Read Mousgoum Labar na war yivai n’ag'aŋ sulu 20 Bible Online

Labar na war yivai n’ag'aŋ sulu 20 - Mousgoum bible

Labar na war yivai n’ag'aŋ sulu 20

¹Asakal hanɗa, Mowabitekai gaiɗi Ammonitekai gaiɗi Maonitekai lai e hilisi buri e hitimi Yosafat.

²Ɗai e hilisie miɗini wiini Yosafat: Vok n’abai a na halasi muduku anene duɓani yem-ra n’abai ɗa par, a Aram par, tiyana e ɗa a Hatsatson-Tamar a dara muɗa En-Gedi.

³Yosafat hunai te yimaŋ, a paya futi aŋ zilba dirini EPIƊ-ƊAI. A miɗiɗi wiiɗi ɗai na Yuda gai hlaiɗi buri e tiki sai.

⁴Ɗai na Yuda e tipisi kafa buri e zilbi dirini EPIƊ-ƊAI. Ɗai na war fuŋ n’abakai na Yuda paŋ e hilisi bur e zilbi dirini EPIƊ-ƊAI.

⁵Yosafat a ɗiya arbani diŋgi na wiiɗi ɗai na Yuda gaiɗi na Yeruzalem, amlai war dalam na wiini EPIƊ-ƊAI, war pakatai na hahai.

⁶A muɗa: EPIƊ-ƊAI, Alaw na wiiɗi tamaiyi, Alaw n’amai ɗa ku tuku kai ɗi? Ku ŋa midini midini pinziba paŋ ku tuku kai ɗi? Gdaŋ gaini spak paŋ aŋ war tuku. Ɗif n’a kiɗa a ɗiya muku aŋ kai.

⁷Ɗai n’e ɗika midini afti hanɗa, ku birgiɗi midini aftiɗi par, kapai ku sa aftiɗi wiiɗi aliɗi Izrayel ɗa ku tuku kai ɗi? Ku sa afti hanɗa wiini pinzibani Abraham n’a duruku gara ɗa ku tuku kai ɗi?

⁸E simni warni, e rgi tempel buriku e miɗi:

⁹Na ɓa gir na maini gaw zaw, vlak zaw wiyamai zaw, gir ɗi a niviyi li ɗa, aga mi hilisi wuzani dalam hanɗaˆ a dara muɗa wuzaku, buri ɓa yikiku a na woni. War giryi par aga mi ɗûûli suku, tuku aga ku ɵina tuwiyi, ku pliyi edi lai.

¹⁰Ammonitekai gaiɗi Mowabitekai gaiɗi ɗai na midini hlai zi huuŋ na Seyir par, na tuku ku hiniɗi aliɗi Izrayel aŋ niyi aha midini aftiɗi kai, won hlai n’e hilisi edi war Egipte par ɗa, buri ɓa e vigi midiɗi ɗaw, e tûûriɗi edi kai ɗa,

¹¹nagai ɗa teseɗi n’e firyi e ziŋyi ɗa, e firyi ɓa e birgiyi edi midini afti na wiiku, na ku siŋyi par.

¹²Alaw na wiyi, ku siŋka jreyi edi wuzani arɗi ta kai ɗi! Buri ɓa wuzani vok n’abai n’na halasi midiyi hanɗa, tiyi gdaŋyi aŋ kai, mi siɗi wala ktai na mi ziŋ kai. Aryi aŋ gai hiɗiki na ɗa amai suku.

¹³Ɗai na Yuda e ɵiɓisi edi wuzani EPIƊ-ƊAI gai hlaiɗi kap, falakaiɗi lai, aliɗi lai, ɗif a hinasi edi kai.

¹⁴Nɵa Seze na wiini EPIƊ-ƊAI a niya sini Yahaziyel, n’ahini Zakariyas n’ahini Benaya, n’ahini Yeiel, n’ahini Mattaniya, na Levite, ktai arbaɗi pinzibani Asaf ɗa par.

¹⁵Yahaziyel a muɗa: Ziɓiri pɗem, tiki ɗai na Yuda paŋ, gaiɗi ɗai na Yeruzalem, gaiku tuku Yosafat lai, EPIƊ-ƊAI a na muɗa maini nɵa: Ki hûni kai, ki hini agulki a giɵira wuzani vok n’abai hanɗa kai. Buri ɓa hatam hanɗa a na wiiki kai, amma a na wiini Alaw.

¹⁶Dawai ɗa, ki hili edi miɗi, e vigisi na ɗa warɗi futi na Sit ɗa par ɗaw, aga ki niviɗi edi wulaɗi avai na na te na wuzaɗi Yeruwel ɗa.

¹⁷Tiki aga ki hitimi kai. Ki giri gara, ki ɗiyi ca ca aŋ tili pli n’EPIƊ ƊAI aga a pliki edi gaini ɗa. Tiki ɗai na Yuda gaiɗi na Yeruzalem, ki hûni kai, ki hini agulki a giɵiɗa kai. Dawai, ki niyi edi miɗi, EPIƊ-ƊAI aga a za gaiki.

¹⁸Yosafat a goɓa azumai, a pa arni azumai midini afti, ɗai na Yuda gaiɗi na Yeruzalem paŋ e pi kurnaiɗi azumai wuzani EPIƊ-ƊAI aŋ hûrgi azuma wuzani.

¹⁹Levitekai na war piɗi humuni na wiini Kehat gaiɗi na wiini Kore par, e fiki amai aŋ kûli Epiɗ-ɗai Alaw na wiiɗi Izrayel gaini gdaŋɗi.

²⁰E fiki gorof, e hili edi war basga na Tekowa. Wuzani hiliɗi Yosafat a ɗiya amai zaw a muɗa: Tiki ɗai na Yuda gaiɗi na Yeruzalem, ɵini pɗem, ki pɵi ɗa midini Epiɗ-ɗai Alaw na wiiki, aga a siki gdaŋ. Ki Ɗiyi yimiki midiɗi ɗai na min Alaw ɗa, aga ki rɗi amai.

²¹Asakal par, aŋ bonu gaiɗi ɗai ɗa, e kiti miɗi. E mili ɗai zi yama, na wiini EPIƊ-ƊAI ca ca, n’e sikol sin Alaw buri ŋiliɗi sɗik na wiini. Nagai e niyi edi, edi wuzaɗi askarai ta, e miɗi: Kûli EPIƊ-ƊAI, Buri pɗemni a na haa hlai n’a vada kai.

²²Sarti na ɗai e tiki piɗi gaini ɗuwal gaini yama zi kol lai ɗa, EPIƊ-ƊAI a hinasi turli aha arbaɗi Ammonitekai gaiɗi Mowabitekai gaiɗi ɗai na midini hlai zi huwuŋ na Seyir par, n’e hilisi war Yuda, e fiɗi marɗi arbaɗi marɗi.

²³Ammonitekai gaiɗi Mowabitekai e fiki siɗi nagai na midini hlai zi huwuŋ na Seyir ɗa, e fiɗiɗi edi kafa, won hlai n’e vidi li gaiɗi ɗa, e fiki e fiɗi marɗi arbaɗi dama lai.

²⁴Won hlai na ɗai na Yuda e cû war hlai n’e kiɗi e tili arɗi edi war basga sek gaglai ɗa, won hlai n’e tili vokɗi ɗai ɗa, a hina ɗa a kopoŋ azumai waŋ waŋ. Ɗif ktai maa a hina karni piɗi kai.

²⁵Yosafat gaiɗi ɗaini e hili e mili wazagaiɗi n’a hina ɗa. E nivi wazagai viya: wazagai n’ezini puɗu puɗu, gaini der zamai zamai viya gaini sapa gaini wazagai na pɗamai na wura caŋ gara lai. Wazagai n’e niviŋ ɗa a luba kai. E zi mefeŋ hu kapai e vidi gaini der hanɗa, buri ɓa anfu viya gara.

²⁶War mefeŋ n’ag'aŋ puɗu ɗa, e diŋgi war huduk na Beraka, woni e si kol sini EPIƊ-ƊAI, nɵa e si yiki wiini hlai ni ɗa ɓa huduk na Beraka a dara muɗa "Tese", yiki hanɗa a hina sini sini ɵa haa girna.

²⁷Ɗai na Yuda gaiɗi na Yeruzalem gaini Yosafat abai na wuzaɗi lai e wiyisi aha war Yeruzalem gaini firyi. Buri ɓa EPIƊ-ƊAI a siɗi rɗi n’amai midiɗi gawɗi.

²⁸E niyisi aha war Yeruzalem gaini adill gaini gaŋgraŋ gaini faana lai haa amlai war tempel na wiini EPIƊ-ƊAI.

²⁹Won hlai na pinziba na zamai, na midini afti, a ɵina ɓa, EPIƊ-ƊAI a hitimiɗi gawɗi Izrayel ɗa, hunai na wuzani Alaw te yimiɗi gara.

³⁰Afti na wiini pai Yosafat ɗawwa ɗa a sumna ɵeɗ, Alaw na wiini a sini si-n’amla war hagani paŋ par.

³¹Yosafat a suma pai midiɗi Yuda. A suma pai sek ɗa, buzani doogo doogo hu pi ɵim. A za buza aha war Yeruzalem buza doogo caaɓa pi ɵim. Emini yikiɗi ɓa Azuba, t'ahini Silhi.

³²A tikiti te futi na wiini Asa na tiyni, ezini a wula duk kai zaŋ. A za sda na pɗamai n’a sa firiyi wiini EPIƊ-ƊAI.

³³Gai hanɗa paŋ hlai zi ɓaka ɗa a vada edi kai, ɗai ɗa hiiniɗi a naga sini Alaw na wiiɗi tamaiɗi kai.

³⁴Labar na midini Yosafat, na war pi zi tiki par haa sini vidini aŋ gai ɗû war labar na midini Yehu, n’ahini Hanani n’aŋ war maktuɓ na wiiɗi paakai na Izrayel ɗa;

³⁵Asakal hanɗa, Yosafat pai na Yuda a tapa gaini Akaziyas pai na Izrayel. Pai hanɗa payaini meefeŋ.

³⁶A tapa gaini buri e zizini hulamai n’abakai n’a hala war Tarsis. E zizini hulamai n’abakai hanɗa a Etsiyon-Geber.

³⁷Nɵa Eliyezer n’ahini Dodavahu na war Maresa par a muɗa seŋ na wuze midini Yosafat a muɗa: buri na ɓa ku tapa gaini Akaziyas ɗa, EPIƊ-ƊAI aga a tuura wazagai na ku zaŋ ɗa edi. Hulamai n’abakai a kiɗa a hala war Tarsis kai, a haɗa edi.