Read Mousgoum Ezdras 8 Bible Online

Ezdras 8 - Mousgoum bible

Ezdras 8

¹Tili yikiɗi tamai dalam n’e hilisi amai gaya a Babilon par, gaini pinzibaɗi lai war mefeŋ na wiini Pai Artaserkises.

²Arbaɗi alini Pinhas par a Gersom, arbaɗi alini Itamar par a Daniyel, arbaɗi alini David par a Hattus,

³Ktai arbaɗi alini Sekaniya, arbaɗi alini Pareos par a Zekariya, nagai e ɗû gaiɗi ɗai zamai piɗi miya gai doogo doogo ɵim.

⁴Arbaɗi alini Pahat-Mowab par a Elyehenaï ahini Zerahiya, ɗai zamai gaini miya sulu.

⁵Arbaɗi alini Zattu par a Sekaniya, ahini Yaziel gaiɗi ɗai zamai gaini miya hu

⁶Arbaɗi alini Din par a Ebed, ahini Yonatan gaiɗi ɗai gaini doogo doogo ɵim;

⁷Arbaɗi alini Elan par a Yesaya, ahini Ataliya, ɗai gaini doogo doogo muguzak.

⁸Arbaɗi alini Sefatiya par a Sebadiya ahini Mikayel gaiɗi ɗai gaini doogo doogo mitwis;

⁹arbaɗi alini Yowab par a Obadia, ahini Yehiel gaiɗi ɗai gaini miya sulu gai doogo pi mitwis

¹⁰Arbaɗi alini Bani par a Selomit, ahini Yosifiya gaiɗi ɗai gaini miya gai doogo doogo ɵaara.

¹¹Arbaɗi alini Bebai par a Zakariya, ahini Bebai gaiɗi ɗai gaini caaɓa pi mitwis

¹²Arbaɗi alini Azgad par a Yohanan ahini Hakatan gaiɗi ɗai gaini miya gai doogo.

¹³Arbaɗi alini Adonikam, e ɗi n’agogoi n’asakal tar: Elifelet, Yeiel, gaini Semaya gaiɗi ɗai gaiɗi doogo doogo ɵaara.

¹⁴Arbaɗi alini Bikvai par a Utai gaini Zakkur gaiɗi ɗai gaiɗi doogo doogo mugusak.

¹⁵Mu tipiɗi ɵimani ra n’a ka a Ahava sek ɗa, mi fini warni mefeŋ hu. Mu vuga arbaɗi ɗai ɗa blaŋ blaŋ, mu niviɗi e ɗi paakai zi ɓaka gaiɗi ɗai zamai lai, amma mu nava ktai arbaɗi ahini Levi won kai.

¹⁶Nɵa mu ɵiniɗi n’abakai: Eliezer, Ariel, Semaya, Elnatan, gaini Yarib, Elnatan, Natan, Zakaria, Mesullam gaiɗi ɗai zi hitri ɗai: Yayarib gaini Elnatan.

¹⁷Gaini miɗi na ɓa e hili sini Iddo, pai n’a na war fuŋ na Kasifia, mu wiiɗi seŋ na kapai e miɗiŋ sin Iddo gaiɗi tawalakaini na gaini na war fuŋ na Kasifia, war miɗi, kapai e kiyisi ɗai zi sda na war dalamni Alaw na wiyi.

¹⁸Maini tini Alaw na wiyi zi spak te na fu midiyi, e kiyisi ɗif ktai zi yel gara, ktai arbaɗi alini Mahli, ahini Levi, n’ahini Izrayel n’e yikiŋ ɓa Serebiya, alini gaiɗi tawalakaini lai, piɵiɗi paŋ doogo pi mitwis.

¹⁹Gaini Hasabiya gaini Yesaya ktai arbaɗi alini Merari, tawalakaini gaiɗi alini piɵiɗi paŋ ɗai caaɓa.

²⁰Arbaɗi bagakai na David gaiɗi n’abakai e siɗi buri sda na wiiɗi Levitkai, ɗai miya sulu gai caaɓa, paŋ e ɗû midini yikiɗi yikiɗi.

²¹Won hlai hanɗa, gobi ɵimani ra na Ahava, mu muɗa buri tikini sai. Hanɗa buri mi hûsi siyi azumai wuzani Alaw na wiyi, aŋ piyi yum war tini par. Kapai mi kiti morkoiyi gaini huwyi kai, tiyi gaiɗi aliyi gaini zakyi paŋ lai.

²²Buri a tala ara siyer aŋ zilba pai buri a siyi ɗai zi diɓiri plasai zi gaw, kapai e giɗimiyi buriɗi gawyi na mi siɗi aŋ niviɗi war futi, buri mi miɗini wiini pai ɓa: " Tini Alaw na wiyi te na spak gara midiɗi nagai n’e piyiŋ; amma hiy na wiini a na gdaŋ gara midiɗi nagai paŋ n’e hiniŋ edi".

²³Nɵa, mi tikiti sai, mi zilbi yum hanɗa war tini Alaw na wiyi par, ni a ɵina tuwiyi lai.

²⁴Asakal par, mu miliɗi edi kiiɗi arbaɗi paakai zi ɓaka par n’abakai doogo pi sulu gaini Serebiya, tawalakaiɗi na zamai miɗi lai.

²⁵Mu tala gumani arzaŋ gaini or gaini wazagai zi sda na sasi aŋ like burini dalamni Alaw na wiyi, na pai gaiɗi n’e sini gadai gaiɗi n’abakai na wiini gaiɗi aliɗi Izrayel n’e ɗa e kiŋsi.

²⁶Mu siɗi arzaŋ talent miya ɵaara doogo doogo ɵim, gaini wazagai zi arzaŋ na faraini talent miya ɗaw, gaini or talent miya ɗaw lai war tiɗi.

²⁷Kawai zi ci zi or caaɓa na faraini "sulai zi or dubu ɗaw, wazagai sulu zi kiya na mekele na ŋala, na zufai gara, na wûrini maini or nɵa lai.

²⁸Asakal par mu miɗiɗi: Tiki ki viri edi ɗaw aŋ wiini EPIƊ-ƊAI, wazagai zi sda hanɗa lai a sa edi aŋ wiini EPIƊ-ƊAI, arzaŋ na gaini or hanɗa a like na sin Epiɗ-ɗai Alaw na wiiɗi tamaiki.

²⁹Ki zi hangal war gɗamni, haa hlai na ki cû aha war Yeruzalem. Won hlai ni aga ki siŋki gumani wuzaɗi abakaiɗi paakai zi ɓaka wuzaɗi Levitekai gaiɗi tamaini dalam na wiiɗi Izrayel, amlai war dalamai n’agogoi n’aŋ ɵimani dalamni EPIƊ-ƊAI.

³⁰Nɵa paakai zi ɓaka gaiɗi levitekai e tiki gumani or gaini arzaŋ gaini wazagai zi sda midiɗi kapai e kiŋ aha war Yeruzalem, war dalamni Alaw, na wiyi.

³¹War mefeŋ doogo pi sulu na wiini tile n’avut, mi fikisi sin ra na Ahava par buri mi hili aha war Yeruzalem. Tini Alaw na wiyi te na fu midiyi, warɗi futi lai a kûtiyi war tiɗi gawyi par gaiɗi nagai n’e riɓtiyi kapai e virmiyi.

³²Mi cû aha Yeruzalem, siyi amla mefeŋ hu.

³³War mefeŋ n’ag'aŋ puɗu, mi tili gumani arzaŋ gaini or gaini wazagai zi sda lai amlai war dalamni Alaw na wiyi, mi siŋni war tini pai zi ɓaka Meremot ahini Uriya na Eliyazar ahini Pinhas a naka gaini na levitekai Yozabad ahini Yosva gaini Nowadiya ahini Binnui e ɗi fu gaiɗi.

³⁴Pɵani gaini gumani paŋ a nafu war balamni n’avut. Gumani na gaini hlaini paŋ a ɗo azumai war mefeŋni ɗa,

³⁵Nagai n’e wiyisi edi war bege par, n’e kiɗi edi gaini gdaŋ, e zi ɓaka zi yi burini Alaw na wiiɗi Izrayel gaini garakai doogo pi sulu buriɗi Izrayel paŋ, gamalakai doogo doogo ɵeeŋe pi ɵaara, alini adumai doogo doogo muguzak pi muguzak, gaini mapatakai doogo pi sulu burini girdini tuwur edi, paŋ aŋ ɓaka zi yi wiini EPIƊ-ƊAI.

³⁶Asakal par a siɗi miɗi na wiini pai wiiɗi nagai na pai a tikiɗi midini hlai ta ta gaiɗi lawanai n’anene duɓani yem-ra Öfrata par. Nagai e zini piɗi ɗaini Alaw gaini dalamni Alaw lai.