimu, mu piyunmu, nɵa Ni a sumu ɵeɗ gaiɗi ɗai na ɵemamu paŋ ya, e rgi fuŋɗi n’abakai maini n’e firiyiŋ nɵa.

⁷Askarai na wiini Asa e ɗa ɗai dubu miya hu war pinzibani Yuda par n’e libi gamar n’abakai gaini kawai, ɗai dubu miya sulu gaini mitwis war pinzibani Benyamin par n’e libi gamar n’agogoi, n’e ɵiɓi ɓaraw ɗa, gaini hlai paŋ e ɗi askarai n’agulɗi a huna kai.

⁸Zera na Etiyopiya par, a halasi aŋ hitima gaiɗi askarai pini miliyon ɗaw gaini saret zi gaw miya hu lai, a halasi haa a Maresa ta

⁹Asa a niyasi edi miɗi, gaiɗi askaraini e girisi miɗi par war huduk na Sefata gobi gaiɗi Maresa.

¹⁰Asa a ɗuula Epiɗ-ɗai Alaw na wiini a muɗa: EPIƊ-ƊAI, ku zina pini ɗif na huruf gaini ɗif na gdaŋ ku tuku, halasi zina piyi ta, Epiɗ-ɗai Alaw na wiyi buri tiyi mi pɵi na muduku tuku, mi hili mini vok n’abai hanɗa war yikuku, EPIƊ-ƊAI tuku k’Alaw na wiyi, hina ɗif a kata kerpeɵni gaiku kai.

¹¹EPIƊ-ƊAI a birgiɗi ɗai na Etiyopiya wuzani Asa gaiɗi ɗai na Yuda, e pri edi wuzani lai.

¹²Asa gaiɗi ɗai na pini e tiki futi piɗi haa war Gera ta, e fiɗiɗi ɗai na Etiyopiya par haa ktai kaw a hina kai, buri EPIƊ-ƊAI gaiɗi ɗaini e kirpiɗi kafa, Asa gaiɗi ɗaini e nivi der na pini gaw viya.

¹³Fuŋ n’abakai na ɵimani Gera paŋ e hiɗiŋ azumai burini EPIƊ-ƊAI a hina hunai n’abai a yimiɗi, e virmi fuŋ n’abakai hanɗa buri wazagai zi virimi a nafu warni viya.

¹⁴E niyi aha war welde, e mili haakai gaini adumai lai viya, ɵigini lai, asakal par e wiyisi aha war Yeruzalem.