Read Mousgoum Labar na war yivai n’ag'aŋ sulu 21 Bible Online

Labar na war yivai n’ag'aŋ sulu 21 - Mousgoum bible

Labar na war yivai n’ag'aŋ sulu 21

¹Won hlai na Yosafat a mra li ɗa, e piŋ gaiɗi tiyakaini, war "Fuŋ n’abai na wiini David". Yoram n’ahini a suma paiwar balamni.

²Yoram ɗa tawalakaini e ɗifu viya, e ɗi alini Yosafat lai. Yikiɗi a na maini nɵa: Azariya, Yeiel, Zakariyas, Azariyahu, Mikael gaini Sefatiya lai.

³Epiɗi a hiniɗi ka wazagai viya na zi arzaŋ na zi or, gaini wazagai na pɗamai na wûrini caŋ gara lai, a hiniɗi ka fuŋ n’abakai zi ɵaga paŋ, aha war Yuda. Amma a hiniti pai ɗa tini Yoram buri ɓa a ahini n’abai ɗa.

⁴Won hlai na Yoram a tikiti pai a wiini epini li a bunda li gdaŋ lai, a fiɗiɗi tawalakaini edi, gaiɗi ɗai zamai n’abakai na war Izrayel lai.

⁵Won hlai na Yoram a suma pai sek ɗa buzani doogo doogo hu pi sulu. A za buza aha war Yeruzalem mitwis lai.

⁶A tikiti te futi na wiiɗi paakai na war Izrayel ɗa, a za maini Akab nɵa. Buri ɓa munini t'ahini Akab. A za wazagai n’a sa firyi wiini EPIƊ-ƊAI kai viya.

⁷Amma EPIƊ-ƊAI a firya a tuura pinzibani David edi kai, burini bonu n’a zaŋ gaini David ɗa, buri a muɗa ɓa aga a za aŋ pai ɗa a ɗif na war pinzibaku par ɵa.

⁸War mefeŋ ni ɗa, ɗai na Edom e zi hiy siɗi ɗai na Yuda ta, e tiki pai midiɗi kiiɗi ta.

⁹Yoram a hala gaiɗi abakai askaraini gaini saretaini zi gaw ɗa lai. E fiki duvuk, gaiɗi abakaini ɗa, e hili e fiɗiɗisi ɗai na Edom n’e gûniɗi azumai ɗa edi gaiɗi abakai na midiɗi saretai ɗa lai.

¹⁰Ɗai na Edom e fiki amai siɗi ɗai na Yuda, e firyi ɓa e ŋi midiɗi kai, e hini ɵa haa girna. Libna te faka amai siɗi ɵa lai, buri ɓa e hini Epiɗ-ɗai Alaw na wiiɗi tamaiɗi edi mak.

¹¹Yoram a ziina hlai zi ɓaka amai midini hlai zi huwuŋ na Yuda; a kiɗi ɗai na Yeruzalem gaiɗi ɗai zamai a Yuda aŋ tirɗi edi pini alawai na zamai.

¹²Ɗif na min Alaw Eliyas a ɗo sini a miɗini: Epiɗ-ɗai Alaw na wiini David n’apuku a na muɗa maini nɵa: buri na ɓa ku tikiti futi na wiini Yosafat n’apuku gaiɗi na wiini Asa pai na Yuda ɗa kai,

¹³amma ku tikiti ɗa te futi na wiiɗi paakai na Izrayel ɗa, buri ɓa ku kiɗi ɗai na Yuda gaiɗi na Yeruzalem aŋ bindi arɗi edi sini alawai na zamai lai, maini na Akab a zaŋ ɗa ɵa lai, buri na ɓa ku fiɗiɗi tawalakaiku n’epiki ktai, na pɗamai e suwuku tuku ɗa edi;

¹⁴EPIƊ-ƊAI aga a hinasi gir n’abai midiɗi ɗaiku, midiɗi aliku gaiɗi falakaiku gaini wazagaiku paŋ,

¹⁵tuku mal aga a hinasi veglek na gdaŋai muduku. Veglek aga a tika sini aruku, a riya amai wuzani sek sek, haa aru na warku a niyasi edi warku par.

¹⁶EPIƊ-ƊAI a fikiɗisi Filistrekai gaiɗi Arabai n’e ɗa gobi gaiɗi ɗai na Etiopiya lai aŋ hitimi Yoram.

¹⁷E hilisi e cikiti Yuda, e niyi aha warɗi e mili wazagai n’a na aha war dalamni pai ɗa lai, gaiɗi alini gaiɗi falakaini paŋ lai. a hina piɗi ɗa a Yowakas ahini n’agwi na piɗi tawalakaini debe ɗa.

¹⁸Asakal hanɗa, EPIƊ-ƊAI a hinasi veglek na wiini aru a yimaŋ, a kiɗa a zuula kai.

¹⁹Mefeŋ mefeŋ paŋ ɗa a riya amai sek sek. Haa sin dibini buza n’ag'aŋ sulu ɗa, aru a warni a niyasi edi warni par tini veglek hanɗa. A mra war kayai n’abai na wiini veglek. Ɗaini ɗa e yi wazagai zi ɗûgûdi zi lûgûzi maini n’e yiŋ buriɗi tamaini nɵa kai.

²⁰A suma pai sek ɗa buzani doogo doogo hu pi sulu, a ŋa midiɗi Yeruzalem buza muguzak lai. Mrini ɗa a fuɗa sini ɗif kai sam. E pin war fuŋ n’abai na wiini David, amma warni waŋ na wiiɗi paakai kai.