Read Mousgoum Labar na war yivai n’ag'aŋ sulu 18 Bible Online

Labar na war yivai n’ag'aŋ sulu 18 - Mousgoum bible

Labar na war yivai n’ag'aŋ sulu 18

¹Yosafat a za farai, ɗai e sini hormo viya lai. A za zigel gaini Akab war tiki.

²Buza yaw asakal par, a hala aŋ ɗugula Akab war Samariya. Gaiɗi ɗai na pini, Akab a fiɗiɗi adumai gaini haakai gaini ɵaakai viya gara, asakal par a zini midini buri e hili e hitimiti Ramot na war Galaad

³Akab pai na Izrayel a miɗini wiini Yosafat pai na Yuda: aga ku halaɗi gaya aŋ hitimiti Ramot na war Galaad ɗa tiɓ ɗi? Yosafat a wiyini seŋ: tuku gaya ta mu ɗumu ɗai ktai, ɗaiŋa gaiɗi ɗaiku e ɗi ɗai ktai lai, tiyi aga mi hili gaiku edi mini hatam.

⁴Amma Yosafat a miɗini wiini pai na Izrayel pra: ku zilba dirini EPIƊ-ƊAI ɗa haw,

⁵nɵa pai na Izrayel a tapa ɗai na mini Alaw miya puɗu a zilbiɗi: mi kiɗi mi hili aŋ hitimiti Ramot na war Galaad ɗa ɗi, zaw mu hina hili ɗi? Ɗai na mini Alaw e wiyini seŋ e miɗi: Hala, Alaw aga a siti war tini pai.

⁶Yosafat a muɗa: Ɗif zamai na mini Alaw n’a kiɗa a zilbumu dirini war hlai hanɗa aŋ kir kai ɗi?

⁷Pai na Izrayel a midini wiini Yosafat: ɗif ktai a na n’a kiɗa a zilbumu dirini EPIƊ-ƊAI ɗa, amma ta mu daraŋ kai buri a muɗa seŋ na wuze na pɗem buriya duk kai, sai a na meefeŋ bas, a Mika n’ahini Yimla. Yosafat a miɗidini: pai, ku muɗa ɵa kai

⁸Pai na Izrayel a yikasi ɗif zi sda ktai a midini: hala witaw, yikasi Mika n’ahini Yimla ɗa.

⁹Pai na Izrayel gaini pai na Yuda e simni midini paramaiɗi zi pai gaini sapaɗi zi pai siɗi sa sa, e simni anene mini magala na wiiɗi Samariya midini hlai na gaini libi amai sa, ɗai na mini Alaw e zizimisi miɗi zum zum aŋ miɗiɗi seŋ na wuze ɗa.

¹⁰Sidkiyahu n’ahini Kenaana, n’a zizina miyok zi kawai a muɗa: EPIƊ-ƊAI a na muɗa maini nɵa: gaini miyok hanɗa aga ku hiɗi ɗai na Siriya haa ku vidiɗi edi kafa.

¹¹Ɗai na mini Alaw na zamai ɗe paŋ e miɗi seŋ na wuze maini na wiini nɵa lai. E miɗi ɓa: pai, hala hitimiti Ramot na war Galaad ɗa, aga ku rɗa amai, EPIƊ-ƊAI aga a sutuku war tuku.

¹²Ɗif n’e ɵiniŋ aŋ yikasi Mika a miɗini: tala, ɗai na mini Alaw gaini hlaiɗi kafa e miɗi na ɗa a seŋ na pɗem burini pai, a pɗem ɓa seŋ na wiiku tuku ɗa, a kata gaini na wiiɗi nagai lai, muɗa seŋ na wuze na pɗem burini pai lai.

¹³Mika a muɗa: gaini EPIƊ-ƊAI na karni zaŋ, wala n’Alawŋa aga a muɗaŋa ɗa, mu muɗa ɗa a ni ɵa lai.

¹⁴Mika a cosi sini pai Akab, pai a zilbaŋ: mi kiɗi mi hili aŋ hitimiti Ramot na Galaad ɗi? Zaw mu hina hili ɗi? A wiyini seŋ: Ki kiɗi ki hili, aga ki rɗi amai lai, ɗai na warɗi ɗa aga e si war tiki lai.

¹⁵Pai a miɗini: Mu yuva aŋ muɗuku ɵa kureɗ ɓa, ku haŋa wala muku ɓa seŋ na ku muɗaŋa ɗa a n’a halasi sini EPIƊ-ƊAI par jre jre.

¹⁶Mika a wiyini seŋ: mu tiliɗi aliɗi Izrayel gaini ɵiri amai midiɗi huwuŋ ɵar, maini adumai na ɗifni zi giɗimi aŋ kai nɵa. EPIƊ-ƊAI a muɗa: Ɗai hanɗa ɗai n’e ɵi wuzaɗi e ɗi kir kai. A pɗem ɓa ɗif paŋ a waya ahani jam.

¹⁷Pai na Izrayel a midini wiini Yosafat: mu muɗuku ya ka, a muɗa seŋ na wuze na pɗem buriya kai, sai na meefeŋ bas.

¹⁸Mika a muɗa pra: pɗem, tiyana ɵina seŋ na wiini EPIƊ-ƊAI ɗa, mu tala EPIƊ-ƊAI midiɗi paramaini zi pai dam gaini wazagai zi rgi na arbani hlai n’amai ɵimani na par lai, na par lai.

¹⁹EPIƊ-ƊAI a muɗa: ɗif n’aga zini midini Akab pai na Izrayel kapai a hala aŋ hitimiti Ramot na war Galaad a mrasi woni lai asiya ɗa? E si hiiniɗi kiini kiini kiini.

²⁰Nɵa seze ktai a halasi a ɗiya wuzani EPIƊ-ƊAI a muɗa: Ta aga mu zini midini. EPIƊ-ƊAI a zilbaŋ: Gaini yel na maɵa maɵa ɗa?

²¹A waya seŋ a muɗa: aga mu hala, mu za sa aŋ seze z'ales war miiɗi ɗai na mini Alaw na wiini paŋ. EPIƊ-ƊAI a midini: gaini futini tar, aga ku nava, hala za maini na ku hiinaŋ ɵa.

²²Na ɓa EPIƊ-ƊAI a wa seze z'ales war miiɗi ɗai na mini Alaw na wiiku, a siŋka ɓa EPIƊ-ƊAI gaini midini dama a firiya ɓa sai a ɵinasi gir muduku.

²³Sidkiyahu n’ahini Kenaana, a torosi sini Mika gobi, a ɵeɓaŋ galaini a muɗa: seze na wiini EPIƊ-ƊAI a niyaɗi edi sa par aŋ muɗa gaiku gaiɗi futi na maɵa ɗa?

²⁴Mika a wiyini seŋ: pɗem, mefeŋ na ku fakali aŋ ŋoya blaŋ blaŋ war dalam ɗa, arku aga a talaŋ.

²⁵Pai na Izrayel a muɗa: yimi Mika ɗa, kiŋni wiini Ammon n’abaini fuŋ n’abai gaini Yuwas n’ahini pai,

²⁶ki miɗiɗi ɓa, pai a na muɗaɗi maini nɵa: ɗif hanɗa ki ɵiŋ war daŋgai, ki sini simi mini viya kai, ki sini peŋ mini agwi lai, yem mini agwi lai, haa mu cosi aha jam.

²⁷Mika a miɗini: na ɓa ku wayasi li aha jam ɗa, a na EPIƊ-ƊAI a muɗa nkai ɗa zaŋ. Asakal par a muɗa, tiki ɗai paŋ ki ɵini!

²⁸Pai na Izrayel gaini Yosafat pai na Yuda, e hili aŋ hitimiti Ramot na war Galaad.

²⁹Pai na Izrayel a miɗini wiini Yosafat: mu bunda sapa na sa pla kapai mu niya war hatam lai, tuku ɗa wa sapaku zi pai suku. Pai na Izrayel a wa sapa zamai sini a niya war hatam.

³⁰Pai na Siriya a sa miɗi wiiɗi abakai na midiɗi ɗai zi dibiri saret zi gaw ɗa ɓa: e tiki tiɗi sini arwagwi kaalai, ɗif n’abai kaalai, sai e piyi ɗa a pai na Izrayel.

³¹Won hlai na abakaiɗi ɗai zi dibiri saret zi gaw e tili Yosafat ɗa, e miɗi: pai Izrayel ɗa a na, e gûniŋ amlai gun kapai e hitimiŋ, amma Yosafat a tika pini a ɗuula. EPIƊ-ƊAI a luwiini ɗuwal, Alaw a bindiɗi arɗi edi sini par.

³²Won hlai n’abakaiɗi ɗai zi dibiri saret zi gaw e tili ɓa a pai na Izrayel ɗa kai ɗa, e yimi siɗi edi sini par e hiniŋ.

³³Amma ɗif ktai a ɵiɓitiɗi ɓirwiini kadai nɵa te hala te niya arɗi safaaia ɗaw, te yima pai na Izrayel ɗa. Pai a midini wiini ni n’a dubura saret zi gaw na wiini: bunda arku, kaŋa edi war baŋa, mu ɓulka ɓlak.

³⁴Hatam na war yuvai hanɗa a za gdaŋ gara, pai na Izrayel a hina amai war saretaini zi gaw ɵa zaw wuzaɗi ɗai na Siriya haa koskoi, asakal par hlai na futi te nawa sek ɗa a mra lai.