Read Mousgoum Nahamiyas 1 Bible Online

Nahamiyas 1 - Mousgoum bible

Nahamiyas 1

¹Seŋ na wiini Nehemias n’ahini Hakaliya. Nahamiyas a ɵina labar midiɗi Yeruzalem. War tile na wiini kiɵev, war buza n’ag'aŋ saŋa na wiini pai Artaserkises, m’aŋsi war Suza fuŋ n’abai zi ɵaga.

²Zigela ktai Hananiya, a halasi war Yuda par gaiɗi ɗai zamai gaini lai, mu zilbiɗi midiɗi Yudiyakai n’e hini karɗi pini gaw, miɗi Yeruzalem lai.

³E wiyiŋa seŋ e miɗi: Nagai n’e hini pin gir, aha war provens na Yuda, e ɗa war gir n’abai, war siyer lai, ɵagai na Yeruzalem t'aŋ gaini ɓisi gaini hiɗi lai, mini magala gaini yi huw-huw lai.

⁴Won hlai na mu ɵina labar hanɗa, mu sumna azumai dam, mu tuwa, mu sumna war tuwi mefeŋ yaw sa a pla edi kai, asakal par mu tika sai, mu siiwa Alaw n’amai.

⁵Mu muɗa: Hai! EPIƊ-ƊAI, Alaw n’amai, Alaw n’abai zi spak, tuku na ku giɗima bonu gaini pɗem n’arbaku gaiɗi n’e duruku, n’e zi pini gadaiku lai.

⁶Zaga ɵimaku miyi zak, mula arku midiyi sa aŋ ɵina siiwi na ta ɵeŋku mu na kaŋɗi wuzaku. Duvuk gaini girvudi paŋ m’aŋ war siiwa wuzaku buriɗi aliɗi Izrayel na ɗaiku. Tiyi aliɗi Izrayel mi siɗi ɓa mi zi tuwur suku viya, ta gaini pinzibaŋa paŋ mi zi tuwur suku.

⁷A jre, tiyi mi ɓulkuku hiiniku gara, mi zi pini gadaiku kai, pini gadai zi ɗû gaini zi ɗiyi na ku siŋni wiini Musus ɵeŋ na wiiku kai.

⁸Hina muduku a kɵa gaini seŋ na Musus a muɗaŋ pini miɗi na wiiku ɓa: Na ɓa ki ɗa zi woɗi futini ɗikat kai, Ta aga mi ɵiriki edi arbaɗi pinzibaɗi ɗai.

⁹Amma, na ɓa ki wiyisi li sa, ki yimi gadaiŋa li, ki zi pini li lai, koo ɓa ɗaiki n’e ɵiri edi, e ɗa edi mini dibini afti tekeɗeɗi, aga mu tipiɗisi, mu kiɗisi won hlai na mu varaŋ kapai yikiŋa a yika woni.

¹⁰EPIƊ-ƊAI tiyi mi ɗi bagakaiku, tiyi miɗi ɗaiku na ku piliyisi edi gaini spakku n’abai gara gaiɗi tuku zi spak lai.

¹¹EPIƊ-ƊAI, hina ɵimaku gaini zigi zak aŋ ɵina siiwa na wiya gaini siiwa na wiiɗi ɗaiku n’e diri aŋ si hormo, a wiini yikuku, zina pa kapai mu nava wala na mu payaŋ girna; aŋ nava miɗi na pɗem mini pai par. Mu nafu war mefeŋ hanɗa aŋ ɗif n’a sini wala zi ci wiini pai.