Read Mousgoum Ezdras 5 Bible Online

Ezdras 5 - Mousgoum bible

Ezdras 5

¹Won hlai na ɗai na min Alaw Haggai gaini Sakariyas ahini Iddo e miɗi seŋ na wuze midiɗi Yudeyakai n’e ɗasi war Yudeya, war Yeruzalem, war yikini Alaw na wiiɗi Izrayel n’a na midiɗi,

²Zorobabel ahini Seyaltiyel, Yosva ahini Yosadak, e fiki amai, e tiki piɗi aŋ rgi dalamni Alaw aha war Yeruzalem. Ɗai na min Alaw na wiini Alaw e ɗi ka gaiɗi aŋ zini piɗi.

³War sarti hanɗa, Lawan Tatenai na midini afti n’anene duɓani yem-ra Öfrata par, Setar-Boznai gaiɗi marɗi e hilisi siɗi e miɗiɗi: a siki futi aŋ rgi dalam hanɗa asiya ɗa? Aŋ rgi zalagakai hanɗa amai ɗa?

⁴Nɵa mu zilbiki buri ki siyi yikiɗi ɗai n’e ɗa zi sda zi rgi hanɗa.

⁵Amma arni Alaw na wiiɗi a na midiɗi n’abakai na wiiɗi Yudeyakai. E ɗili sda tiɗi kai haa won hlai na Dariyus a nava labar, a waya seŋ pini lai.

⁶Seŋ n’aŋ warni maktuɓ na te ɵina sini Pai Dariyus, sini Lawan na yikini ɓa Tetanai n’a ŋa midini afti n’anene duɓani yem-ra Öfrata par, Setar-Boznai gaiɗi marni zamai, ɗai na Afarsak n’e ɗa war galni afti n’anene duɓani yem-ra Öfrata par.

⁷Nagai e ɵininisi seŋ ktai n’a ɗo maini nɵa: Wiini Pai Dariyus, mi ɗa ɵiinii wuti.

⁸Pai aga asiɗa ɓa mi hili war Provens na wiiɗi Yuda ya, war dalam na wiini Alaw n’abai, dalam a rga gaini ali-fuŋ n’abakai, gaini luwuŋ arbani ɵaga tiɓ tiɓ. Sda hanɗa a na za woɗi futini, a na hala tiɗi kokolai lai.

⁹Nɵa mu zilbiɗi n’abakai hanɗa, mi miɗiɗi: A siki futi aŋ rgi dalam hanɗa, aŋ rgi ɵagani amai lai asiya ɗa?

¹⁰Pra, mi zilbi yikiɗi ɗai hanɗa kapai ku siɗiɗi, kapai mi ɗû yikiɗi ɗai n’e ɗa wuzaɗi.

¹¹Wiyini seŋ na wayasi siyi a na maini nɵa: tiyi mi ɗi ɗai zi sda na wiini Alaw n’amai gaiɗi yai lai, tiyi mi rgi na ɗa a dalam n’a rga tiyana buza viya, na Pai n’abai ktai war Izrayel a rgaŋ haa a vadaŋ vat.

¹²Amma buri ɓa tamaiɗi e divini agulni Alaw n’amai, a siɗi war tini ɗif na Kalde, Nebukadnezar, Pai na Babilon, a haɗa dalam hanɗa azumai, a kiɗi ɗai aŋ bege edi war Babilon.

¹³Paŋ ktai, war buza n’avut na wiini Sirus, Pai na Babilon ɗa, Pai Sirus a sa miɗi buri mi rgi dalam n’Alaw hanɗa.

¹⁴Pra, wazagai na war dalamni Alaw na zi or gaini na zi arzaŋ na Nebukadnezar a mulaŋsi war tempel na Yeruzalem par, a kaŋ war tempel na Babilon, Pai Sirus a mulaŋsi edi war tempel na Babilon par, buri a siŋni wiini ɗif na yikiŋ ɓa Sesbatsar n’a tikaŋ aŋ Lawan.

¹⁵A miɗini: mula wazagai hanɗa, kaŋ war tempel na Yeruzalem, dalamni Alaw aga a rga amai pra war balamni n’avut.

¹⁶Nɵa Sesbatsar ni, a halasi a tora ezini dalam n’aha war Yeruzalem. Haa war mefeŋ ni par haa tiyana, a na rga amai a vada kai.

¹⁷Nɵa, tiyana ɗa, na ɓa Pai a dara, a hiniɗi e fifiki maktuɓ amlai war dilimi zi godai na wiini Pai na Babilon, na ɓa Pai a sa futi buri rga dalamni Alaw hanɗa amai aha war Yeruzalem zaw, kai ɗi ɗa, e ɵiniyisi seŋ na Pai a ɗiyaŋ pin seŋ hanɗa.