Read Mousgoum Ezdras 3 Bible Online

Ezdras 3 - Mousgoum bible

Ezdras 3

¹Won hlai na tile n’ag'aŋ muguzak a cosi li, hlai n’aliɗi Izrayel e simni war fuŋɗi li, ɗai e tipi aha war Yeruzalem maini ɗif ktai nɵa.

²Yosva ahini Yosadak gaiɗi tawalakaini na paakai zi ɓaka e fiki amai, gaini Zorobabel ahini Seyaltiyel gaiɗi tawalakaini, e rgi hlai zi ɓaka na wiini Alaw na wiiɗi Izrayel, kapai e kisi ɓaka zi yi woni, maini n’aŋ gai ɗû war seŋ zi gadai na wiini Musus ɗif na wiini Alaw nɵa.

³E rgi hlai zi ɓaka midini ezini zi tûri n’avut buri e ɗa gaiɗi hunai wuzaɗi ɗai na e niviɗisi midini afti hanɗa tekeɗeɗi, e kisi ɓaka zi yi wiini EPIƊ-ƊAI woni, ɓaka zi yi na gorof par gaini na koskoi.

⁴Asakal par, e ziti fet zi gumu, maini n’aŋ gai ɗû, e kisi ɓaka zi yi mefeŋ mefeŋ paŋ pin pɵani na ɗiyali war yivai maini pin de nɵa.

⁵Asakal hanɗa e kisi ɓaka zi yi na kûreɗ-kûreɗ, ɓaka zi yi na wiini merfeŋni tile paŋ gaini na wiini hlai paŋ na tikali edi burini EPIƊ-ƊAI, pra lai buriɗi nagai paŋ n’e si like na pin diriɗi burini EPIƊ-ƊAI.

⁶Sin mefeŋ n’avut na wiini tile n’ag'aŋ muguzak, e tiki piɗi aŋ si ɓaka zi yi sin EPIƊ-ƊAI. Paŋ ktai ezini tempel na wiini EPIƊ-ƊAI a tora azumai kai hai.

⁷E si farai wiiɗi ɗai zi kilɗi kiryit gaiɗi nagai zi kilɗi luwuŋ, wazagai zi simi, zi ci gaini emel lai wiiɗi ɗai na Sidon gaiɗi na Tirus, kapai e kisi luwuŋ Sedre na Liban par agoɗom ɗaw haa a yaffa, maini piɗi futi na pai Sirus na Persus a sitiɗi nɵa.

⁸War buza n’ag'aŋ sulu, asakal n’e cûsi aha war dalam na wiini Alaw war Yeruzalem ya ɗa, war tile n’ag'aŋ sulu, Zorobabel n’ahini Seyaltiyel, Yosva n’ahini Yosadak, gaiɗi tawalakaiɗi n’e hini lai, paakai zi ɓaka gaiɗi Levitkai lai, gaiɗi nagai paŋ n’e wiyisi edi war bege par aha Yeruzalem, e tiki pini sda, e miliɗi Levitkai na buza caaɓa ta amai sek kapai e ɵi wuzaɗi war sdani dalam na wiini EPIƊ-ƊAI.

⁹Amma Yosva gaiɗi alini gaiɗi tawalakaini, Kadmiel gaiɗi alini, alini Henadad, aliɗi gaiɗi tawalakaiɗi Levitkai lai, gai hlaiɗi e zizini siɗi aŋ tili sda tiɗi nagai n’e zi sdaɗi dilimi na wiini Alaw ɗa.

¹⁰Nɵa ɗai zi rgi dalam e tûûri ezini tempel na wiini EPIƊ-ƊAI azumai, won hlai ni, e giriɗi paakai zi ɓaka na gaini sapaɗi siɗi gaini faana tiɗi lai gaiɗi Levitkai n’alini Asaf gaini kawai n’a wa kapai e kûli EPIƊ-ƊAI pin gadai na David, paiɗi Izrayel a siŋɗi.

¹¹War yama zi kol na sin Alaw gaini zini teseɗi na sin EPIƊ-ƊAI, nagai e wiyi seŋ wiiɗi marɗi: buri ni a pɗem, buri yumni na siɗi Izrayel a na haa hlai na vada kai. Ɗai paŋ e sûûri gaini wulaɗi amai, e kûli EPIƊ-ƊAI buri pin zi tiki na wiini dalamni EPIƊ-ƊAI.

¹²Nɵa paakai zi ɓaka viya gaiɗi Levitkai gaiɗi tamaini dalam na walakai n’e siɗi tempel n’avut ɗa e tûwi gaini wulaɗi amai, won hlai n’e tili e ɗa e tûûri ezini dalam hanɗa pra azi n’ag'aŋ sulu wuzani arɗi. Amma zamai viya lai e sûûri suura zi firiyi.

¹³Nɵa ɗai e kiɗi aŋ zi ɓraw arbani suura zi kwimi gaini zi firiyi kai. Buri ɗai e sûûri gdaŋ gara haa suuraɗi a ɵinasi edi gaigai par.