Read Mousgoum Labar na war yivai n’ag'aŋ sulu 4 Bible Online

Labar na war yivai n’ag'aŋ sulu 4 - Mousgoum bible

Labar na war yivai n’ag'aŋ sulu 4

¹A zizina gûwiŋ zi kiiya zi yi ɓaka na mogoni kil caaɓa, brukni kil caaɓa, mogoni n’amai sek kil lai.

²A za daya zi kiiya na wulla, na mini ɗa kil, wilini n’amai sek ɗa kil ɵim, sogom na paɵani ta ɗa kil hu.

³Sini wulani par ta azumai sek, a zizina garakai giri sulu, gaini gûni amlai gun gun, kil paŋ garakai warni, garakai na sini hanɗa e yûûriŋ gaini daya ktai.

⁴Aŋ gaini tiki midini garakai zi kiiya pi sulu, hu arni azumai sek, hu arni piɗi futi na koskoi sek, hu arni amai sek, hu arni piɗi dawai sek lai. Garakai hanɗa pini amlai pini daya sek sek.

⁵Diɓlikni daya ɗa a za tiy ŋa, mini ɗa a zizinaŋ gaini futini maini fler na wiini miye nɵa, warni a ma litir miya ɗaw gaini caaɓa.

⁶A zizina dunbakai zi kiiya, a mula na ɵim war galni tempel na wus ɗe sek, na ɵim war gal na muni sek lai buri zi n’edi aŋ hilu na wiini wazagai zi ɓaka. Amma paakai zi ɓaka ɗa e mi siɗi warni daya zi kiiya ɗa.

⁷A za wazagai n’e mili lampakai midini zi or na pini gadai n’a navan, a mulaŋ amlai warni tempel, ɵim war gal na wus, ɵim war gal na muni lai.

⁸A za tabel a mulaŋ amlai warni tempel, ɵim war gal na wus, ɵim war gal na muni lai. A za kop zi or miya ɗaw n’e mi fel zi yimi warni.

⁹A za pakatai na wiiɗi paakai zi ɓaka gaini pakatai zamai n’abai, a pa tapra mini lai, a ma tapra hanɗa gaini kiiya.

¹⁰Amma daya ɗa e tikiŋ war gal na wus na wiini tempel sek gobi gaini koŋni hlai n’amai sek gaini zigi piɗi futi na dawai par sek

¹¹Hiram a za wazagai n’e mili bonu edi gaini, a za pel, gaini kop n’e mi fel zi yimi warni. A vada gaini sda n’a ziŋni wiini pai Salmun sini Dalamni Alaw kafa:

¹²A za garai sulu, wala na gaini ɵiri edi sulu amai par midini garai ca, wala maini bogorai ɵa sulu a pa midini, wala maini ava ɵa sulu gaini biri amai midini bar.

¹³Gaini alini luwuŋ grenat miya puɗu n’e rgiŋ amai sini wala na maini ava ɵa ɗa, ava paŋ alini luwuŋ grenat gaini giri sini sulu sulu kapai e giriŋ midini wala na maini bogorai ɵa amai merfeŋni garai ɗa.

¹⁴A zizina wazagai n’e libi wazagai gaini, a zizina dunbakai amai midini ta ta lai.

¹⁵Daya ɗa a ni ktai, garakai azumai pini pi sulu,

¹⁶a zizina wazagai zi mili bono edi, a zizina pel gaini furset, wazagai na Hiram-Abi a zizinaŋ wiini pai Salmun buri e zi sda gaini amlai war Dalam na wiini EPIƊ-ƊAI a na gaini kiiya na gaini futini.

¹⁷Hiram a zizininisi wazagai hanɗa wiini pai Salmun arni afti z'aginkai par war huduk na Yurdan, arbani fuŋ na Sukot gaini na Seredata.

¹⁸Salmun a za wazagai hanɗa viya gara, haa jaani ɗif pini gumani kiiya n’aŋ zaŋ ta ɗe kai.

¹⁹Salmun a miɗiɗi wiiɗi ɗai buri e zi wazagai paŋ n’e zi sda gaini amlai war Dalam na wiini Alaw: gûwiŋ zi or zi yi ɓaka, tabel n’e mili peŋ n’a sa sini Alaw midini,

²⁰wazagai n’e tiki lampakai midini gaini lampakaini zi or na gaini futini na kapai e tiki afu mini wuzani hlai na sɗik gara pini gadai n’e nivin,

²¹wazagai na maini fler ɵa, lampakai gaini magaz zi or n’e ɗûkli albadanai gaini, or na gaini futini gara;

²²muguɗ, kop n’e mi fel zi yimi warni, kop zi ci wala, alini burmakai n’agogoi a za gaini or na gaini futini. mini tempel ɗa, tapra na mini hlai n’amlai sini hlai na sɗik gara sek, gaini tapra na mini tempel ɗe lai a zaŋ gaini or.