Read Mousgoum Ezdras 7 Bible Online

Ezdras 7 - Mousgoum bible

Ezdras 7

¹Asakal na wazagai hanɗa, war mefeŋ na wiini Pai na Persus, Artaserkises, Ezdras, ahini Seraya, ahini Azarya, ahini Hilkiya,

²ahini Sallum, ahini Sadok, ahini Ahitub,

³ahini Amariya, ahini Azarya, ahini Merayot,

⁴ahini Zerahya, ahini Uzzi, ahini Bukki,

⁵ahini Abisuwa, ahini Pinhas, ahini Eleyazar, ahini Aaron, Pai zi ɓaka n’abai.

⁶Ezdras hanɗa a halasi a Babilon par. A ɗif zi ɗû wazagai, a siɗa gadai na Epiɗ-ɗai Alaw na wiiɗi Izrayel a siŋni wiini Musus ɗa gara. Pai a sini wala n’a zilbaŋ paŋ buri tini EPIƊ-ƊAI te na fu midini.

⁷Arbaɗi aliɗi Izrayel, arbaɗi Paakai zi ɓaka Levitkai, ɗai zi zini yama, zi giɗimi mini magala, ɗai zi sda, zamai zamai arbaɗi e hili amai a Yeruzalem, war buza n’ag'aŋ muguzak na wiini Pai Artaserkises.

⁸Ezdras a cosi war Yeruzalem war tile n’ag'aŋ ɵim, hanɗa war buza n’ag'aŋ muguzak na wiini Pai.

⁹Buri ɓa, war mefeŋ n’avut na wiini tile n’avut, ni dama a ɗiya mefeŋ na wiini hili na morkoi edi war Babilon par, a cosi a Yeruzalem war mefeŋ n’avut na wiini tile n’ag'aŋ ɵim, buri tini Alaw na wiini te na fu midini.

¹⁰Buri ɓa Ezdras rga warni buri hitra gadai na wiini EPIƊ-ƊAI, a za pini lai, a hitra gadai gaini de aha war Izrayel lai.

¹¹Seŋ n’aŋ warni maktuɓ na Pai Artaserkises a siŋni wiini Ezdras Pai zi ɓaka, ɗif n’a sɗa gadai gara lai, ɗif na hitra seŋ na EPIƊ-ƊAI a gada midini gaini gadaini na siɗi Izrayel a na maini nɵa:

¹²Artaserkises, paiɗi paakai, sin pai zi ɓaka Ezdras, ɗif na sɗa gadai na na wiini Alaw n’amai gara, wutiŋa suku

¹³Miɗiŋa a hanɗa: midini aftiŋa, asiya asiya paŋ n’arbaɗi ɗai na Izrayel, paakaiɗi zi ɓaka gaiɗi Levitkaiɗi, na dirini a na buri a hala a Yeruzalem, a hala wiini gaiku.

¹⁴Buri ɓa tuku ku ɵeŋ na wiini Pai gaiɗi na muguzak n’e sini gadai, aga ku hala aŋ tiliti Yuda gaiɗi Yeruzalem pin seŋ zi gadai na wiini Alaw na wiiku n’a saŋ tuku.

¹⁵Pra, aŋ ka arzaŋ gaini or na pai gaiɗi ŋarakaini e siŋ pin diriɗi sin Alaw na wiiɗ Izrayel na hlaini zi simni a na aha war Yeruzalem.

¹⁶Arzaŋ gaini or n’aga ku navaŋ war Provens na Babilon paŋ gaini like na ɗai gaiɗi paakai zi ɓaka aga e siŋ pin diriɗi burini dalam na wiini Alaw na wiiɗi a Yeruzalem.

¹⁷Pin hanɗa, aga ku wula muduku kai gaini dala hanɗa ku wura garakai, mapatakai gaini alini adumai gaini wazagai na pɗamai burini akai gaini ɓaka zi vin, aga ku za ɓaka hanɗa war hlai zi ɓaka na war dalamni Alaw na wiiki a Yeruzalem.

¹⁸Wala na tuku gaiɗi tawalakaiki ki tiliŋ li a pɗem buri ki ziŋ gaini pini arzaŋ gaini or n’a hina, aga ki ziŋ pin diri na wiini Alaw na wiiki.

¹⁹Wazagai n’aga a sa suku burini sda na war dalamni Alaw, ku mulaŋ azumai Alaw n’aha Yeruzalem.

²⁰Wazagai zamai n’a hina aŋ wûri burini dalamni Alaw na wiiku, n’aŋ muduku buri ku wuraŋsi paŋ, ku tikaŋ midiɗi godai na wiini Pai.

²¹Ta, Pai Artaserkises, mu sa miɗi siɗi ɗai zi giɗimi godai n’e ɗa midini afti n’anene duɓani yem-ra Öfrata par buri e zi wala paŋ na Ezdras, Pai zi ɓaka, ɗif na sɗa gadai na wiini Alaw n’amai gara, a zilbiki midini kal kal maini n’a daraŋ nɵa.

²²Aga ki kiti siki aŋ sini arzaŋ kilo dubu hu, algama kilo dubu doogo doogo hu, vin litir dubu puɗu, emel litir dubu puɗu, gaini manda pin diriki.

²³Wala paŋ n’Alaw n’amai a gada midini, burini dalamni Alaw n’amai aga a za witaw tar, war hunai na ɓa hiy na wiini Alaw aga a halasi midini aftini, midini pai gaiɗi alini.

²⁴A suwa pra, mu miɗiki buri ku siɗi futi buri e yima tar, Lambu zaw vrak buri vuga midini afti tiɗi paakai zi ɓaka, Levitkai, ɗai zi zini yama, n’e giɗimi min magala, bagakai gaiɗi zi sda na war dalamni Alaw kai.

²⁵Buriku tuku Ezdras, gaini yel na wiini Alaw n’aŋ war tuku, miliɗi ɗai zi ɗûkliti sariya, n’aga e ziti sariya wiiɗi ɗai, n’e ɗa midini afti n’anene duɓani yem-ra Öfrata par paŋ, wiiɗi nagai paŋ n’e siɗi gadaini Alaw na wiiku ya, aga ku hitraŋ wiini ɗif paŋ na sɗaŋ kai.

²⁶Asiya asiya paŋ n’aga a va gadai na wiini Alaw na wiiku gai na wiini Pai amai woɗi futini ɗikat kai, sariya na wiini te na maini nɵa: mri zaw, birgi n’edi zaw, vrak zaw, daŋgai.

²⁷Kol sini Epiɗ-ɗai Alaw na wiiɗi tamaimu, buri a wa warɗi agulni Pai buri a sa kol wiini dalam na wiini Alaw na Yeruzalem.

²⁸Wuzani arni Pai, wuzani arɗi ɗai n’e sini gadai, gaiɗi n’abakai na wiini zi spak, pin yumni, a tika hiinini mada, nɵa won hlai na mu nava gdaŋ, buri tini Epiɗ-ɗai Alaw na wiya te na fu mada, mu tipiɗi zamai arbaɗi n’abakai na wiiɗi Izrayel buri e hili gaya.