Read Mousgoum Labar na war yivai n’ag'aŋ sulu 7 Bible Online

Labar na war yivai n’ag'aŋ sulu 7 - Mousgoum bible

Labar na war yivai n’ag'aŋ sulu 7

¹Won hlai na Salmun a vada gaini siiwa li, afu a niyasi amai par a ya ɓaka zi yi gaini ɓaka na zamai ɗe paŋ, abai na wiini EPIƊ-ƊAI te va Dalam na wiini Alaw ta.

²Paakai zi ɓaka e kiɗi aŋ niyi amlai war Dalam n’Alaw kai, buri abai na wiini EPIƊ-ƊAI te va Dalam n’EPIƊ-ƊAI ta.

³Aliɗi Izrayel paŋ e tili afu gaiɗi abai na wiini EPIƊ-ƊAI amai midini Dalam, e gûɓi azumai, e pi arɗi azumai midini afti, e hûrgi azumai midini kurnaiɗi, e kûli EPIƊ-ƊAI e miɗi: buri Ni a pɗem, buri dirini a na haa kureɗ.

⁴Pai Salmun gaiɗi ɗai na Izrayel paŋ e zi ɓaka wuzani EPIƊ-ƊAI.

⁵Pai Salmun a za ɓaka gaini garakai dubu caaɓa pi sulu, adumai gaini haakai lai dubu miya gaini caaɓa. Pai gaiɗi ɗaini e ziti fet na wiini milini mini Dalamni Alaw maini nɵa.

⁶Paakai zi ɓaka e ɗiyi war hlaiɗi zi sda, levitekai e ɗifu gaini wazagai zi zini yama na Pai David a zaŋ buri e kûli EPIƊ-ƊAI gaini tiɗi, e kûli EPIƊ-ƊAI gaini yama na David a zaŋ maini nɵa: buri dirini a na haa kureɗ, kokoɗi par ɗaw paakai zi ɓaka e yibi faana, aliɗi Izrayel na paŋ e ɗiyi amai ca ca.

⁷Salmun a za hlai n’a na wuzani Dalam na wiini EPIƊ-ƊAI aŋ hlaini EPIƊ-ƊAI, buri gûwiŋ zi kiiya zi yi ɓaka na Salmun a zaŋ ɗa a agwi a kiɗa buri ɓaka ɗe paŋ kai. Nɵa Salmun a ya ɓaka zi yi gaini hlai z'emel ta ta na wiini wala zi ɓaka zi ɵeɗ gaini ɓaka na gaini alini seyem lai warni hlai hanɗa.

⁸War sarti hanɗa lai, Salmun a ziti fet na wiini gumu gaini aliɗi Izrayel paŋ haa mefeŋ muguzak, a diŋgi n’abai gara na ɗai e hilisi pini haa a Lebo-hamat war gal n’azumai par, haa siɗi arai n’Egipte war gal n’amai par.

⁹War mefeŋ n’ag'aŋ mitwis e zi diŋgi n’abai, buri ɓa e ziti fet na wiini milini mini gûwiŋ zi yi ɓaka ɗa haa mefeŋ muguzak, pra fet na wiini gumu haa mefeŋ muguzak lai.

¹⁰War mefeŋ n’ag'aŋ caaɓa pi hu na wiini tile n’ag'aŋ muguzak, Salmun a sa futi wiiɗi ɗai buri e wiyi aha, e wiyi gaini firiyi, agulɗi a va gaini firiyi buri pɗem n’EPIƊ-ƊAI a zaŋ sini David, sini Salmun gaiɗi Izrayel na ɗaini paŋ lai.

¹¹Won hlai na Salmun a vada gaini Dalamni EPIƊ-ƊAI gaini na wiini pai ta, a vada gaini wazagai n’a rgaŋ warni buri a zaŋ amlai war Dalam na wiini EPIƊ-ƊAI gaini na wiini li lai ɗa,

¹²EPIƊ-ƊAI a siŋka sini arni war duvuk a miɗini: mu ɵina siiwaku ya, mu vara hlai hanɗa kapai e ziŋa ɓaka wonna.

¹³Na ɓa mu mini hlai n’amai ɗe li duk, faŋ a ɵa kir kai, na ɓa mu kasi ayuwi aŋ tuura seyem na midini afti edi li, na ɓa mu kasi li vlak midiɗi ɗaiŋa ɗa,

¹⁴na ɓa ɗai n’e yikiɗi ɓa e ɗi ɗai na wiya ɗa, e hûsi siɗi azumai, e siiwi, e piyiŋa lai, na ɓa e wiyisi e hini payaiɗi na meefeŋ edi; Ta amai war hlai n’amai par aga mu ɵina tuwiɗi, mu siɗi ni burini tuwurɗi, aga mu kasi pɗem midini aftiɗi lai.

¹⁵Tiyana par ɗa aga mu mula ara midiɗi, aga mu zaga ɵima mini siiwa n’aga a za war hlai hanɗa par lai,

¹⁶tiyana mu vara Dal am hanɗa li, mu zaŋ aŋ wiya ta kapai mu sumna arbaki haa kureɗ, kapai mu tika hangala sini gaini futini lai.

¹⁷Amma tuku ɗa, na ɓa ku paya wuzani ara maini na David n’apuku a paya nɵa, ku za maini na mu guduku midini nɵa, na ɓa ku za pini gadai zi ɗû gaini gadai zi ɗiyi na wiya lai ɗa,

¹⁸aga mu giɗimiti paramaiku zi pai maini na mu miɗini wiini David n’apuku nɵa ɓa: aga a ŋa midiɗi Izrayel aŋ pai ɗa sai a ɗif na war pinzibani par nɵa.

¹⁹Amma na ɓa ki bindi arki li edi sa par, na ɓa ki hini gadaiŋa zi ɗû gaini gadaiŋa na mu siŋki edi li edi, na ɓa ki yimi pini alawai na zamai, ki hûrgi azumai wuzani li lai,

²⁰aga mu hûrɗiki amai midini aftiŋa par, aftiŋa na mu siŋki par, Dalam na mu zaŋ aŋ wiya hanɗa aga mu bulaŋ edi wuzani ara par gaigai, aga mu bundaŋ aŋ wala na nafani aŋ kai, pinzibaɗi ɗai paŋ aga e ziɗi yewere wiiɗi aliɗi Izrayel buri hanɗa,

²¹asiya asiya ɗi paŋ n’aga a vuga ɵimani Dalam hanɗa n’avut par a naka abai gara, zuf gara lai, aga a bunda hiyak a zilba sini lai ɓa: EPIƊ-ƊAI a za afti hanɗa gaini Dalam hanɗa nɵa buri maɗa?

²²Ɗai aga e wiyini seŋ: buri e hini Epiɗ-ɗai Alaw na wiiɗi tamaiɗi n’a miliɗisi edi war Egipte par edi mak, buri e zi bonu gaiɗi alawai na zamai, e hûrgi azumai wuzani, e zi ɵeŋni lai, a hinasi gir hanɗa paŋ midiɗi buri hanɗa.