Read Mousgoum Ezdras 1 Bible Online

Ezdras 1 - Mousgoum bible

Ezdras 1

¹Pai ktai war buza n’avut na wiini Sirus, pai na Persus, kapai seŋ n’EPIƊ-ƊAI a muɗaŋsi edi war mini Yeremiyas a va amai, EPIƊ-ƊAI a sini hiinini wiini Sirius, pai na Persus aŋ sa miɗi edi midini aftini war ɗuuwal gaini ɗû midini seŋ hanɗa:

²Sirus, pai na Persus a na muɗa maini nɵa: Epiɗ-ɗai Alaw n’amai a tikaŋa aŋ ŋa midiɗi paakai na midiɗi yai paŋ, a saŋa futi aŋ rgitini dilimi a Yeruzalem war Yuda.

³Arbaki tiki, asiya asiya paŋ n’a na war vok na wiini ɗa, Alaw na wiini aza gaini. A hala amai a Yeruzalem war Yuda, aŋ rga dalam na wiini Epiɗ-ɗai Alaw na wiiɗi Izrayel, a Alaw n’a na war Yeruzalem.

⁴Woɗi paŋ a na piɗi ɗaini Alaw e hini, ɗai n’e ɗa woni hlai hanɗa aga e sini wiini asiya ɗi paŋ: arzaŋ gaini or gaini wazagai zamai zamai gaini farai n’ezini puɗu puɗu gaini like na pin dirini ɗif burini dalam na wiini Alaw n’a na war Yeruzalem.

⁵Nɵa tamaini dalam na war Yuda, gaiɗi na war Benyamin gaiɗi paakai zi ɓaka gaiɗi Levitekai lai, gaiɗi nagai paŋ n’Alaw a ɵiya hiiniɗi amai, e hili e rgi dalamni EPIƊ-ƊAI n’a na war Yeruzalem ɗa amai.

⁶Marɗi na ɵimaɗi ezini piɗi viya gara, gaini wazagai n’a zizina gaini arzaŋ, gaini or, wazagai zamai zamai, gaini farai n’ezini puɗu puɗu gaini zamai n’e siŋ pin diriɗi a suwa hanɗa pra, wazagai na wûrini abai gaini like na pin diriɗi.

⁷Pai Sirus a waya wazagai zi sda na war dalamni EPIƊ-ƊAI, na Nebukadnezar a mulaŋsi a Yeruzalem par, a mulaŋ amlai war dalamni alawaini war balamni.

⁸Sirus pai na Persus a mulasi wazagai hanɗa edi gaini Mitredat ɗif zi giɗimi farai, ni a siŋni wiini Sesbatsar pai na Yuda;

⁹Piɵini a na maini nɵa: burzuna zi or: 30, burzuna zi arzaŋ: 1000, muguɗ 29.

¹⁰Kawai zi ci zi or 30, na zi arzaŋ n’arba ta 410, wazagai zi sda zamai 1000.

¹¹Piɵini wazagai ɗa paŋ a na: 5400, Sesbatsar a mulasi wazagai hanɗa paŋ a kaŋ war Yeruzalem, gaiɗi bagakai n’e ɗa wiyi aha warɗi Yeruzalem ɗa lai.