Read Mousgoum Labar na war yivai n’ag'aŋ sulu 19 Bible Online

Labar na war yivai n’ag'aŋ sulu 19 - Mousgoum bible

Labar na war yivai n’ag'aŋ sulu 19

¹Yosafat pai na Yuda a waya ahani a Yeruzalem jam.

²Ɗif na mini Alaw zi gadai ktai Yehu n’ahini Hananiya a niyasi anene mini a midini: tuku ku zina ɗa piɗi ɗai na maafanaiɗi? Ku diriɗi ɗa e ɗi gawni EPIƊ-ƊAI ɗi? Buri hanɗa, hiy na wiini EPIƊ-ƊAI aga a halasi muduku.

³Gaini hanɗa paŋ, ku za sda zamai na pɗamai ya lai. Ku ya luwuŋ zi pi z'alaw Akera edi midini afti ku par, ki siti agulku aŋ paya Alaw lai.

⁴Yosafat a sumna aha war Yeruzalem, asakal par a niya edi aŋ guna arbaɗi ɗaini, a tikasi pini a Berse ɓa par haa sini hlai zi huwuŋ na wiini Efrayim. Awayasi hiiniɗi ɗai sini Epiɗ-ɗai Alaw na wiiɗi tamaini.

⁵A mula paakai zi sariya midini aftini paŋ, war fuŋ n’abakai zi ɵaga na Yuda kafa.

⁶A miɗiɗi wiiɗi paakai zi sariya: ki tiki hangalki sini sda n’aga ki ziŋ ɗa, buri ɓa sariya na ki ziti ki ziti na te wiini ɗif kai, amma te wiini EPIƊ-ƊAI, a ni n’aga a zina piki war ziɗi sariya hanɗa.

⁷A pɗem ɓa tiyana ɗa, hunai na pini EPIƊ-ƊAI te za warɗi agulki. Yimi gadai hanɗa ki zi pini lai.

⁸Won hlai n’a wayasi war Yeruzalem a za nɵa lai, a miliɗi Levitekai gaiɗi paakai zi ɓaka gaiɗi tamaini dalam zamai zamai warɗi Izrayel kapai e ziti sariya maini n’EPIƊ-ƊAI a dara ɗa nɵa. E zizini seŋ n’a na hala kai arnaɗi ɗai na war Yeruzalem ɗa lai.

⁹Yazafat a siɗi gadai maini nɵa: Tiki aga ki zi sda hanɗa war hunai na pini EPIƊ-ƊAI, war jre, gaiɗi agul ktai lai.

¹⁰Seŋ paŋ n’a na hala kai, na tawalakaiki n’e ɗa war fuŋ n’abakai aga e kiŋsi wuzaki, koo ɓa a fiɗini humok, zaw ɓa a sispai na midini gadai zi ɗû zaw na midini zi ɗiyi ɗi ɗa, ki hitriɗi kapai e zi meefeŋ arni EPIƊ-ƊAI kai, kapai hiy na wiini a halasi miɗiki gaiɗi tawalakaiki kai. Ki zi maini hanɗa nɵa kapai ki zi meefeŋ arni EPIƊ-ƊAI kai.

¹¹Pai zi ɓaka n’abai, Amaniyahu ɗa aga a za aŋ abaiki, a ŋa midini wazagai na wiini EPIƊ-ƊAI paŋ. Zebadiyahu n’ahini Ismayel abai na midini dalam na Yuda ɗa a ŋa midini wazagai na wiini pai paŋ lai. Levitekai aga e ɵi wuzaki maiɗi ɗai n’e siɗi gadai gara nɵa lai. Ɗiyi gdaŋ, zi maini hanɗa nɵa, EPIƊ-ƊAI aga azna pini ni n’a za pɗem ɗa.