Read Mousgoum Nahamiyas 2 Bible Online

Nahamiyas 2 - Mousgoum bible

Nahamiyas 2

¹War tile na wiini Nizan, war buza n’ag'aŋ caaɓa na wiini pai Artaserkises, won hlai na mu kinisi vin wuzani li, mu miŋni war kop do mu siŋni; amma mu ɗiya kaa wuzani gaini kwimi maini hanɗa nɵa duk kai.

²Nɵa Pai a zilbaŋa: Suku a yima edi kai nɵa buri ma ɗa? Suku pɗem kai ɗi? Zaw a zuku n’a hiini ɗi? Nɵa hunai n’amai te yimaŋa.

³Mu wiyini seŋ wiini pai: Jaamus, wala a zuku kai, mu kwima kai maɵa ɗa, mu ɵina na ɓa fuŋ n’abai na yeɵɗi tamaiya aŋ warni a tuura edi kok, mini magalani gaini yi huw-huw lai.

⁴Pai a zilbaŋa: Ku firiya mu zuku ɗa a maɗa? Won hlaini tizaw tar mu siiwa Alaw n’amai.

⁵Asakal par mu wiyini seŋ wiini pai: Jaamus, na ɓa a tala arni pai pɗem, na ɓa firyini a na burini ɗifni zi sda lai ɗa; ku ɵinaŋa war Yuda war fuŋ n’abai na yeɵɗi tamaiya aŋ woni kapai mu rgaŋ amai.

⁶Pai a nafu gaiɗi munini n’amai ɵimani dam a zilbaŋa: Morkoiku a na buri mefeŋ gama ɗa? Aga ku waisi kaswata ɗa? Mu ɗiyini mefeŋ, a tala arni pɗem buri mu hala.

⁷Mu miɗini wiini pai pra: Jaamus, na ɓa a tala arku pɗem ɗa, ku saŋa maktuɓ ta ɗaw kapai mu kiŋɗi wiiɗi Lawanai na tini Öfrata na piɗi futi na koskoi sek kapai mu vuga haa mu co midini afti na Yuda.

⁸Pra maktuɓ ktai wiini Asaf, ɗif n’a giɗima luwuŋ na wiini pai, kapai a saŋa luwuŋ na mu paŋ mini magalani hlai na wiini wazagai zi hatam n’a na ɵimani tempel burini ɵaga na sini fuŋ n’abai burini dalam n’aga mu hala aha warni lai. Pai a saŋa maktuɓ hanɗa paŋ buri Alaw a nafu gaya.

⁹Mu hala siɗi Lawanai na tini ra Öfrata piɗi futi na koskoi sek, mu siɗi maktuɓ na pai a saŋasi. Pai a ɵinasi askarai n’abakai gaini saret zi gaw aŋ kiŋa pa.

¹⁰Sanbalat na Horon par, Lawan na Samariya, gaini Tobiya na war pinzibani Ammon n’aga wulani, hlai n’e ɵini ɓa ɗif ktai a halasi a na za wala na pɗem wiiɗi aliɗi Izrayel ɗa, seŋ hanɗa a siɗi firiyi kai.

¹¹Mu co war Yeruzalem, mu sumna woni mefeŋ hu.

¹²Asakal par mu faka amai war duvuk, ɗai zamai gaya agwi lai, amma hiini n’Alaw a waŋŋa wara aŋ zaŋ buriɗi Yeruzalem, mu siŋkiŋni wiini ɗif ktai kai. Wazagai na gaini ezini puɗu puɗu, zi libi zak n’aŋ piyi t'ablehoi na mu sumna midiɗi tar.

¹³War duvuk mu niyasi anene war mini magala na yikini ɓa magalani huduk, mu hala won hlai zi liiwi yem na wiini wala meefeŋ n’abai gaini magalani ziligit. Mu gûniti ɵagai na wiiɗi Yeruzalem gaini hangal hangal, mu niviti gaini hiɗi, mini magala gaini yi edi huw-huw lai.

¹⁴Mu hala wuza sini yem wi liiwi gaiɗi avai na wiini pai; asakal par ablehoi na mu sumna midiɗi hlai na te vuga woni ɗaw aŋ kir kai.

¹⁵Duvuk ni dama mu wayasi war huduk na sedron ɗaw, mu tiliti ɵagai gaini hangal hangal haa mu cosi mini magala na wiini huduk na mu niyaɗi woni par.

¹⁶N'abakai na war fuŋ e siɗi hlai na mu hala woni kai, e siɗi wala na mu zaŋsi kaalai haa tiyana ta, mu siŋkiɗi na sa wiiɗi Yudiyakai kai, wiiɗi paakai zi ɓaka kai, wiiɗi n’abakai zi spak ɗe kai; wiiɗi n’abakai na war fuŋ ɗe kai, wiiɗi nagai n’e tili sda kaalai.

¹⁷Nɵa mu yikiɗi, mu miɗiɗi: Ki ɗa tili haw na muɗumu warni tiyana tiɓ ɗi? Yeruzalem te bunda aŋ greŋ, mini magala gaini yi edi hu hu lai, fukumu amai rgutumu ɵagai na Yeruzalem amai, pra kapai siyer na mudumu a siɗa aŋ vada edi.

¹⁸Mu virniɗi sda n’Alaw a zaŋ gaya gaini miɗi na pai a muɗaŋa lai; e miɗi: Fukumu amai rgutumu; e tipi gaya war sda na pɗem hanɗa.

¹⁹Sanbalat na Heron par, gaini Tobiya na war pinzibani Ammon par gaini Gesem na Arap ɗe lai, won hlai n’e ɵini hanɗa, e riyi piyi, e ziyi yewere lai, e miɗi: Ki zi na ɗa a ma lai ɗa? Ki diri ki fiki amai sin pai zaw?

²⁰Mu wiyiɗi seŋ, mu miɗiɗi maini nɵa: Alaw n’amai a ni n’aga a siyi gdaŋ aŋ vi sdani hanɗa amai, tiyi ɗaini aga mi fiki amai, aga mi rgi hlai amai. Amma tiki ɗa, aftiki aha war Yeruzalem kai, aga ki ŋi warɗi kai, midini ɗif aga a kɵa gaiki kaalai.