Read Mousgoum Labar na war yivai n’ag'aŋ sulu 5 Bible Online

Labar na war yivai n’ag'aŋ sulu 5 - Mousgoum bible

Labar na war yivai n’ag'aŋ sulu 5

¹Won hlai na sda na Salmun a zaŋ burini Dalam na wiini EPIƊ-ƊAI a vada vat, a kasi wazagai na David n’epini a saŋ wiini EPIƊ-ƊAI ɗa, maini arzaŋ, or, gaini wazagai zamai zamai n’e zi sda gaini a kaŋsi arbani godai na war Dalamni Alaw.

²Asakal par Salmun a tipiɗi n’abakai n’arbaɗi ɗai na Izrayel, gaiɗi n’abakai zi ɵi wuze na war pinziba gaiɗi tamaini dalam na wiiɗi Izrayel paŋ aha war Yeruzalem buri e hili e tikisi Zunduk zi bonu na wiini EPIƊ-ƊAI war fuŋ n’abai na wiini David par a dara a muɗa: a Siyon par, amai war tempel sek.

³Aliɗi Izrayel paŋ e diŋgisi sini pai Salmun war fet na wiini tile n’ag'aŋ muguzak.

⁴Won hlai n’abakai n’arbaɗi ɗai na Izrayel e cûsi, levitekai e tiki Zunduk zi bonu amai aŋ hili gaini.

⁵Paakai zi ɓaka gaiɗi levitekai e libi Zunduk zi bonu, gumu na e nivi gaini EPIƊ-ƊAI woni gaini wazagai na wiini Alaw n’amlai warni gumu paŋ lai.

⁶Pai Salmun gaiɗi aliɗi Izrayel n’e ɗa gaini wuzani Zunduk zi bonu e zi ɓaka gaini adumai gaini ɵaakai lai, viya, a pɵa kai.

⁷Asakal par paakai zi ɓaka e ki Zunduk zi bonu na wiini EPIƊ-ƊAI war balamni, amlai war hlai na sɗik gara, azumai pini graŋɗi kerubimkai.

⁸Graŋɗi kerubimkai a wa edi midini hlai na Zunduk zi bonu a tika woni, a midini Zunduk gaini wazagai n’e libiŋ gaini.

⁹Wazagai n’e libiŋ gaini ɗa mogogoi gara, anene par ɗif a kiɗa aŋ talaŋ kai, amma ɗif n’a na arbani mini hlai na sɗik gara gaini Zunduk hanɗa a kiɗa a talaŋ, hanɗa a hina woni ɵa haa girna.

¹⁰Wala zamai amlai warni Zunduk ɗe kai, a na ɗa alini fuŋ na babɗamai na sulu na Musus a sinɗi amai midiɗi Huwuŋ Horeb Won hlai n’EPIƊ-ƊAI a za bonu gaiɗi aliɗi Izrayel, hlai n’e niyisi edi war Egipte par.

¹¹Paakai zi ɓaka e niyisi edi war hlai na sɗik par, buri paakai zi ɓaka paŋ n’e ɗa woni e zi siɗi edi aŋ sɗik, e tiki pini girini vok ɗe kai.

¹²Levitekai zi zini yama e ɗifu kafa, Asaf, Heman, Yedutun, aliɗi gaiɗi zagalakaiɗi lai e wi sapa zi leŋ siɗi, e mili kawai n’a tuwa gaini edil, gaini gaŋgraŋ, e ɗiyi ɵimani gûwiŋ zi yi ɓaka piɗi futi na dawai par. Paakai zi ɓaka e ɗa gaiɗi, miya gaini caaɓa n’e yibi fana.

¹³Ɗai n’e yibi fana gaiɗi zi zini yama e zini yama buri e kûli EPIƊ-ƊAI, wulaɗi gaini kiti ktai aŋ si tese sini EPIƊ-ƊAI aŋ sini kol lai. Won hlai na wulani fana, kawai n’a tuwa gaini wazagai zi zini yama zamai zamai a n’a wa ɗa, e kûli EPIƊ-ƊAI, e miɗi buri Ni a na pɗem dirini ɗa a na haa hlai n’a vada kai. Won hlai ni ɗa abai na wiini EPIƊ-ƊAI te va Dalamni Alaw maini ɗugul z'agiyiŋ nɵa.

¹⁴Paakai zi ɓaka e kiɗi aŋ ɗiyi woni aŋ zi sdaɗi kir kai buri ɗugul hanɗa, buri abai na wiini EPIƊ-ƊAI te va Dalamni Alaw ta.