Read Mousgoum Labar na war yivai n’ag'aŋ sulu 36 Bible Online

Labar na war yivai n’ag'aŋ sulu 36 - Mousgoum bible

Labar na war yivai n’ag'aŋ sulu 36

¹Ɗai na midini afti na Yuda e tiki Yowakaz n’ahini Yoziyas aŋ pai war balamni epini aha war Yeruzalem.

²Yowakaz a suma pai sek ɗa buzani caaɓa pi hu, a ŋa aha war Yeruzalem par tile hu.

³Neko pai n’Egipte a tikaŋ edi war pai war Yeruzalem par, a tika tar midini afti na Yuda ɗa: arzaŋ kilo dubu hu, or kilo hu lai.

⁴Asakal par a tika Eliyakim na tawalni aŋ pai midiɗi Yuda gaiɗi Yeruzalem, a bunda yikini ɓa: Yoyakim. Yowakaz na tawalni ɗa, Neko a yimaŋ a kaŋ war Egipte.

⁵Yoyakim a suma pai sek ɗa buzani caaɓa pi ɵim, a ŋa aha war Yeruzalem par buza pi ktai. A za wazagai na maafanai arni Epiɗ-ɗai Alaw na wiini.

⁶Nebukadnezar pai na Babilon a halalsi a hitimaŋ. A rgaŋ gaini jaɓ zi kiiya sulu, a kaŋ war Babilon.

⁷Nebukadnezar a mula wazagai zamai zamai war Dalam na wiini EPIƊ-ƊAI par a kaŋ war dalamni zi pai a Babilon.

⁸Labar na midini Yoyakim, sdakaini na haharai n’a zaŋ, gaini wazagai n’a za sini lai ɗa aŋ gaini ɗû war maktuɓ na wiiɗi paakai na Izrayel gaiɗi na Yuda lai. Yoyakin n’ahini a suma pai war balamni.

⁹Yoyakin a suma pai sek ɗa buzani mitwis, a ŋa aha war Yeruzalem par tile gaini mefeŋ. A za wazagai na maafanai arni EPIƊ-ƊAI.

¹⁰Buza na midini par ɗa, pai Nebukadnezar a ɵinasi ɗai midini buri e kiŋɗi a Babilon gaini wazagai na pɗamai n’aŋ war Dalam na wiini EPIƊ-ƊAI, a tika Sedesiyas na tawalni aŋ pai midiɗi Yuda gaiɗi Yeruzalem.

¹¹Sedesiyas a suma pai sek ɗa buzani caaɓa pi ktai, a ŋa aha war Yeruzalem par buza pi ktai.

¹²A za wazagai na maafanai arni Epiɗ-ɗai Alaw na wiini. A dara a hosa sini azumai ɗif na mini Alaw Yeremiyas n’a na miɗini seŋ n’a navaŋsi mini EPIƊ-ƊAI par kai.

¹³A faka ma amai sini pai Nebukadnezar, n’a hini wala mini gaini Alaw buri a za meefeŋ sini kai ɗa. A za midini gdaŋ, a binditi agulni hiriyik a dara a wayasi sini Epiɗ-ɗai Alaw na wiiɗi Izrayel ɗe kai.

¹⁴Abakaiɗi paakai zi ɓaka gaiɗi abakai zi ɵi wuze lai ɵinini Gat kai na wiiɗi a riya amai sek sek pini sdakai na haharai na wiiɗi ɗai na ɵimani, E bindi Dalam na wiini EPIƊ-ƊAI na ni a zaŋ aŋ wiini aha war Yeruzalem hi-hir.

¹⁵Epiɗ-ɗai Alaw na wiiɗi tamaiɗi a ziɗi zaida wuzani hlai kûreɗ-kûreɗ war miɗi ɗaini, buri hiinini haw n’aŋ warni buriɗi ɗaini gaini hlai zi simni na wiini dama lai.

¹⁶Amma aliɗi Izrayel e ziɗi yewere wiiɗi ɵeŋ na wiini Alaw, e yimi seŋni aŋ wala kadai, e riyi piɗi ɗai na mini Alaw lai, haa hiy na wiini EPIƊ-ƊAI na siɗi ɗaini a riya amai haa tini ɗif a ɵa mini kir kai.

¹⁷EPIƊ-ƊAI a kasi pai na Babilon midiɗi, a fiɗiɗi gawlakai gaiɗi ɓulamai, ɗai n’abakai gaiɗi na walakai lai amlai war hlai na sɗik gaini hiinini haw kai. A hina wazagai paŋ war tini.

¹⁸Wazagai na war Dalamni Alaw n’abakai gaini n’agogoi, godai na war Dalamni Alaw, na war dalamni pai gaiɗi na wiiɗi ŋarakaini lai, e miliŋ paŋ e kiŋ war Babilon.

¹⁹E ɵi afu pini Dalamni Alaw, e hû ɵaga na Yeruzalem azumai, e tiki afu pini dalamai na pɗamai ta ta, wazagai na pɗamai paŋ sai e tûriŋ edi.

²⁰Asakal par e kiɗi nagai n’e mri mini kaɵkar kai ɗa a Babilon aŋ kapai e zi aŋ bagakai na wiini ni, wiiɗi alini lai haa hlai na pai na Persus te tika hlai ɗa.

²¹Nɵa miɗi n’EPIƊ-ƊAI n’a muɗaŋ war mini ɗif na mini Alaw Yeremiyas a va amai: haa na Sabbat n’a kata burini aftiɗi ta ɗa a va amai, aga a hina kadai su war mefeŋ n’e ɗa war gir, haa buza na muguzakn a va amai.

²²War buza n’avut na wiini Sirus pai na Persus, kapai seŋ n’a muɗa mini ɗif na mini Alaw Yeremiyas a va amai ɗa, EPIƊ-ƊAI a mala hiinini Sirus pai na Persus a sa miɗi zaw a ɗo edi midiɗi paini paŋ maini nɵa:

²³Sirus pai na Persus a na muɗa maini nɵa: pai na midiɗi yai ɗe paŋ, EPIƊ-ƊAI, Alaw n’amai a saŋŋa war ta, ni dama a muɗaŋa buri mu rgini Dalam aha war Yeruzalem na te na war Yuda. Arbaki ɗa na ɓa ɗai na wiini e ɗa ɗa, e hili amai a Yeruzalem, Epiɗ-ɗai Alaw na wiiɗi a za gaiɗi.