Read Mousgoum Labar na war yivai n’ag'aŋ sulu 8 Bible Online

Labar na war yivai n’ag'aŋ sulu 8 - Mousgoum bible

Labar na war yivai n’ag'aŋ sulu 8

¹War buza na caaɓa na Salmun a rga Dalam na wiini EPIƊ-ƊAI gaini na wiini lai,

²a waya a rga fuŋ n’abakai na Hiram a siŋni amai pra, a miliɗi aliɗi Izrayel warni.

³Salmun a hala a hitimiti Hamat-soba, a tikiti lai.

⁴A rga fuŋ n’abai na Tadmor n’edi war basga na kaɗataŋ amai gaini fuŋ n’abakai zi giɗimi wazagai zi simi na midini afti na Hamat.

⁵A rga fuŋ n’abai na Bet-Horon n’amai gaini fuŋ n’abai na Bet-Horon n’azumai amai, a fuŋ na gaini ɵaga sini, gaini port mini gaini kawai n’e ɵi mini gaini lai,

⁶pra a rga fuŋ n’abai na Baalat amai gaini fuŋ n’abakai na wiini zi giɗimi wazagai zi simi, fuŋ n’abakai n’e giɗimi saret zi gaw woni gaini n’e giɗimi plasai woni lai. Salmun a rga wazagai paŋ na agulni a firiyaŋ aha war Yeruzalem, war Liban, midini afti n’a na ŋa midini paŋ lai.

⁷Pinzibaɗi ɗai zamai viya maiɗi Hittitekai; Amoritekai, Perizzitekai, Hivitekai, gaiɗi Yebuzitekai lai e ɗifu arbaɗi aliɗi Izrayel, e fiɗiɗi edi paŋ kai,

⁸pinzibaɗi n’e hini asakal sek ɗa, Salmun a tikiɗi sda zi bege midiɗi, e hini warni ɵa haa girna.

⁹Amma war pinzibaɗi Izrayel ɗa, Salmun a sa sda zi bege wiini ɗif kai, buri e ɗi ɗai zi hatam, e ɗi abakaiɗi ɗai na wuzani plasaini, abakaiɗi ɗai n’e dibiri saretni zi gaw gaini plasaini lai.

¹⁰Ɗai n’abakai na pai Salmun a miliɗi aŋ ŋi midiɗi ɗai e ɗa paŋ miya sulu gaini doogo-doogo-ɵim.

¹¹Salmun a zûkûtisi munini n’ahini Farawon n’Egipte edi war fuŋ n’abai na wiini David par aha war dalam n’a zizinaŋ buriɗi, buri a muɗa: muniya te sumna aha war dalam na wiini David pai na wiiɗi Izrayel ɗe kai, buri ɓa hlai na Zunduk a niya aha warni paŋ a na sɗik.

¹²Nɵa Salmun a za ɓaka zi yi wiini EPIƊ-ƊAI midini gûwiŋ zi yi ɓaka na wiini EPIƊ-ƊAI n’a rgaŋ wuzani deɓir.

¹³A zaŋ pini gadai na Musus a ɗiyiŋɗi buri e ziŋ war yuvai, war Sabbat, war merfeŋni tile, war fet n’abakai n’a za azi hu war buza maini nɵa: fet na wiini peŋ na gaini is warni kai, fet na wiini pantekot gaiɗi fet na wiini gumu lai.

¹⁴Maini na David n’epini a kataŋ ɗe nɵa, a miliɗi paakai zi ɓaka na pini vokɗi ta ta war sdaɗi, levitekai lai buri e kûli EPIƊ-ƊAI gaini yama, e zini piɗi paakai zi ɓaka war sdaɗi lai mefeŋ mefeŋ paŋ. A miliɗi ɗai zi giɗimi mini magala pini vokɗi ta ta mini magala magala, buri miɗi na wiini David ɗif na wiini Alaw a nafu maini nɵa.

¹⁵Seŋ na Pai David a ɗiyaŋ buriɗi paakai zi ɓaka gaiɗi levitekai lai, gaini wazagai zamai zamai lai haa sini godai ɗe ta, e zi pini paŋ.

¹⁶Nɵa sdani Salmun paŋ a ɵa edi gaini futini, sini tûrini ezini Dalamni EPIƊ-ƊAI azumai par haa sini vidini ta.

¹⁷Nɵa Salmun a hala warɗi Esiyon-Geber gaiɗi Elat lai, hlai na huulamai n’abakai a yima warni agoɗom wulani yem-ra n’abai na midini afti na Edom.

¹⁸Pai Hiram a ɵininisi huulamai n’abakai gaiɗi ɗai zi sda n’e siɗi futini hlai na agoɗom tiɗi ɗaini zi sda. Gaiɗi ɗai zi sda na wiini Salmun, e sûmidini afti na Ofir, e kinisi or a suwa kilo dubu -pi-hu wiini Salmun.