Read Mousgoum Labar na war yivai n’ag'aŋ sulu 22 Bible Online

Labar na war yivai n’ag'aŋ sulu 22 - Mousgoum bible

Labar na war yivai n’ag'aŋ sulu 22

¹Ɗai na Yeruzalem e tiki Akaziyas ahini Yoram na dabai aŋ pai war balamni. Buri vokɗi askarai n’e hilisi gaiɗi arapai n’e niyi aha war kaŋɗi askarai na Yuda, e fiɗiɗi tawalakaiɗi n’abakai edi kafa. Akaziyas n’ahini Yoram a bunda aŋ pai war Yuda maini nɵa.

²Buzani a nafu puɗu pi sulu Won hlai n’a bunda aŋ pai, a sumna aha war Yeruzalem buza ktai, emini yikiɗi ɓa Ataliya, t'ahini Omri.

³Ni lai a tikiti ɗa te futi na wiiɗi ɗai na war pinzibani Akab ɗa, buri ɓa emini te sini ɗa a gadai na maafanai.

⁴A za wazagai na maafanai arni EPIƊ-ƊAI maiɗi ɗai na war pinzibani Akab ɗe ɵa. Asakal mrini epini par e hini aŋ ɗai n’e sini gadai ɗa e ɗi nagai, amma a gadai n’a baŋ edi sek.

⁵Pini na ɓa a yima gadaiɗi gara ɗa, a hala gaini pai na Izrayel Yoram n’ahini Akab aŋ hitimi Azaiel pai na Siriya war Ramot na war Galaad. Amma ɗai na Siriya e zini wuruk wiini Yoram,

⁶nɵa a wayasi war Yizreyel aŋ zuula wuruk n’e ziŋnisi a Rama par, hlai n’e hili aŋ hitimi Hazayel pai na Siriya. Akaziyas n’ahini Yoram pai na Yuda a hala war Yizreyel aŋ ɗugula Yoram n’ahini Akab n’aŋ gaini wuruk.

⁷Hili na Akaziyas a hala aŋ ɗugula Yoram ɗa, a hûgûni pini ɗa a Alaw ɓa kapai a ɵinasi gir midini. Won hlai n’a co li, gaini Yoram e hili sini Yehu n’ahini Nimsi, ni n’EPIƊ-ƊAI a varaŋ aŋ sumiti pai, aŋ vidiɗi pinzibani Akab ɗa edi lai

⁸Won hlai na Yehu a na zitiɗi gir wiiɗi ɗai na war pinzibani Akab buri meefeŋɗi ɗa, a niviɗi ɗai n’abakai n’e ɵi wuze na war Yuda par gaiɗi aliɗi tawalakaini Akaziyas n’e ɗa war ɵeŋni pai ɗa a fiɗiɗi edi.

⁹E tiki futi pini Akaziyas, e niviŋsi gaini ŋûyi cok war Samariya, e yimiŋsi, e kiŋsi wiini Yehu e fiɗiŋ edi, e piŋ lai. War hiini na ɓa a na war pinzibani Yosafat pai n’a paya EPIƊ-ƊAI gaiɗi agulni paŋ. Ahani Akaziyas ɗa, ɗif n’ahina n’a kiɗa a simiti pai aŋ kir kai.

¹⁰Won hlai na Ataliya n’emini Akaziyas te sɗa ɓa ahiɗi a mra su, te tika piɗi aŋ fiɗiɗi aliyagoi na maɵagai na war pinzibani pai.

¹¹Amma Yehosabat n’aiini pai te yima Yowas n’ahini Akaziyas, te zogon edi arbaɗi alini pai n’aga e fiɗiɗi edi par, te ŋoyaŋ amlai warɗi dilimi zi feŋ na war tempel gaini muni na te wuulaŋ ɗe lai. Nɵa Yehosabat n’ahini pai Yoram na munini pai zi ɓaka Yoyada, na tawalni Akaziyas te yimaŋ edi arɗi Ataliya par kaai, te kiɗa te fuɗaŋ kir kai.

¹²Yuwas a hina gaini ŋûyi cok warni Dalamni Alaw ɵa haa buza ɵaara tiɗi nagai n’e ŋûyiŋ ɗa. War mefeŋ ni ɗa Ataliya te ŋa midini afti ɗa paŋ.