Read Mousgoum Labar na war yivai n’ag'aŋ sulu 17 Bible Online

Labar na war yivai n’ag'aŋ sulu 17 - Mousgoum bible

Labar na war yivai n’ag'aŋ sulu 17

¹Yosafat n’ahini a suma pai war balamni, a ɗiya gdaŋ arɗi Izrayel.

²A mula vokɗi askarai war fuŋ n’abakai zi ɵaga na war Yuda ca ca, a zizina hlai zi simni n’abakai na wiiɗi askarai midini afti na Yuda gaini fuŋ n’abakai na war Efrayim na Asa n’epini a mulaŋ ɗa ta ta.

³EPIƊ-ƊAI a za gaini Yosafat, buri a tika ɗa a payai na David na tiyni a payaŋ ɗa, a taɓa pini Baal kai,

⁴amma a paya Epiɗ-ɗai Alaw na wiini tiyni, a za pini gadaini, a za maiɗi ɗai na Izrayel ɗa nɵa kai.

⁵EPIƊ-ƊAI a binditi paini gdeŋi, ɗai na Yuda paŋ e kinisi like, haa a bunda gaini farai viya, hormoni viya lai.

⁶Hiinini n’a tikaŋ midini EPIƊ-ƊAI a wula amai haa a vada hlai zi ɓaka gaini luwuŋ zi pi z'alaw na midini afti na Yuda paŋ edi.

⁷War buza n’ag'aŋ hu n’aŋ warɗi pai a ɵiniɗi ɗaini n’abakai Ben-Haiil, Obadiya, Zekariya, Netaneyel gaini Mikaiahu lai aŋ hitiriɗi ɗai na war fuŋ n’abakai na war Yuda

⁸Levitkai gaiɗi ɵeeŋe: Semaiahu, Netaniyahu, Sebadiyahu, Asayel, Semiramot, Yehonatan, Adoniyahu, Tobiyahu gaini Tob-Adoniya lai, paakai zi ɓaka gaiɗi sulu lai: Elisama gaini Yehoram.

⁹E zi hitri war Yuda paŋ gaini maktuɓ na wiini Ɗû na wiini EPIƊ-ƊAI tiɗi ɗaw, e gûni war fuŋ n’abakai na Yuda paŋ aŋ hitriɗi ɗai.

¹⁰Hunai na wuzani EPIƊ-ƊAI a yimiɗi paakai n’e ɗa midini afti na ɵimani afti na Yuda paŋ, ktai n’a faka amai aŋ hitima gaini Yosafat aŋ kai

¹¹Filistrekai maa e kinisi like gaini arzaŋ wiini Yosafat e sini tar lai. Arapai ɗa e kinisi gamalakai dubu muguzak gaini miya muguzak gaini Mampatakai dubu muguzak gaini miya muguzak lai.

¹²Yosafat a riya amai wuzani sek sek, a rga fuŋ n’abakai zi ɵaga gaini fuŋ n’abakai n’e giɗimi wazagai zi simi woni viya aha war Yuda.

¹³Wasagaini zi simi a nafu viya aha war fuŋ n’abakai na Yuda, askaraini n’agulɗi a huna kai aha war Yeruzalem viya lai.

¹⁴Ɓrawɗi na war pinziba a na maini nɵa: war pinzibani Yuda, abakaiɗi askarai na dubu dubu e ɗa, Adna ɗa a abaiɗi askarai n’agulɗi a huna kai dubu miya hu.

¹⁵Aga pini ɗa a Yehohanan n’a ŋa midiɗi askarai dubu miya sulu gaini mitwis,

¹⁶n’aga pini zamai ɗa a Amasiya n’ahini Zikri, na s sa sini pini dirini war sdani EPIƊ-ƊAI, a ŋa midiɗi askarai dubu miya sulu n’agulɗi a huna kai.

¹⁷War pinzibani Benyamin ɗa a Eliyada, askar n’agulni a huna kai, a ŋa midiɗi askarai dubu miya sulu, na gaini ɓaraw gaini gamar.

¹⁸Aga pini ɗa a Yehozabat, n’a ŋa midiɗi askarai na siɗi gaini zizini mini hatam, dubu miya gaini mitwis.

¹⁹Hanɗa e ɗi nagai n’e ɗa war sdani pai, nagai na pai a miliɗi warni fuŋ n’abakai zi ɵaga na war Yuda paŋ ɗa pɵaɗi arbaɗi kai.