Read Mousgoum Labar na war yivai n’ag'aŋ sulu 6 Bible Online

Labar na war yivai n’ag'aŋ sulu 6 - Mousgoum bible

Labar na war yivai n’ag'aŋ sulu 6

¹Nɵa Salmun a muɗa: EPIƊ-ƊAI a muɗa ɓa a firiya a sumna arni ɗugul na murɗek.

²Amma Ta mu rgukuku Dalam na zuf gara, a hlai zi simni n’aga ku sumna warni haa kureɗ.

³Vokɗi aliɗi Izrayel paŋ e ɗiyi amai ca ca, pai a bunda arni siɗi a ɓikiɗi,

⁴asakal par a muɗa: kol sini Epiɗ-ɗai Alaw na wiiɗi Izrayel n’a muɗa gaini mini wiini David n’apa, seŋni n’a muɗaŋ ɗa ni gaini midini dama a vaŋ amai lai,

⁵a miɗini ɓa: daga sini mefeŋ na mu miliɗisi ɗaiŋa edi war Egipte par, mu varaka fuŋ n’abai ktai arbani fuŋɗi aliɗi Izrayel buri e rgiŋa Dalam na mu sumna warni kai, mu vara ɗif zamai na kapai a sumna aŋ pai midiɗi ɗaiŋa na Izrayel ɗe kaalai.

⁶Amma mu viriti te Yeruzalem kapai mu sumna warɗi, mu vara ɗa a David kapai a za aŋ pai na wiiɗi ɗaiŋa Izrayel lai.

⁷David n’apa a rga seŋ warni ɓa a rga Dalam wiini Epiɗ-ɗai Alaw na wiiɗi Izrayel,

⁸Amma EPIƊ-ƊAI a miɗini wiini David n’apa: ku rga warku ɓa ku rgaŋa na Dalam, ku za pɗem,

⁹Amma aga ku rgaŋa Dalam hanɗa ku tuku kai, aga a rgaŋŋa ɗa ahi na warku, aga a rgaŋa Dalam hanɗa a ni.

¹⁰EPIƊ-ƊAI a va seŋ ni n’a muɗaŋ ɗa amai ta, mu tika balamni David n’apa, mu sumna midiɗi Paramai zi pai na wiiɗi Izrayel maini n’EPIƊ-ƊAI a muɗaŋ ɗe ɵa, pra mu rga Dalam hanɗa wiini Epiɗ-ɗai Alaw na wiiɗi Izrayel.

¹¹Mu tika Zunduk, na bonu n’EPIƊ-ƊAI a zaŋ gaiɗi aliɗi Izrayel aŋ warni, amlai warni.

¹²Salmun a ɗiya wuzani gûwiŋ zi yi ɓaka na wiini EPIƊ-ƊAI zaw, a bunda arni sini vokɗi Izrayel sek a yima tini amai.

¹³Salmun a rga hlai zamai edi mini magala ta gaini kiiya, mogoni kil ɵim, brukni kil ɵim, mogoni n’amai sek kil hu lai, a niya amai midini, a pa kurnaini azumai wuzani vokɗi Izrayel. A yima tini amai pini Alaw aŋ siiwa;

¹⁴a muɗa: Epiɗ-ɗai Alaw na wiiɗi Izrayel, Alaw na maiku tuku nɵa aŋ kai, amai war hlai n’amai kaalai, azumai midiɗi yai kaalai, tuku ku giɗima bonu gaini pɗemku na siɗi ɗaiku, n’e piyi wuzani arku gaiɗi agul ktai.

¹⁵Tuku ku ɗiya midini seŋ na ku miɗiŋɗi wiini David n’apa, wala na muku a muɗaŋ ɗa tuku dama ku vaŋ amai ya maini na mi ɗa tiliŋ na ɵa.

¹⁶Tiyana ɗa Epiɗ-ɗai Alaw na wiiɗi Izrayel, yum na ku zaŋ sini ɵeŋ na wiiku, David n’apa ɗa, ku hinaŋ edi kai. Seŋ na ku miɗiŋni ɓa: wuzani arku ɗa paramaiɗi pai na wiiɗi Izrayel te hina fu na tiɗi pinzibaku ɵa haa kureɗ, na ɓa alini ɗa e ɗa piyi payai na pɗem, e zi pini ɗû na wiiku lai maini ni a paya wuzani arku nɵa ɗa;

¹⁷Tiyana ɗa Epiɗ-ɗai Alaw na wiiɗi Izrayel, hina seŋ na ku miɗiŋni wiini ɵeŋku David a va amai.

¹⁸War jre kai tiɓ ɗa, Alaw a kiɗa a sumna azumai midiɗi yai gaiɗi ɗai ɗi? Hlai n’amai na gaini abaini tekeɗe maa a kiɗaŋ kai, a zi gama ɗa, dilimi n’agwi na mu rgitini na ɗa.

¹⁹Gaini hanɗa paŋ ɗa, Epiɗ-ɗai Alaw na wiya, zaga ɵimaku mini siiwa gaini tuwi na wiini ɵeŋku, ɵina ɗuwal gaini siiwa na ta ɵeŋku mu na kaŋɗi wuzaku hanɗa.

²⁰Mula arku midini Dalam hanɗa girvudi gaini duvuk paŋ, midini hlai na ku muɗa ɓa aga ku sumna woni ɗa, ɵina siiwa na ta ɵeŋku mu na siiwuku ɗi war hlai hanɗa par.

²¹Slina tuwi na wiya ta ɵeŋku gaini na wiiɗi Izrayel na ɗaiku na mi ɗa kiŋsi wuzaku war hlai hanɗa, tuku ɗa amai war hlai n’amai par, war hlai na ku sumna woni par, ku ɵina tuwiyi, ku siyi ni.

²²Na ɓa ɗif a za meefeŋli sini maini, na ɓa ɗai e firiyi ɓa a ha wala zi tusa mini, na ɓa a halasi li aŋ ha wala hanɗa mini wuzani gûwiŋ zi yi ɓaka na wiiku amlai war Dalam hanɗa,

²³Tuku EPIƊ-ƊAI amai war hlai n’amai par, ɵina, za wala ktai ta; zitiɗi sariya wiiɗi ɗaiku hanɗa, ni n’a za meefeŋ, tikini gir midini pini sdani na meefeŋ ɗa, ni n’a za wala na meefeŋ kai ɗa siŋka jreni edi, za sini pini jre na wiini lai.

²⁴Na ɓa gawɗi Izrayel na ɗaiku e rɗi li amai midiɗi buri e zi tuwur suku, na ɓa e wiyisi e himi li, e kuluku gaini yama, e siiwi tuku, e tûwi suku amlai war Dalam hanɗa,

²⁵Tuku amai war hlai n’amai par ku siɗi ni wiiɗi Izrayel na ɗaiku burini tuwurɗi, ku wiyiɗisi aha midini afti na ku sinɗi wiiɗi nagai gaiɗi tiyakaiɗi lai.

²⁶Na ɓa mini hlai n’amai a duk, faŋ a ɵa kir kai, buri ɓa aliɗi Izrayel e zi tuwur suku, na ɓa e hilisi e siiwi woni hlai hanɗa, na ɓa e hilisi e kuluku, e wiyisi edi siɗi futi na mafuni par buri gir na ku tikiŋɗi midiɗi,

²⁷tuku amai war hlai n’amai par, siɗi ni buri tuwur na wiiɗi ɗaiku na Izrayel, ku hitritiɗi futi na pɗemi n’aga e piyi warɗi, ku hina faŋ a ɵa midini aftiku, afti na ku siŋɗi wiiɗi ɗaiku aŋ bulum.

²⁸Won hlai na wiyamai te za midini afti, Won hlai na vlak a za, Won hlai na seyem na war vuwai ɗa a fara, Won hlai na neme-neme a yimaŋ, Won hlai na ɓokɓoko gaini ayuwi a luɓasi viya, Won hlai na gawɗi e siki fuŋ n’abakai na midini aftiɗi, koo ɓa a gir na wata, koo ɓa a veglek na maɵa maɵa,

²⁹e siiwi tuku ɗa a maa, e tûwi suku ɗa midini maa, a siiwa n’a ɗif ktai, zaw aliɗi Izrayel gaini hlaiɗi paŋ, na ɓa a sɗa wala n’a kinsi gir zaw kayai midini li, na ɓa a bundasi li arni sini tempel hanɗa sek tini gaini yimi amai yaw aŋ siiwa ɗa,

³⁰tuku, amai war hlai n’amai par, war hlai zi simni na ku sumna woni, siɗi ni, za sini asiya ɗi paŋ pini payaini buri tuku ku sɗa wala n’aŋ warɗi agulni, buri ɓa ku siɗiti agulni ɗif ku tuku kiiku.

³¹Kapai nagai e hunuku, e piyi war futiku, haa sini dibini suŋfaɗi, mefeŋ na ku sinɗi aŋ simni karɗi midini afti na ku siŋɗi wiiɗi tamaiyi ta ɗa.

³²Koo ɓa a ɗif na war pinzibaɗi ɗaiku na Izrayel ɗe kai kaw ɗa, na ɓa a halasi midini afti na gaigai par burini yikuku n’abai, buri spakku gaini gdaŋku, na ɓa a halasi a siiwa amlai warni Dalam hanɗa,

³³tuku amai war hlai n’amai par, war hlai zi simni na ku sumna woni, za maini na ɗif n’edi par a zilbaŋ tuku nɵa, kapai ɗai na midiɗi yai paŋ e suɗuku, e suku hormo maiɗi ɗaiku na Izrayel ɗe nɵa, e siɗi lai ɓa Dalam na mu rgaŋ hanɗa a wiiku tuku.

³⁴Na ɓa ɗaiku e hili li aŋ hitimiɗi gawɗi war hlai na ku siŋkinɗi sek, na ɓa e bindi arɗi li suku sek aŋ siiwi tuku aha war fuŋ n’abai na ku varaŋ, aha war Dalam na mu rgaŋ buriku sek lai ɗa,

³⁵amai war hlai n’amai par, ɵina siiwaɗi gaini tuwiɗi, zina piɗi ta lai.

³⁶Na ɓa e zi tuwur li suku, buri ɗif n’a za tuwur kai aŋ kai, na ɓa ku za hiy li siɗi, ku siɗi li edi war tiɗi gawɗi, gawɗi e kiɗi li aŋ bagakai edi midini afti zamai na gobi zaw na gaigai ɗi ɗa,

³⁷na ɓa edi midini afti n’e ɗi woni aŋ bege ɗa, e tiki piɗi e hiini, e himi, e tûwi suku edi woni par, e miɗi ɓa: tiyi mi ɗi ɗai na tuwarai, mi ɗi ɗai na mi zi meefeŋ, sariya te yimiyi yaw,

³⁸na ɓa e wiyisi li suku gaini agulɗi paŋ, gaini suŋfaɗi paŋ, edi midini afti n’e kiɗi woni aŋ bege par, na ɓa e bindi arɗi li aha sini aftiɗi sek aŋ siiwi, afti na ku siŋɗi wiiɗi tamaiɗi aha sek sini fuŋ n’abai na ku varaŋ gaini Dalam na mu rgaŋ buriku lai ɗa,

³⁹tuku amai war hlai n’amai par, war hlai na ku sumna woni par, zaga ɵimaku miɗi, ɵina siiwaɗi gaini tuwiɗi lai, zina piɗi ta, siɗi ni wiiɗi ɗaiku n’e zini tuwur li suku ɗa. Vidi n’edi na wiini siiwa na wiini Salmun

⁴⁰Tiyana ɗa Alaw wiya, mu siiwuku, mulasi arku midini hlai hanɗa, zaga ɵimaku mini siiwa n’aga za war hlai hanɗa par! ö

⁴¹Tiyana ɗa Epiɗ-ɗai Alaw fakasi amai, halasi warni hlaiku zi si-n’amla, tuku gaini Zunduk zi bonu na spakku aŋ woni. Epiɗ-ɗai Alaw a zuva ɓa paakaiku zi ɓaka e wii kûri siɗi maini sapa nɵa, nagai n’e pili miɗi gaiku kai ɗa e firiyi war simni na ɵeɗ!

⁴²Epiɗ-ɗai Alaw, pai na ku varaŋ ɗa, ku hogaŋ edi suku par kai, ku hina muduku a kɵa gaini sdakai na pɗamai na wiini ɵeŋku David ɗa kaalai.