Read Mousgoum Nahamiyas 4 Bible Online

Nahamiyas 4 - Mousgoum bible

Nahamiyas 4

¹Won hlai na Sanbalat, Tobiya, arapai, Ammonitkai gaiɗi ɗai na Asdot lai e ɵini ɓa ziziniɗi ɵagai na Yeruzalem a na hala wuzani, pra arɗi ɵagai n’a ho azumai ɗa a na rga amai lai e zi hiy abai gara.

²E kitisi miɗi aŋ cikiti Yeruzalem aŋ tûûriti edi lai.

³Nɵa mi siiwi Alaw na wiyi, mi mili ɗai zi gɗam sa buri e tiki hangalɗi siɗi girvudi gaini duvuk paŋ.

⁴Amma ɗai na Yuda e miɗi: Gdaŋɗi ɗai zi sda a na vada edi, buri deeɓer ɗa a suwa viya, aga mu kuɗumu aŋ rgiti ɵagai ɗa amai kai.

⁵Gawyi e miɗi maini nɵa: Yudiyakai aga e siɗi kai haa hlai na mu luɓumu midiɗi, nɵa aga mu fuɗuɗumu, mu ɗiyumu sdaɗi lai.

⁶Yudiyakai n’e ɗa ɵimani gobi, e hilisi siyi azi kadai ɗi aŋ miɗiyi ɓa: Hlai aŋsi na meefeŋ, wiyisi siyi sek.

⁷Nɵa mu zizina waŋ azumai eziɗi ɵagai ta-ta, mu miliɗi piɗi humuniɗi humuniɗi; gaini kaɵkar, kawai gaini ɓaraw lai tiɗi.

⁸Won hlai na mu talasi simniɗi paŋ li, mu hala mu miɗiɗi wiiɗi n’abakai zi spak, wiiɗi n’abakai n’e ɵi wuze gaiɗi nagai n’e ɗa war hlai hanɗa lai ɓa: Ki hûniɗi kai, ki hini miɗiki a kɵa gaini EPIƊ-ƊAI n’abai zi spak gara lai. Ki hitimi buriɗi tawalakaiki, buriɗi aliki na maɵagai gaiɗi na falakai, burini dalamki lai.

⁹Won hlai na gawyi e ɵini ɓa mi ɗa gaini ziŋita, e siɗi ɓa wala n’e rgiŋ warɗi Alaw a vadaŋ edi vat lai ɗa, e ɵiri ɵar; mi wiyi pini sdaɗi, ɗif paŋ war sdani sdani.

¹⁰Sini mefeŋ hanɗa par, galɗi ɗaiŋa na ktai ɗa e rgiti ɵagai; zamai e giɗimi hlai gaini kawakai, gamar, ɓaraw gaini safaya tiɗi, n’abakai n’e ɵi wuze e tiki hangalɗi sini fuŋ na Yuda.

¹¹Nagai n’e rgiti ɵagai, gaiɗi nagai n’e zi libisi kriyitai e zi sda, wala zi hatam war tiɗi ktai ɗaw.

¹²Nagai n’e rgiti ɵagai ɗif paŋ gaini kaɵkarni wuzani ɓak-ɓak; ɗif zi pɵi fana zi gaw a ɗiya ɵima gobi.

¹³Mu miɗiɗi wiiɗi n’abakai zi spak, wiiɗi nagai n’abakai zi ɵi wuze gaiɗi ɗai n’e ɗa paŋ ɓa: Sda a na abai, bruk gara. A ɵurumu edi siɗi ɵagai ɗa ɵar siɗi marmu par gaigai lai ɵar ɵar,

¹⁴hlai na ki ɵini li tuwini fana won par ɗa, ki tipisi siyi woni sek. Alaw na wiimu aga a hitima burimu.

¹⁵Mi zi sda maini nɵa, galyi gaini kawai tiɗi yaw, Gorof par cup haa koskoi duvuk.

¹⁶War mefeŋ hanɗa mu miɗiɗi wiiɗi ɗai maini nɵa: Abaiɗi ɗai zi sda na war hlai paŋ gaiɗi ɗai na pini e fini aha war Yeruzalem, kapai nagai e giɗimi war duvuk, gorof par e zi sda lai.

¹⁷Ta kaai, tawalakaya kaai, ɗaiŋa zi sda kaai, ɗai zi gɗam ɗe kaai, ɗif maa a foko sapa na sini edi kai, ɗif paŋ walani zi hatam war tini na wus kaai-kaai.