Read Mousgoum Ezdras 9 Bible Online

Ezdras 9 - Mousgoum bible

Ezdras 9

¹Won hlai na hanɗa paŋ a daba li, n’abakai e tûrisi gaya aŋ miɗiŋ ɓa: Ɗai na Izrayel gaiɗi paakai zi ɓaka gaiɗi levitekai lai e ɓirwiɗi edi siɗi ɗai na midini afti par kai. Nagai e tipi gaiɗi kal kal war hi-hir na wiiɗ ɗai hanɗa, hi-hir na wiiɗi ɗai na Kanan, na wiiɗi Hititekai, na wiiɗi Perizitekai, na wiiɗi Yebuzitekai, na wiiɗi Amonitekai, na wiiɗi ɗai na Mowab, na wiiɗi ɗai n’Egipte gaiɗi Amoritekai.

²Nagai gaiɗi aliɗi e miliɗi aliɗi na falakai aŋ falakaiɗi, pinziba na sɗik a ɵihiɗa amai gaiɗi ɗai na midini afti. Ɗai n’abakai gaiɗi nagai n’e ɗûkliti sariya e ɗi n’avut aŋ ziibi tiɗi arni seŋ na hi-hir hanɗa.

³Won hlai na mu ɵina hanɗa, mu ŋiriwa sapa na sa gaini dawraŋa edi, mu rata ayir na mada gaini miɗigi na ma, mu roko azumai ezini hlai rok gai kwimi n’abai.

⁴Nagai paŋ n’e ziriyi wuzani seŋ na wiini Alaw e tipisi sa buri ɗikat-kai na wiiɗi n’e kiɗisi edi war bege par, mu sumna azumai gaini kayai haa sin ler na wiini ɓaka na koskoi.

⁵Sin ɓaka na koskoi, mu pasi sa amai war kayaiŋa par, sapa gaini dawra na sa gai ŋiriwi edi, mu kɵa azumai midini kurnaiya, mu yima ta amai sin EPIƊ-ƊAI Alaw na wiya,

⁶mu miɗini: Alaw wiya, m’aŋ war tuku, mu na war siyer, mu kiɗa aŋ yimaɗi ara amai suku kai, Alaw wiya buri mefeŋyi a za viya ta, a suwa midiyi li, tuwuryi a wulaɗi haa amai ta.

⁷Sin mefeŋ na wiiɗi tamaiɗi par haa girna, meefeŋ na mi ziŋ suku a na abai, burini tuwuryi, tiyi paakaiɗi gaiɗi paakai zi ɓaka, mi si edi tiɗi paakai na wiiɗi yai, min kaɵkar, min bege, min vram gaini siyer haa tiyana.

⁸Tiyana, buri hlai n’agwi, Epiɗ-ɗai Alaw na wiimu, pin yumni, a hina ɗai pumu agwi, n’e kûrɗi, pra a sumu hlai zi simni amlai war dalamni na sɗik, kapai a mala armu edi gaglai, mu suŋfumu agwi lai war begemu.

⁹Buri tumu mu ɗumu bagakai, amma war begemu tekeɗeɗi Alaw na wiimu, a hinumu kai, wuzaɗi paakai na Persus, war pɗemni, a mula arni mudumu aŋ sumu suŋfa, aŋ rga dalam na wiini Alaw na wiimu amai, aŋ zizina greŋni war ezini n’avut, a sumu hlai zi ŋoyai aha war Yuda, war Yeruzalem lai.

¹⁰Hai Alaw na wiyi, tiyana asakal hanɗa paŋ aga mi miɗi zamai ɗa ma ɗa? Tiyi mi hini gadaiku edi,

¹¹na tuku, war miɗi ɗaiku zi sda, ɗai na min Alaw, ku saŋ maini nɵa: Afti na ki ɗa niyi aha warni aŋ tikiŋ aŋ wiiki, a afti na hi-hir; e bindiŋ hi-hir e ɗi ɗai na midini afti ni ɗa, gaini hi-hir n’e viŋ gaini edi min afti na ktai par haa sin na zamai gaini sdaɗi na haharai.

¹²Tiyana aga ki siɗi aliki na falakai wiiɗi aliɗi na maɵagai kai, ki miliɗi aliki na falakai wiiɗi aliki na maɵagai kaalai. Ki tiki hiiniki midini ɵeɗ gaini pɗem na wiiɗi duk kai, kapai ki bindi gdaŋai, ki simi war wazagai na pɗamai na midini afti ni ɗa, aga ki hiniŋ aŋ bulum wii aliki lai, haa kureɗ.

¹³Paŋ ktai, asakal wala n’a za siyi buri sdaiɗi na meefeŋ, gaini tuwuryi n’abai na suku, mi siɗi ɓa tuku Alaw na wiyi ku tika pini meefeŋyi paŋ kai. Nɵa, ku hina ɗai piyi n’a kûrɗisi, na tiyana e ɗi na.

¹⁴Aga mi kiɗi aŋ wiyi pra aŋ hi amai midini gadaiku, aŋ tipi gaiɗi ɗai na haharai hanɗa war tiki pra ɗi? Aga ku za hiy siyi haa ku vidiyi edi kafa, ku hina ɗif ktai piyi kai nɵa kai ɗi?

¹⁵EPIƊ-ƊAI Alaw na wiiɗi Izrayel, tuku ku jre-ɗikat buri ɓa girna, tiyi mi ɗa karyi maiɗi ɗai n’e kûrɗisi gai kûrɗi nɵa. Tala mi ɗa wuzaku, gaini tuwuryi, paŋ ktai, maini hanɗa nɵa ɗif a kiɗa aŋ ɗiya wuzani arku kai.