Read Mousgoum Labar na war yivai n’ag'aŋ sulu 30 Bible Online

Labar na war yivai n’ag'aŋ sulu 30 - Mousgoum bible

Labar na war yivai n’ag'aŋ sulu 30

¹Ezekiyas a yikiɗisi ɗai na Izrayel gaiɗi na Yuda paŋ, a ɗo maa letre wiini pinzibani Efrayim gaini pinzibani Manase buri e hilisi aŋ ziti fet na wiini Paska na wiini EPIƊ-ƊAI, Alaw na wiiɗi Izrayel, war Dalam na wiini EPIƊ-ƊAI aha war Yeruzalem.

²Pai gaiɗi ŋarakaini gaiɗi ɗai na war Yeruzalem na paŋ lai e kiti miɗi buri e ziti fet na wiini Paska war tile n’ag'aŋ sulu ɗa.

³E ziŋ nɵa buri ɓa e zitisi fet hanɗa war mefeŋɗi n’a ɗiya kai, buri paakai zi ɓaka n’e zi siɗi edi aŋ sɗik e ɗifu viya kai, ɗai ɗe e tipisi aha war Yeruzalem paŋ kaalai.

⁴Kitini seŋ hanɗa a yima agulni pai gaiɗi ɗai paŋ.

⁵E zi pini miɗi hanɗa, e ɵini labar edi midini afti na Izrayel ɗe paŋ, amai a Ber-seba par haa azumai Dan ta, e yikiɗisi ɗai buri e hilisi aŋ ziti fet na wiini Paska na wiini Epiɗ-ɗai Alaw na wiiɗi Izrayel ɗa buri ɗai n’e ziŋ maini n’a ɗo nɵa e ɗa viya kai.

⁶Nɵa ɗai n’e ɵiniɗi edi e rivi gaini letrekai na pai gaiɗi ŋarakaini e dûŋ ɗa war Izrayel gaini Yuda paŋ, aŋ miɗi edi pini miɗi na pai a miɗiŋɗi maini nɵa: tiki aliɗi Izrayel, ki wiyisi sini Epiɗ-ɗai Alaw na wiini Abraham na wiini Isak gaini na wiini Yakob lai, Ni aga a wayasi arki tiki na ki hini karki, na ki kûrɗisi tiɗi paakai na Siriya par lai.

⁷Ki zi siki maiɗi tamaiki gaiɗi tawalakaiki n’e ɵini mini Epiɗ-ɗai Alaw na wiiɗi tamaiɗi kai haa a hiniɗi edi e ɓilki edi maini na ki tiliŋ na ɵa kai.

⁸Tiyana ɗa, ki zi miɗiki gdaŋ maiɗi tamaiki nɵa kai, ki wiyisi sini EPIƊ-ƊAI war hlaini na sɗik, n’a zaŋ edi aŋ sɗik haa kureɗ, zi ɵeŋni Epiɗ-ɗai Alaw na wiiki kapai a tika hiyni n’abai edi miɗiki par.

⁹Buri ɓa Na ɓa ki wiyisi li sini EPIƊ-ƊAI ɗa, tawalakai gaiɗi aliki aga e bindi arɗi nagai n’e yimiɗi aŋ bege haw gara, nɵa aga e wiyisi aha midini afti hanɗa, buri Epiɗ-ɗai Alaw na wiiki hinini haw warni gara, na ɓa ki wiyisi li sini ɗa aga a hiniki edi kir kai.

¹⁰Ɗai n’e ɵiniɗi edi ɗa, e vigi war fuŋ n’abakai na midini afti na wiini Efrayim gaini na wiini Manase lai haa a Zabulon ta, amma ɗai e riyi piɗi gaini riyi, e ziɗi yewere lai.

¹¹paŋ ktai ɗai zamai na war pinziba na wiini Aser, na wiini Manase gaini na wiini Zabulon lai e yimi seŋ hanɗa, e hilisi aha war Yeruzalem.

¹²Aha midini afti na Yuda lai, EPIƊ-ƊAI a za sda. A tapa hiiniɗi ɗai war hlai ktai aŋ zi pini miɗi na pai gaiɗi ŋarakaini e niviŋsi sini EPIƊ-ƊAI par aŋ siŋɗi.

¹³Vok n’abai griŋ gara a tapasi aha war Yeruzalem war tile n’ag'aŋ sulu ɗa aŋ ziti fet na wiini peŋ na gaini kis arni kai, a vok n’a pɵa kai.

¹⁴E tiki piɗi e hûgiwiŋ n’e yi ɓaka midini gaini n’e yi wala zi ɗûgûdi zi lûgûzi midini na aha war Yeruzalem ɗa edi, e pûkiŋ agoɗom war huduk na Sedron.

¹⁵E fiɗi wazagai na miɗi fet na wiini vigi n’amai ɗa war mefeŋ n’ag'aŋ pi puɗu na wiini tile n’ag'aŋ sulu, paakai zi ɓaka gaiɗi levitekai siyer a dûgiɗi, e zi siɗi edi sɗik, e ki ɓaka zi yi amlai war Dalam na wiini EPIƊ-ƊAI.

¹⁶Paakai zi ɓaka gaiɗi levitekai e zi sda n’a sa tiɗi pini gadai n’a sa siɗi maini n’a na war ɗû na wiini Musus ɵeŋ na wiini Alaw nɵa: paakai zi ɓaka e yiimi fel na levitekai e siŋɗisi amai midini gûwiŋ zi yi ɓaka ɗa.

¹⁷Buri ɓa ɗai viya e ɗifu arbani vok hanɗa e zi siɗi edi sɗik kai, nɵa levitekai e fiɗi wazagai zi fiɗi na miɗi fet na mini Paska aziɗi nagai paŋ n’e ɗa hilu aŋ zi sda na maini hanɗa nɵa sini EPIƊ-ƊAI kai ɗa.

¹⁸Buri ɓa ɗai viya a suwa paŋ, ɗai war pinzibani Efrayim, Manase, Isakar gaini Zabulon lai ɗa, e zi siɗi edi sɗik kai. E simi wazagai n’e fiɗiŋ miɗi fet na wiini Paska maini n’aŋ gaini ɗûnɵa kai. Amma Ezikiyas a siiwa buriɗi a muɗa: Epiɗ-ɗai Alaw na wiiɗi tamaiyi siɗi ni wiiɗi

¹⁹nagai aŋ n’e siti aguldi edi aŋ piyi Alaw Epiɗ-ɗai Alaw na wiiɗi tamaiɗi koo na ɓa e ziŋ gaiɗi agul na hilu maini a zuva aŋ za burini wazagai na sɗik nɵa kai tekeɗeɗi.

²⁰EPIƊ-ƊAI a ɵina siiwa na wiini Ezekiyas, a za wala na meefeŋ siɗi ɗai kir kai.

²¹Aliɗi Izrayel n’e ɗifu aha war Yeruzalem e ziti fet na wiini peŋ na gaini kis arni kai haa mefeŋ muguzak gaini firiyi n’abai, levitekai gaiɗi paakai zi ɓaka e kûli EPIƊ-ƊAI mefeŋ mefeŋ paŋ gaini wazagai zi zini yama na gdaŋai aŋ kol na sini EPIƊ-ƊAI.

²²Seŋ na wiini Ezekiyas ɗa a yima hiiniɗi levitekai na hiiniɗi sini EPIƊ-ƊAI pɗem ɗa, e hili wuzaɗi gaiɗi fet ɗa haa mefeŋ muguzak, e zi ɓaka zi ɵeɗ, e si kol sini Epiɗ-ɗai Alaw na wiiɗi tamaiɗi.

²³A tala arni diŋgi paŋ pɗem buri e zi mefeŋ katawai muguzak pra, e zi mefeŋ zamai muguzak war firiyi pra.

²⁴Buri ɓa Ezikiyas pai na Yuda a kasi garakai dubu ɗaw, haakai gaini adumai dubu muguzak buriɗi vok hanɗa, ŋarakai lai e kisi garakai dubu ɗaw, haakai gaini adumai dubu. Paakai zi ɓaka viya e zi siɗi edi sɗik lai.

²⁵Ɗai paŋ e vi gaini firiyi, ɗai na Yuda, paakai zi ɓaka, levitekai, ɗai n’e hilisi war Izrayel par paŋ, nagai n’e hilisi miɗi fet gaiɗi n’e zûgûsi woni ɗiipar paŋ.

²⁶Firiyi a za abai gara aha war Yeruzalem buri asakalni Salmun n’ahini David pai na Izrayel par fet na maini hanɗa nɵa te za aha war Yeruzalem duk kir kai.

²⁷Asakal par paakai zi ɓaka na levitekai e fiki amai e ɓikiɗi ɗai, wulaɗi a wa amai, siiwaɗi a hala sini Alaw n’a na war hlaini zi simni na sɗik, a ɵina siiwaɗi lai.