Read Mousgoum Ezdras 4 Bible Online

Ezdras 4 - Mousgoum bible

Ezdras 4

¹Hlai na gawɗi ɗai na Yuda gaiɗi ɗai na Benyamin e ɵini ɓa nagai n’e ɗisi ka edi aŋ bege e ɗa rgi tempel burini EPIƊ-ƊAI, Alaw na wiiɗi Izrayel,

²e tûrisi sini Zorobabel gaiɗi n’abakai na tamai dalam e miɗiɗi: tiyi mi diri mi rgi gaiki lai buri mi ɗa yiki yikini Alaw na wiiki maiki tiki nɵa lai, pra mi ɗa zini ɓaka, haa sin mefeŋ na wiini Asarhadon, pai na Asiriya, na a kiyisi won na par.

³Amma Zorobabel, Yosva gaiɗi tamai dalam n’e hini na wiiɗi Izrayel e wiyiɗi seŋ: Tiyi mi siɗi aŋ rgi dalamni Alaw na wiyi aŋ bonu gaiki kai, a seŋ na wiyi kiiyi, aŋ rgi dalam burini EPIƊ-ƊAI, Alaw na wiiɗi Izrayel, maini Sirus pai na Persus a siyi futi ɗa nɵa.

⁴Ɗai na midini afti a biziɗi sda arɗi ɗai na Yuda, pra e miliɗi hunai piɗi ɗai zi rgi.

⁵Nagai e wûriɗi ɗai zi si gadai gaini faraiɗi kapai e hiɗi hiiniɗi na pɗem. Hanɗa sin mefeŋ na Sirus a n’aŋ pai war Persus, haa siɗi pai na wiini Dariyus pai na Persus.

⁶War mefeŋ na pai Serkises a na ŋa, war piɗi paini zi tiki par tar, e ɗûhi seŋ zi pi midiɗi ɗai na Yuda gaiɗi na Yeruzalem.

⁷War mefeŋ na wiini Artaserkises, Biɵam, Mitredat, Tabeel gaiɗi marɗi na zamai lai e ɗûhi wiini Artaserkises, pai na Persus. Seŋ na war maktuɓ hanɗa a ɗo war ɗû na wiiɗi Aramekai, te bunda edi war miɗi na wiiɗi Aramekai lai.

⁸Lawan Rehum gaini Simsai, ɗif zi ɗûhi wazagai, e ɗûhini maktuɓ wiini Pai Artaserkises midiɗi Yeruzalem maini nɵa:

⁹Lawan Rehum, ɗif zi ɗûhi wazagai Simsai, marɗi na zamai lai, ɗai na Din, na Afarsatak, na Tarpel, na Afaras, na Vruk, na Babilon, na Sûz, na Deha, na Elam,

¹⁰gaiɗi ɗai na zamai lai, na ɗif n’abai Asnappar a zûgûɗisi edi midini aftiɗi par a kiɗisi aŋ simni war fuŋ na Samariya, gaini galni afti n’ahina anene, duɓani yem-ra Öfrata par."

¹¹Hanɗa te ktai arbani maktuɓ n’e binditi edi azi viya, na e ɵinitini: Pai Artaserkises, tiyi bagakaiku, ɗai n’anene duɓani yem-ra na Öfrata par.

¹²Pai, ɵina edi gaglai, Yudeyakai n’e hilisi ahaku par, amai siyi a Yeruzalem ɗa, e ɗa rgi fuŋ na hriŋ amai. Aga e rgi ɵaga amai; ezini zi tûûri a zizina ya.

¹³Pai, ku siya ɓa, a rga amai li ɗa, n’a ɓa ɵagai paŋ te daba li amai ka ɗa, aga e virgi wiini ni n’a ŋa midini aftiɗi kai, lambu kai, tar na midini afti kaalai. Nɵa aga a kasi tûrli war godai na wiini pai.

¹⁴Tiyana maini tiyi mi ɗa azumai azuku nɵa, mi tiliɗi ɗai azi anya sini pai mai hanɗa ɵa a zuva aryi kai. Buri nɵa sai ku ɵina labar hanɗa.

¹⁵Hina ɗai e fifiki war maktuɓ na seŋ na miɗi tamaiku paŋ a nava woni. War maktuɓ zi giɗimi seŋ, aga ku siɗa, aga ku nava lai ɓa fuŋ hanɗa a fuŋ na hriŋ, na zi yuvuk siɗi paakai, siɗi Lawanai na war Provens, woni par, fiki n’amai a na za haa gamai par. Pin hanɗa, fuŋ n’abai hanɗa a nava ɓilki n’edi.

¹⁶Pai, ku siɗa ya ɓa: na ɓa fuŋ n’abai hanɗa a rga li amai, na ɓa ɵagani a rga li amai pra ɗa, ku siɗa ɓa aftiku agwiyeŋe nɵa anene duɓani yem-ra na Öfrata par kir kai.

¹⁷Pai a waya miɗi siɗi, pin maktuɓ hanɗa: "Lawan Rehum, ɗif zi ɗû wazagai Simsai gaiɗi marɗi na zamai na e simni war Samariya gaini galni afti n’anene duɓani yem-ra na Öfrata par lai mu ziki wuti,

¹⁸maktuɓ na ki ɵinitisi e ŋiti edi wuza gaglai gara.

¹⁹Pin miɗiŋa, e fifiki ezini wazagai, e niviŋ ɓa haa gamai par, fuŋ hanɗa a na faka amai siɗi paakai, t'aŋ gai tûrli, gaini fiki amai.

²⁰Paakai zi spak e ɗi ka aha war Yeruzalem n’e ŋi midini afti n’anene duɓani yem-ra na Öfrata par. E virgi ka tar, gaini Lambu, gaini vigi na midini afti lai.

²¹Tiyana ki miɗiɗi wiiɗi ɗai hanɗa buri e ɗiyi gaini sdaɗi ɗa. Fuŋ hanɗa aga a rga amai kai haa hlai na mu muɗa li.

²²Ki zi hangal, kapai ki zi faali war seŋ hanɗa kai, kapai meefeŋ hanɗa a riya amai haa a kasi asar midiɗi paakai kai."

²³Tizaw, won hlai na seŋ n’aŋ warni maktuɓ na wiini pai Artaserkises a ŋa edi li wuzani Rehum, wuzani Simsai ɗif zi ɗû wazagai gaiɗi marɗi lai, e pirmi aŋ hili a Yeruzalem siɗi Yudeyakai. E ɗili sda tiɗi gaini gdaŋ, gaini rigiji.

²⁴Nɵa, sdani dalamni Alaw aha war Yeruzalem ɗa a ɗiya zawwa. Ɗilini hanɗa a fana haa sin buza n’ag'aŋ sulu na wiini Pai Dariyus, na Persus.