Read Mousgoum Labar na war yivai n’ag'aŋ sulu 26 Bible Online

Labar na war yivai n’ag'aŋ sulu 26 - Mousgoum bible

Labar na war yivai n’ag'aŋ sulu 26

¹Ɗai na Yuda e tiki Oziyas aŋ pai war balamni Amasiyas n’epini, war mefeŋ ni ɗa buzani a na pi ɵaara.

²Asakal mrini epini par, Oziyas a tikitisi Elat, a rgiti amai, a wiyitisi war Yuda lai;

³Oziyas a suma pai sek buzani pi ɵaara, a ŋa aŋ pai aha warɗi Yeruzalem buza ɵim pi sulu. Emini yikiɗi ɓa: Yekoliya te n’a Yeruzalem par.

⁴A za wazagai na pɗamai arni EPIƊ-ƊAI kal kal maini n’Amasiyas n’epini a zaŋ ɗe nɵa.

⁵War mefeŋ na Zekariyahu a naka karni hai ɗa, Oziyas a paya Alaw gaiɗi agulni paŋ buri Zekariyahu a hitraŋ midiɗi hunai na pini Alaw, Won hlai n’a na paya Epiɗ-ɗai Alaw ɗa, Alaw ni ɗa a riyaŋ amai wuzani sek sek.

⁶A hala a hitima gaiɗi Filistrekai, a haɗa ɵaga na Gat, na Yabne gaini na Asdod lai azumai. Asakal par a rga fuŋ n’abakai war Asdod, ahaɗi Filistrekai lai.

⁷Alaw a liwiini ɗuwal war hatam na gaiɗi Filistrekai, arapai na war Gur-Baal gaiɗi Meyunitkai lai.

⁸Meyunikai e virgini tar wiini Oziyas buri yikini a wa haa aha miɗi Egipte ta, buri a bunda spak gara.

⁹Oziyas a rga poriyo na gaini ɵaga sini aha warɗi Yeruzalem amai midini magala na koŋni hlai, amai midini magala na wiini hlai na huduk, midini mini ɵaga n’a suwa edi lai.

¹⁰Asakal par a rga Poriyo edi war basga, a ɓula kalaŋ viya lai, buri a nafu gaini farani farai viya, a nafu gaiɗi ɗai zi hirim war hlai na huduk gaini hlai na plas lai, gaiɗi ɗai zi pi luwuŋ zi vin amai sini huwuŋ, war Karmel lai; buri ni ɗa a firiya hirim gara.

¹¹Oziyas a nafu gaini vokɗi askarai n’e kiɗi e hitimi, n’e kiɗi e zi sda z'askar, e ɗi gaini ɓûrwi war vok ta ta pini pɵani miliɗi na war sda na ɗif zi ɗû wazagai Yehiyel gaini Maseyahu ɗif n’a sɗa gara e ziŋ ɗa, abaiɗi askarai hanɗa yikini ɓa Hananiyahu a ktai arbaɗi ɗai na wiini pai.

¹²Pɵaɗi abakaiɗi pinziba n’e ŋi midini vokɗi askarai n’agulɗi a huna kai hanɗa e ɗa paŋ dubu sulu gaini miya ɵaara.

¹³Askarai na piɗi e ɗa ɗai dubu miya hu gaini muguzak gaini miya ɵim n’e kiɗi e hitimi gdaŋ agulɗi a huna kaalai, nagai e giɗimi pai buriɗi gawni n’e hilisi aŋ hitimiŋ lai.

¹⁴War niyiɗi n’edi mini hatam ɗa, Oziyas a ziziniɗi gamar, kawai, bogorai, safaaia, ɓaraw gaini kirnai na war viliyu.

¹⁵Oziyas a zizina Masine n’a na buri e tikiŋ amai midini Poriyo, midini koŋni hlai lai, a masini zi ɵiɓi ɓaraw zi bili kriyitai n’abakai lai, yikini a wa haa gaigai buri Alaw a zina pini gara haa a bunda aŋ pai na spakni abai gara.

¹⁶Pini spak n’a sa sini ɗa, kûlini-si a niya warni haa a ɓa edi, a ɵina mini Epiɗ-ɗai Alaw na wiini kir kai, a niya maa haa amlai warni tempel na wiini EPIƊ-ƊAI aŋ ya wala zi ɗûgûdi zi lûgûzi midini gûwiŋ n’e yiŋ woni.

¹⁷Pai zi ɓaka Azariyahu a niya amlai pini gaiɗi paakai zi ɓaka na wiini EPIƊ-ƊAI n’agulɗi a huna kai pini mitwis.

¹⁸E fiki amai sini pai Oziyas e miɗini: jamus, sdani ɓaka na wiini wala zi ɗûgûdi zi lûgûzi n’e yiŋ burini EPIƊ-ƊAI ɗa a wiiku tuku kai, a wiiɗi paakai zi ɓaka na war pinzibani Aaron n’e viri edi buri ɓaka hanɗa. Niya anene war hlai na sɗik par buri ku za na ɗa a sda na hi-hir wuzani arni Epiɗ-ɗai Alaw, a sda n’aga a suku kol kai.

¹⁹Oziyas a faka gaini hiy siɗi paakai zi ɓaka Won hlai na wala n’e yi wala zi ɗûgûdi zi lûgûzi warni aŋ tini ɗaw, Won hlai n’aŋ warni hiy ɗa midini arni a bla ɓlok ɓlok karɗi paakai zi ɓaka amlai war Dalam na wiini EPIƊ-ƊAI ɵimani gûwiŋ zi yi wala zi ɗûgûdi zi lûgûzi.

²⁰Pai zi ɓaka n’abai Azariyahu gaiɗi paakai zi ɓaka n’e ɗa gaini lai e mili arɗi sini e tili midini arni gaini bili ɓlok ɓlok, tizaw e birgiŋsi woni par, ni a purma aŋ niya anene buri EPIƊ-ƊAI a siŋkini spakni agwi.

²¹Pai Oziyas a hina war veglek ni ɵa haa sini mrini, buri veglek hanɗa, e tikiŋ edi war dilimi kiini ta, futi burini buri a waya amlai war Dalam na wiini EPIƊ-ƊAI t'aŋ kir kai. Yotam n’ahini, abai n’a ŋa midini dalam na wiini pai ɗa a hina aŋ ŋa midiɗi ɗai na midini afti ɗa a ni.

²²Labar na midini sda na Oziyas a zaŋ ɗa, war pini zi tiki par haa sini dibini a ɗoŋ ɗa a ɗif na mini Alaw Esaya n’ahini Amots

²³War mrini e piŋ gaiɗi tamaini war hlai zi pi na wiiɗi paakai, amma war waŋ na wiiɗi tamaini kai buri aŋ gaini veglek n’a bla si ɓlok ɓlok sini, Yotam n’ahini a suma pai war balamni.