Read Mousgoum Labar na war yivai n’ag'aŋ sulu 24 Bible Online

Labar na war yivai n’ag'aŋ sulu 24 - Mousgoum bible

Labar na war yivai n’ag'aŋ sulu 24

¹Won hlai na Yuwas a simiti pai sek buzani muguzak, a umna ɗa aha war Yeruzalem haa buza puɗu. E mini yikiɗi ɓa: Sibiya, te na Beer-seba par.

²Won hlai na pai zi ɓaka Yehoyada aŋ karni hai ɗa, Yuwas a za wazagai na pɗamai arni EPIƊ-ƊAI.

³Yehoyada a milini falakai wiini Yuwas sulu, Yuwas a wa ali na falakai gaiɗi na maɵagai lai gaiɗi viya.

⁴Asakal hanɗa, Yuwas a rga warni buri a zizina Dalam na wiini EPIƊ-ƊAI maini n’a naka avut ɗe nɵa.

⁵A tipiɗi paakai zi ɓaka gaiɗi levitekai lai a miɗiɗi: hili war fuŋ n’abakai na Yuda paŋ, ki tipisi farai tiɗi ɗai na Izrayel par kapai buza buza paŋ ki zizini Dalam na wiini Alaw na wiiki gaini. Zi hanɗa witaw! Amma levitekai e fiki amai pini witaw kai.

⁶Nɵa pai a yika pai zi ɓaka Yehoyada a midini: Tuku ku ɗiya arɗi levitekai gdaŋ buri e kisi tar war Yuda gaiɗi Yeruzalem par maini na Musus ɵeŋ na wiini EPIƊ-ƊAI gaiɗi ɗai na Izrayel paŋ e ɗiyiŋ buri zizinini gororo n’e mili ali-fuŋ zi bonu warni ɗa kai buri maɗa?

⁷Buri Ataliya muni na subupi gaiɗi ɗai na piɗi e hini Dalamni Alaw a tuura edi, wazagai na wiini Alaw n’amlai war Dalamni EPIƊ-ƊAI ɗa maa e miliŋ e zi sda na wiini Baal gaini.

⁸Pai a sa miɗi buri e zi kes ktai, e tikiŋ anene mini magala na wiini Dalam na wiini EPIƊ-ƊAI par ta,

⁹e si miɗi edi midini afti na Yuda gaini na Yeruzalem lai buri e kisi tar na Musus ɵeŋ na wiini Alaw a tikaŋ midiɗi Izrayel Won hlai n’e ɗisi edi war basga par.

¹⁰Abakai zi ɵi wuze paŋ gaiɗi ɗai paŋ, e firiyi gara, e kisi farai war kes haa kes te va.

¹¹Won hlai na levitekai e tili warɗi kes war yikini pai ɗa, e nivi farai ɗa a suwa suwai. Ɗif zi ɗû wazagai na wiini pai gaini ɗif zi giɗimi godai na wiini pai n’abai zi ɓaka e hilisi e mili farai warɗi kes ɗa edi, kapai e wiyiti war balamɗi. Mefeŋ paŋ ɗa e ziŋ maini nɵa, haa e nivi farai viya.

¹²Pai gaini Yehoyada e si farai hanɗa tiɗi n’abakai na midini sda na war Dalam na wiini EPIƊ-ƊAI ta, nagai e virgiɗi ɗai zi kirhi alini fuŋ gaiɗi ɗai zi sda na zamai zamai kapai e zizini Dalam na wiini EPIƊ-ƊAI war ezini n’avut, e virgiɗi ɗai n’e siɗi sdani kawai gaiɗi n’e siɗi sdani kiiya lai kapai e zizini Dalam hanɗa gaini futini pra.

¹³Nagai na sda a sa war tiɗi e fiki gaini sda, sdaɗi a hala gaini futini lai. E zizini Dalamni Alaw haa a waya warni ezini n’avut ɗa, gdaŋni maini n’avut ɗa ɵa lai.

¹⁴Won hlai na sda paŋ a vada li, e kisi pini farai n’a hina wuzani pai gaini Yehoyada, e zizini wazagai zamai zamai n’e zi sda gaini amlai war Dalam na wiini EPIƊ-ƊAI: Wazagai n’e zi sda gaini, n’e zi ɓaka zi yi gaini lai, grak gaini wazagai zi or, zi arzaŋ lai. Karni Yehoyada par ɗa, ɗai e zi ɓaka zi yi amlai war Dalam na wiini EPIƊ-ƊAI kûreɗ-kûreɗ.

¹⁵Yehoyada a luma buza ta haa a za wel kroh kroh, a mra sek na ɗa buzani miya gaini hu.

¹⁶E piŋ war fuŋ n’abai na wiini David war hlai zi pi na wiiɗi paakai buri a za pɗem aha warɗi Izrayel, a za pɗem sini Alaw sini Dalamni lai.

¹⁷Asakalni mrini Yehoyada, n’abakai n’e ɵi wuze na war Yuda e hilisi e hûrgi azumai wuzani pai, pai a yima miɗi na wiiɗi lai.

¹⁸E hini Dalam na wiini Epiɗ-ɗai Alaw na wiiɗi tamaiɗi edi mak, e siiwi tiɗi alawai zi luwuŋ zi pi gaini zi rgi lai. Nɵa buri meefeŋ hanɗa hiy na wiini Alaw a halasi midiɗi Yuda gaiɗi Yeruzalem.

¹⁹EPIƊ-ƊAI a ɵina ɗai na mini Alaw arbaɗi kapai e siŋkiɗi midini meefeŋɗi, e wiyiɗisi hiiniɗi sini lai, amma e zigi ɵimani mini kai.

²⁰Nɵa seze na wiini Alaw a niya sini pai zi ɓaka Zekariya n’ahini Yehoyada a faka amai arɗi ɗai a miɗiɗi, Alaw a na muɗa maini nɵa: tiki ɗa, ki hi amai midini gadai na wiini EPIƊ-ƊAI buri maɗa? Aga ki nivi kai, buri ki hini EPIƊ-ƊAI edi ta ɗa, Ni a hiniki edi mak lai.

²¹Ɗai e rgi miɗi midini, e fiɗiŋ edi gaini kriyit aha war pakatai na wiini Dalam na wiini EPIƊ-ƊAI pini miiɗi na wiini pai.

²²Pai Yuwas, midini a wula gaini pɗem na Yehoyada n’epini Zekariya a zaŋ sini ɗa, a fuɗa Zekariya ɗa edi, wuzani mrini Zekariya a muɗa: EPIƊ-ƊAI a n’a tala sda na ku na zaŋ na ɗa, aga a zilbaŋ war tuku lai.

²³Sini vidini buza, askarai na Siriya par e hilisi e hitimi Yuwas, e tiki afti na Yuda, e niyi aha war fuŋ n’abai na Yeruzalem. E fiɗiɗi ɗai n’abakai n’e ɵi wuzaɗi ɗai edi, der na pini hatam paŋ e ɵiniŋni wiini pai na Damas.

²⁴Paŋ ktai askaraiɗi Siriya e hilisi gaiɗi ɗai piɗi viya kai, amma EPIƊ-ƊAI a siɗi vokɗi askarai n’abai hanɗa war tiɗi buri e hini Epiɗ-ɗai Alaw na wiiɗi tamaiɗi edi mak. Askarai na Sirya e vi gir n’EPIƊ-ƊAI a dara a zaŋ sini Yuwas ɗa amai.

²⁵E hili sek ɗa e hiniŋ kaa war veglek n’abai, ɗaini zi sda e tipi miɗi midini buri felɗi alini pai zi ɓaka Yehoyada, e fiɗiŋ amai midini walani zi feŋ. Asakal n’a mra li e piŋ war fuŋ n’abai na wiini David, amma war hlai zi pi na wiiɗi paakai kai.

²⁶Nagai n’e tipi miɗi midini ɗa e ɗi miɗi: Zabad n’ahiɗi Simeyat na war Ammon par gaini Yehozabad n’ahiɗi Simrit na war Mowab par lai.

²⁷Yikiɗi alini, seŋ na miɗi ɗai na mini Alaw par viya n’a muɗa midini, zizinini Dalamni Alaw, hanɗa paŋ aŋ gaini ɗû war maktuɓ n’a za gaglai midini maktuɓ na wiiɗi paakai. Amasiyas n’ahini a suma pai war balamni.