Read Mousgoum Nahamiyas 3 Bible Online

Nahamiyas 3 - Mousgoum bible

Nahamiyas 3

¹Eliyasib, pai zi ɓaka n’abai, gaiɗi marni na paakai zi ɓaka lai e rgi mini magalani adumai; e siŋ wiini Alaw, e pi port na mini lai. Asakal par, e rgiti ɵagai sini poriyo na Meya par haa sini poriyo na wiini Hananiyel ta.

²Ɗai na Yeriko gaini Zakkur n’ahini Imri e zi sda ɵimani lai;

³Ɗai na Senaa par e rgi mini Magalani Hilif, nagai e pi kadre, e pi port mini gaini kawakai na gdaŋai gaini kawai zi ɵi mini lai.

⁴Meremot n’ahini Uriya n’ahini Hakos a za sda ɵimani par, gaini Mesullam n’ahini Berekiya, n’ahini Mekezabel, Sadok n’ahini Bana a za sda ɵimani par lai.

⁵Ɗai na Tekwa e zi sda ɵimani par lai; amma n’abakai zi spak e diri e ɵini piɗi n’abakai zi sda kai.

⁶Yoyada n’ahini Paseya gaini Mesullam n’ahini Besodiya e zi sda mini magala na wiini Yesana; e pi kadre, e pi port na mini, gaini kawakai na gdaŋai; e zizini kawai n’e ɵi mini gaini lai e ɗi nagai.

⁷Melatiya na Gabawon gaini Yadan na Merenot gaiɗi ɗai zamai na Gabawon, na Mispa lai e zi sda ɵimani hlai zi simni na wiini Lawan war piɗi futi na koskoi par na wiini ra Öfrata.

⁸Slimaɗi par Uzziyel n’ahini Harhaia, ɗif zi yûri or gaini Hananiya ɗif zi zi itir e zi sda ɵimani haa sini ɵaga na bruk ɗe ta, e wiyi wiiɗi aha.

⁹Refaia n’ahini Hur, abai na midini gal ktai na wiiɗi Yeruzalem a na za sda ɵimani lai.

¹⁰Slimaɗi par Yedaya n’ahini Harumaf a za sda wuzani dalamni tar; ɵimani par ɗa a Hatus n’ahini Hasabniya a za sda lai.

¹¹Malkiya n’ahini Harim gaini Hasub n’ahini Pahat-Muwab e zi sda war hlai zamai pra, na poriyo zi hiliyi kawakai t'aŋ woni, e ziziniti poriyo hanɗa lai.

¹²Slimani par Sallum, n’ahini Halohes, abai midini galni afti ktai na Yeruzalem n’a hina gaiɗi alini na falakai e zi sda.

¹³Hanun gaiɗi ɗai na Zanuwa e zi sda mini magala na wiini hlai na huduk. E rgiŋ amai, e pi tapra mini gaini kawakai na gdaŋai, e zizini kawakai n’e ɵi mini gaini lai e ɗi nagai, pra e rgiti ɵagai ɗe haa kil dubu ɗaw haa sini magala na wiini zilgit ta.

¹⁴Malkiya n’ahini Rekab, abaini galni hlai na Bet-Kerem a rga mini magala na wiini Ziligit ɗa a ni, a pa porte na mini gaini kawai na gdaŋai, a zizina kawai n’e ɵi mini gaini lai.

¹⁵Sallum n’ahini Kol Hoze, abaini galni afti na Mispa a za sda mini magala na wiini yem zi liiwi. A rgaŋ amai, a pa balak midini, a pa tapra na mini gaini kawakai na gdaŋai, a zizina kawakai n’e ɵi mini gaini lai; pra a ziziniti ɵagai ɵimani avai na Silowe na te na arbani zardin na wiini pai gaini hlai n’e hi amai sini aŋ niya aha zar fuŋ n’abai na wiini David.

¹⁶E di wuza sek agwi; Nahamiyas n’ahini Azbuk, abaini galni afti na Bet-Sur a za sda haa sini hlai zi pi ɗai na wiini David, haa siɗi avai na ɗai e ɓilti gaini tiɗi, pra haa sini kaŋ na wiiɗi ɗai n’e giɗimi pai ta.

¹⁷Slimani par Levitkai e zi sda. Rehum n’ahini Bani, Hasabiya, n’abaini galni afti na Keila, amma Hasabiya a za war yiki na wiini aftini.

¹⁸Marɗi zamai e zi sda asakalɗi par; Binnuwi n’ahini Duani par, tawalakaini azi sda: Binnui ahini Henadad, n’abaini galni afti na Keila n’a hina.

¹⁹Slimani par Ezer n’ahini Yosva, abaini hlai na Mispa a za sda won hlai zamai pra wuzani hlai n’e hi amai woni na miɗi dilimi zi giɗimi wazagai zi gaw par haa sini koŋni ɵaga ktai ta.

²⁰Slimani par ɗa a Baruk n’ahini Zabbai a za sda gdaŋ war hlai zamai pra, sini koŋni ɵaga par haa war mini magala na wiini dalamni Eliyasib pai zi ɓaka ta.

²¹Slimani par, Meremot n’ahini Uriya, n’ahini Hakos a za sda war hlai zamai pra, sini magala par haa sini hlai na dalamni Eliyasib a ɗiya woni ta.

²²Slimaɗi par paakai zi ɓaka n’e ɗi war fuŋ na ɵimani Yeruzalem par e hilisi e zi sda.

²³Slimani par Benyamin gaini Hasub e zi sda wuzani dalamɗi tar-tar; ɵimani par Azariya n’ahini Maaseya, n’ahini Ananiyas a za sda ɵimani dalamni tar.

²⁴Slimani par Bennuwi n’ahini Henadad a za sda won hlai zamai pra; sini dalamni Azariya par haa sini koŋni hlai ktai ta, woni par haa sini koŋɗi ɵagai ɗe ta.

²⁵Asakal par Palal n’ahini Uzai a za sda wuzani koŋni ɵagai gaiɗi poriyo n’amai na te suwasi dalamni pai edi haa gobi edi min patakai na wasi tiɗi edi midini dalamni pai, na te na ɵimani pakatai na wiiɗi daŋgai; ɵimani par Pedaya n’ahini Paros.

²⁶Gaiɗi ɗai n’e zi sda n’agogoi agogoi war tempel n’e simni war gal hlai na Ofel e zi hanɗa wuzani magala zi yem n’a na piɗi futi na dawai par gaini poriyo na te suwasi ta.

²⁷Slimaɗi par ɗai na Tekwa e zi sda won gal zamai, pra sini hlai n’a na wuzaɗi poriyo n’amai na te suwasi edi haa siɗi ɵagai na siɗi Ofel ta.

²⁸Sini magala na wiini plasai par, paakai zi ɓaka e zi sda asiya ɗi paŋ wuzani dalamni tar-tar.

²⁹Slimaɗi par Sadok n’ahini Imer a za sda wuzani dalamni tar, ɵimani par Semaya n’ahini Sekaniya, ɗif zi giɗimi mini magala na piɗi futi na dawai par a za sda.

³⁰Slimani par Hananiya n’ahini Selemiya gaini Hanun n’ahini Salaf n’ag'aŋ ɵaara e zi sda war hlai zamai pra. Slimaɗi par Mesulam n’ahini Berekiya a za sda wuzani hlai n’a sumna woni.

³¹Slimani par, Malkiya ɗif zi hiliyi kawakai a za sda haa sini dalamɗi nagai n’e zi sda n’agogoi war tempel gaiɗi ɗai zi sakala n’e ɗa wuzani mini magala na Mifkad haa siɗi dilimi zi gɗam na war koŋɗi ɵagai ta.

³²Arbaɗi dilimi zi gɗam na war koŋɗi ɵagai gaini magala na wiini adumai, ɗai zi hiliyi kawakai gaiɗi ɗai zi sakala e zi sda woni.

³³Won hlai na Sanbalat a ɵina ɓa mi ɗa rgiti ɵagai ɗa, a faka gaini hiy n’abai, agulni a lumaŋ a ziyi yewere;

³⁴wuzaɗi tawalakaini gaiɗi askarai na Samariya a muɗa maini nɵa: Yudeyakai na navaɗi kai hanɗa, e zi na ɗa a maɗa? Mu hunuɗumu ɵa mak aŋ hili wuzaɗi gaini sda ɵa! Kapai e wiyi pini ɓaka wai pra zaw? Kapai e vidi sda girna vat zaw? Kapai e zi sda na gaini ali-fuŋ na gaini yi gaini n’e vûrgûŋsi azumai par pini afti na zaw?

³⁵Tobiya na war pinzibani Ammon a nafu ɵimani zaw a muɗa lai ɓa: Hiniɗi e rgi wiiɗi le; na ɓa barka ceŋ-ceŋ a pra amai miɗi li aga te ho azumai kai ɗe!

³⁶Alaw na wiyi, tala yewere n’e ɗa zin siyi haw le; wiyiɗi yewereɗi midiɗi, ɵiriɗi edi aŋ bege midini afti zamai; hiniɗi ɗai e virmi wazagaiɗi lai.

³⁷Ku hiniɗi meefeŋɗi kai, tuwurɗi lai a nava girdi n’edi wuzani arku par kai, buri e tirkiɗi nagai n’e ɗa rgiti ɵagai.

³⁸Nɵa tiyi mi rgiti ɵagai, te rga haa amai arba ta, firyiɗi ɗai a va amai aŋ zi sda hanɗa.