Read Mousgoum Labar na war yivai n’ag'aŋ sulu 2 Bible Online

Labar na war yivai n’ag'aŋ sulu 2 - Mousgoum bible

Labar na war yivai n’ag'aŋ sulu 2

¹Salmun a mula ɗai zi libi zak dubu muguzak, zi gɵi ali-fuŋ sini huwuŋ par dubu mitwis, n’e tili sda piɗi par dubu hu gaini miya ɵaara.

²Salmun a ɵina ɗai sini Hiram pai na Tirus a midini: tuku ku za sda gaini David n’apa, ku ɵininisi luwuŋ Sedre kapai a rga dalam n’a sumna woni.

³Amma ta tiyana ɗa mu firiya mu rga Dalam wiini Epiɗ-ɗai Alaw na wiya, kapai a hina aŋ wiini, kapai e yini wazagai zi lûgûzi woni, kapai e mili peŋ n’e miliŋ midini tabel wiini EPIƊ-ƊAI woni, kapai e zi ɓaka zi yi na gorof par gaini na koskoi lai woni, kapai e zi Sabbat, merfeŋni tile, gaini fet n’e ziŋ burini Epiɗ-ɗai Alaw na wiyi lai woni, a za maini hanɗa nɵa haa kureɗ aha war Izrayel.

⁴Dalam na mu dara mu rgaŋ ɗa a za fu na Dalam n’abai, buri Alaw na wiyi ɗa abai a sûwiɗi alawai na zamai paŋ.

⁵Nɵa ɗif na gdaŋni a kiɗa buri a rgini Dalam ɗa asiya ɗa? Na ɓa hlai n’amai gaini abaini paŋ a kiɗa a tikaŋ kai ɗa, ta mu siya lai ɗa na kapai mu rgini Dalam ɗa, na ɓa a na buri yiini ɓaka kai ɗa.

⁶Tiyana ɗa, ɵinaŋasi ɗif n’a siɗa sdani or, arzaŋ, kiiya, kawai. N'a sɗa sdani sapa zi zi na mekele purpur, na mekele keŋ gaini na mekele cih cih, n’a sɗa kilɗini wazagai, kapai a za sda gaiɗi nagai na yalakai n’e siɗi sda n’e ɗ a gaya war Yuda, war Yeruzalem lai, na David n’apa a viriɗi ka.

⁷Slenaŋasi luwuŋ Sedre, luwuŋ sipre gaini luwuŋ santal lai, buri mu sɗa ya ɓa ɗaiku ɗa e siɗi bilini luwuŋ na war Liban par gara, ɗaiŋa aga e hili ɗi e zi sda gaiɗi ɗaiku lai.

⁸Kapai e piyiŋasi luwuŋ viya ta, buri Dalam na mu firiya mu rgaŋ ɗa a za fu na abai, zuf gara lai.

⁹Tala wiiɗi ɗai n’e bili luwuŋ mu siɗi algama kilo dubu miliyon ɵaara, orge kilo dubu miliyon ɵaara, vin litir dubu miya mitwis, emel litir dubu miya mitwis lai.

¹⁰Hiram pai na Tir a wiyini seŋ wiini Salmun war ɗû a miɗini: EPIƊ-ƊAI a tukuku midiɗi ɗaini aŋ pai buri ɓa a diriɗi gara.

¹¹A muɗa pra: Tese sini Epiɗ-ɗai Alaw na wiiɗi Izrayel n’a za hlai n’amai gaiɗi yai, n’a sini ahi zi yel, zi hangal, zi siɗi lai wiini pai David, n’aga a rga Dalam wiini EPIƊ-ƊAI, dalam zi pai wiini ni lai.

¹²Tiyana mu na ɵenukuɗi Hiram-Abi, a ɗif n’a siɗa sda ni gara, yel gara lai.

¹³Emini te na war pinzibani Dan, epini a ɗif na Tirus par, a sɗa sdani or, arzaŋ, kiiya, kawai, alini fuŋ, luwuŋ, sdani sapa na mekele purpur, na mekele cih cih, sapa leŋ gaini sapa na mekele keŋ. A sɗa kilɗini wazagai, sda n’a sali war tini paŋ a vaŋ amai, aga a za sda gaiɗi ɗai zi siɗi sda na wiiku gaiɗi na wiini Epin-geza David n’apuku lai.

¹⁴Algama na gaini orge, emel gaini vin lai n’Epin-geza a muɗa gaini ɗa, a ɵenaŋsi tiyana wiiɗi ɗai zi sda.

¹⁵Tiyi ɗa aga mi ɗûkli luwuŋ na Liban par midini hazaku ta, mi finiŋɗi agoɗom ɗaw haa a Jaffa ta, woni par tuku aga ku lubaŋ walaku aha Yeruzalem sek.

¹⁶Salmun a pɵiɗi ɗai na morkokoi n’e ɗa midini afti na Izrayel paŋ, asakalni pɵi na David n’epini a zaŋ ɗe par, a nava ɗai dubu miya gaini ɵim pi hu gaini miya ɵaara.

¹⁷A mula ɗai dubu muguzak aŋ libi zak, dubu mitwis aŋ gɵi ali-fuŋ sini huwuŋ par, dubu hu gaini miya ɵaara buri e tili sda piɗi ɗai lai.