Read Mousgoum Nahamiyas 13 Bible Online

Nahamiyas 13 - Mousgoum bible

Nahamiyas 13

¹War mefeŋ hanɗa, e ŋi maktuɓ na wiini Musus edi wuzaɗi ɗai paŋ, e nivi warni gaini ɗû ɓa pinzibani Ammon gaini pinzibani Mowab e simni warni diŋgi na wiiɗi ɗaini Alaw kai zaŋ.

²Buri e rivisi miɗi aliɗi Izrayel gaini simi gaini yem kai, e virgi Balam buri a tûsiɗi, amma Alaw a bunda tusa ɗa aŋ ɓiki.

³Won hlai n’e ɵini seŋ hanɗa war ɗû par, e tikiɗi arɗi aliɗi Izrayel zi zilni ɗa edi.

⁴Wuzani hlai hanɗa par, pai zi ɓaka Eliyasib a nafu gaini viri ɗaw midini dalam n’agogoi na war dalam na wiini Alaw na wiyi, ni a zigelni Tobiya.

⁵A sitini dilimi n’amai n’avut par e ɗika e mili ɓaka z'alini seyem, wala zi lûgûzi, wazagai n’e zi sda warni tempel gaini, ni algama, vin na hehe, emel, wazagai na wiiɗi levitekai n’e miɗi midini, na wiiɗi ɗai zi zini yama, na wiiɗi ɗai zi giɗimi mini magala gaini wazagai n’a yimasi edi buriɗi paakai zi ɓaka lai woni.

⁶War mefeŋ na seŋ hanɗa a za na paŋ paŋ ɗa, mu nafu aha war Yeruzalem kai, buri war buza n’ag'aŋ hu pi sulu na wiini Artaserkises pai na Babilon, mu wayasi aha sini pai wai. Mefeŋ agwi asakal par mu zilba pai buri a saŋa futi aŋ hala morkoi.

⁷Mu waya aha war Yeruzalem lai. Mu tala meefeŋ na Eliyasib a zaŋ buri a sitini dilimi wiini aha warɗi pakatai na wiini dalam na wiini Alaw.

⁸Wara a lumaŋa gara, mu niya amlai warɗi dilimi ɗa; mu pokosi wazagaini Tobiya anene puk puk.

⁹Asakal par mu miɗiɗi buri e zi dalamai edi hilu; mu wayasi wazagai n’e zi sda gaini amlai war Dalam na wiini Alaw, gaini ɓaka z'alini seyem gaini wazagai zi ɗûgûdi, zi lûgûzi lai war balamni.

¹⁰Pra mu nava labar ɓa gal n’a sa siɗi levitekai ɗa a na sa kai, pini hanɗa levitekai gaiɗi ɗai zi zini yama n’e zi sdani Alaw e pri edi yaw, ɗif paŋ edi war vuwaini sek sek.

¹¹Mu ɓiriɗi ɗai n’abakai zi ɵi wuze, mu miɗiɗi: Dalamni Alaw a hina edi kadai su buri maɗa? Asakal par mu tipiɗisi levitekai gaiɗi ɗai zi zini yama lai mu wiyiɗi war sdaɗi.

¹²Nɵa ɗai na Yuda paŋ, e kisi ni algamaɗi, gaini vin na hehe, gaini emel lai amlai war dalam n’a zizina burini.

¹³Mu sa gɗam na wiini dalam hanɗa war tini pai zi ɓaka Selemiya, ɗif n’a sɗa ɗû Sadok, Pedaya na levite, gaini Hanan n’ahini Zakkur na tiyni Mataniya lai. Buri ɗai e ɗa kûliɗi ɓa, e ɗi ɗai na jre warɗi gara, e ɓirwiɗi wazagai wiiɗi tawalakaiɗi e ɗi nagai.

¹⁴Alaw wiya hina muduku a kɵa gaya, burini sda na mu zaŋ hanɗa, ku girda sda na mu zaŋ war jre burini Dalamni Alaw na wiya gaini sda n’a za warni lai edi kai.

¹⁵War mefeŋ hanɗa mu tiliɗi ɗai aha war Yuda war mefeŋ na wiini Sabbat e ɗa siri alini luwuŋ zi vin, alini luwuŋ Fige, zak zamai zamai viya midini ablehökai, e kinsi aha war Yeruzalem war mefeŋ ni lai. Mu ɓiriɗi war mefeŋ n’e ɗa sikili wazagaiɗi hanɗa edi ɗa.

¹⁶Ɗai na Tirus par n’e ɗa aŋ fuŋ aha war Yeruzalem, e kisi hilif gaini wazagai zi sakala pinzibani kiini kiini viya e wiriŋedi tiɗi ɗai na Yuda gaiɗi na Yeruzalem lai war mefeŋ ni Sabbat.

¹⁷Mu ɓiriɗi n’abakai zi spak na Yuda, mu midiɗi ɓa: Sda na meefeŋ na ki ɗa ziŋ na ɗa, ki ɗa hiiniŋ tiɓ ɗi? Mefeŋ na wiini Sabbat ɗa, ki siɗi ɓa a wiini Alaw tiɓ ɗi?

¹⁸Tamaiki e zi maini hanɗa nɵa kai ɗi? Buri nɵa Alaw na wiimu a hinasi gir hanɗa mudumu, midini fuŋmu n’abai hanɗa lai. Amma tiki ɗa, Sabbat na ki yimiŋ aŋ wala na kadai na ɗa, aga ki riyi hiy na wiini Alaw amai siɗi ɗai na Izrayel.

¹⁹Won hlaini par mu mi ɗiɗi buri e dûgi mini magala na wiiɗi Yeruzalem wuzani nûwiiɗi futi, wuzani hlai na Sabbat a tika pini; mu miɗiɗi pra ɓa, e miliŋ edi kai haa Sabbat a vuga vik haw. Mu miliɗi ɗai zamai mini magala sa sa, kapai zak a niyasi aha war mefeŋ na wiini Sabbat kai.

²⁰Ɗai zi sakala gainɗi nagai n’e wûri wazagai edi e fini anene par mini hlai mefeŋ ktai zaw sulu.

²¹Mu ziɗi zaida mu miɗiɗi, ki hilisi ki fini mini magala buri maɗa? Na ɓa ki wiyisi li pra ɗa, aga mu yimiki. Sini mefeŋ hanɗa par ɗa e wiyisi war mefeŋ na wiini Sabbat kir kai.

²²Asakal par mu miɗiɗi wiiɗi levitekai buri e zi siɗi edi hilu kapai e hilisi e hilisi aŋ giɗimi mini magala, kapai ɗai e yimi mefeŋ na wiini Sabbat aŋ sɗik. Buri hanɗa , Alaw wiya, ku hina muduku a wula gaya kai, ku hiina haw buriya buri pɗemku n’abai.

²³War mefeŋni pra mu tiliɗi Yudiyakai zamai e miliɗi falakai na war pinzibani Asdod, Ammon gaini Mowab lai.

²⁴Galɗi aliɗi ɗa e miɗi ɗa a mini seŋ Asdod, zamai e miɗi ɗa a mini seŋ zamai zamai lai, ktai n’a muɗa mini seŋɗi Yudiyakai nɵa aŋ kai.

²⁵Mu ɓiriɗi, mu tûsiɗi lai. Mu ɵiɓiɗi ɗai zamai, mu rawa ayir na midiɗi ɗai zamai edi lai. Mu miɗiɗi buri e hi wala miɗi gaini Alaw ɓa: Aga mi siɗi aliyi na falakai wiiɗi aliɗi na maɵagai ɗe kai, mi miliɗi aliɗi na falakai wiiɗi aliyi na maɵagai ɗe kaalai; wiiyi tiyi kaalai.

²⁶Salmun pai na Izrayel a za tuwur war hanɗa kai ɗi? Arbaɗi ɗai na midini afti paŋ pai na maini ni nɵa aŋ kai, Alaw na wiini a daraŋ gara, a tikaŋ aŋ pai midiɗi Izrayel gaini hlaiɗi paŋ. Paŋ ktai falakai na war pinziba zamai par e ki war tuwur.

²⁷Tiki lai ki ɗa zi meefeŋ n’abai, ki ɗa ɗikat arni Alaw kai buri ki miliɗi falakai na war pinziba zamai par, mu ɵina seŋ hanɗa siki par kir kai.

²⁸Ktai arbaɗi alini Yoyada n’ahini Eliyasib pai n’abai zi ɓaka a suwulni Sanbalat na Horon par, mu burgaŋ edi sa par gaigai.

²⁹Alaw wiya hina muduku a wula gaiɗi ɗai hanɗa kai, buri sda na hi-hir n’e ziŋ sini sdaɗi paakai zi ɓaka gaini bonu na ku zaŋ arbaku gaiɗi paakai zi ɓaka gaiɗi levitekai lai.

³⁰Mu ziɗi edi aŋ hilu; mu birgiɗi ɗai na morkokai edi arbaɗi par, mu zizina sdaɗi paakai zi ɓaka gaiɗi levitekai warni futini ta ta, ɗif paŋ a za sda warni hlai hlaini.

³¹Mu zizina milini luwuŋ n’e zi ɓaka gaini war hlaini ta ta, gaini merfeŋni seyem ɗe lai. Alaw wiya ku hina muduku a kɵa buriya, ku za pɗem sa ta.